မန္တလေးတိုင်းဒေသကြီး၊ ပြင်ဦးလွင်ခရိုင်၊ စဉ့်ကူးမြို့နယ်တွင် ၂၀၁၇ ခုနှစ် မေလ ၅ ရက်နေ့၌ မိုးသက်လေပြင်းကျရောက်မှုကြောင့် လူနေအိမ်များ၊ ဘုရားစေတီများ၊ စာသင်ကျောင်းများ ပျက်စီးခြင်းဖြစ်ပွားခဲ့သည်။
စဉ့်ကူးမြို့နယ်အတွင်း ကျေးရွာများတွင် လူနေအိမ် ၁၃၀ ခန့် အမိုးသွပ်လန်ခြင်း၊ ပြိုကျပျက်စီးခြင်း၊ စေတီ ၄ ဆူ ထီးတော်များပျက်စီးခြင်း၊ စာသင်ကျောင်း ၂ ကျောင်း နှင့် ဘုန်းကြီးကျောင်း ၁ ကျောင်း ပျက်စီးခဲ့သည့်အပြင် နွား ၁၁ ကောင်မိုးကြိုးထိမှန်သေဆုံးခဲ့ကြောင်း သိရသည်။
အမိုးလန်ပျက်စီးနေအိမ်များမှ အချို့မှာ မိဘဆွေမျိုးများဆီသို့သွားရောက်နေထိုင်လျက်ရှိကြပြီး ပျက်စီးမှုများနှင့်ပတ်သက်၍ ဒေသဆိုင်ရာ အာဏာပိုင်အဖွဲ့အစည်းများ၊ ဂေါပကအဖွဲ့များနှင့် ပြည်သူများပူးပေါင်း၍ ပြင်ဆင်ဆောင်ရွက်သွားရန် ညှိနှိုင်းဆောင်ရွက်လျက်ရှိကြောင်း သိရသည်။
