မင်းဘူး၊မတ်လ ၁၃ ။ ။ မန်းရွှေစက်တော်ဘုရားပွဲတော်တွင် ယနေ့ မတ်လ(၁၃)ရက်နေ့ နံနက်ပိုင်းက သောင်ပြင်ရှိ စားသောက်ဆိုင်များအား တာဝန်ရှိသူတို့မှ ရှောင်တခင် ဝင်ရောက်စစ်ဆေးခဲ့ရာ အရက်သေစာများ ရောင်းချနေသည်ကို စစ်ဆေးတွေ့ရှိ အရေးယူထားကြောင်း ဘုရာကြီး ဂေါပကအဖွဲ့ထံမှ သိရှိရသည်။
" ဒီနေ့ (မတ်လ ၁၃ရက် ) နံနက် (၁၀: ၀၀)နာရီတွင် စားသောက်ဆိုင်များကို ရှောင်တခင် ဝင်ရောက် စစ်ဆေးခဲ့ပါတယ်၊ စစ်ဆေးတဲ့အခါ စောရတနာ စားသောက်ဆိုင်၊ ဘွိုင်း စားသောက်ဆိုင်များမှ မြန်မာဘီယာပုလင်း၊ မြန်မာဘီယာသံဗူး၊ Royal Club ဝီစကီ အရက်ပုလင်းပြား၊ ဒဂုံဘီယာပုလင်း၊ ဒဂုံဘီယာ သံဗူး တို/ရှည်၊ အရက်ဖြူပုလင်းများ စစ်ဆေးတွေ့ရှိတဲ့ အတွက် ဥပဒေနဲ့အညီ အရေးယူဆောင်ရွက်လျှက် ရှိပါတယ်" ဟု ရွှေ စက်တော်ဘုရား ဂေါပကဥက္ကဋ္ဌ ဦးမြင့်သိန်း က မဇ္ဈိမသို့ ပြောသည်။
၂၀၁၇ခုနှစ် မန်းရွှေစက်တော်ဘုရားပွဲတော်တွင် မှုခင်းကြိုတင်ကာကွယ် တားဆီးရေးအတွက် အရက်၊ ဘီယာ ၊ ထန်းရည် ၊ စိမ်ရည် ၊ ကဇော် ၊ရမ်၊ ဝီစကီ ၊ မူးယစ်ဆေးဝါးများ အား ဘုရားပွဲတော်တွင်းသို့ ယူဆောင်လာခြင်း၊ ရောင်းချခြင်း ၊ သုံးစွဲခြင်း မပြုရန် တားမြစ်ထားသည်။
"ဒီနှစ်မှာ အတော်ကိုဆိုးလာတယ် ။ နေရာတိုင်းမှာ အမူးသမားနဲ့၊ ရေချိုးတဲ့နေရာဆို ပိုများနေတယ်ဗျ ၊ဘိုးဘွားတွေ ခေတ်တုန်းက အသားစိမ်း ငါးစိမ်းမစားကြဘဲ ဘုရားရောက်ကတည်းက ပြန်တဲ့အထိ (၈)ပါးသီလယူပြီး နေကြတာ။ အခုခေတ်ကတော့ ဘာသာရေးနယ်ပယ်မှာ မူးယစ်သောက်စားနေကြတာလေ၊အခုလို မှန်ရာကို လုပ်ဆောင်တာမို့ ဂုဏ်ယူဝမ်းမြောက်စွာ ဂေါပကအဖွဲ့ကို ချီးကျုးပါတယ်။ တတ်နိင်ရင် လှေတင်ဘက်လဲ စစ်ဆေးအရေးယူပေးစေချင်တယ်၊ ဘုရားဖူးယာဉ်တွေလည်း စစ်ဆေးအရေးယူပေးစေချင်ပါတယ်" ဟု တောင်တွင်းကြီးမြို့မှ ဘုရားဖူးပြည်သူတစ်ဦးက ပြောသည်။
