မတ်လ ၁၂ ။ ။ ယမန်နေ့ မတ်လ ၁၁ ရက်နေ့ ညနေပိုင်းက ရဲတပ်ဖွဲ့ဝင် ၅ ဦး စစ်ဆေးနေစဉ် လူ ၅ ဦးမှ လက်နက်များ လုယူထွက်ပြေးခဲ့ရာ ယနေ့ ကျည်အိမ်မပါ သေနတ် ၂ လက် ပြန်လည်ရရှိခဲ့သည်ဟု နိုင်ငံတော်အတိုင်ပင်ခံရုံးမှ သတင်းထုတ်ပြန်သည်။
နယ်စပ်မိုင်တိုင် ၄၂ အနီး ဝေလာတောင်ချောင်းဘေး၌ ဘီအေ- ၉၄(ကျည်အိမ်မပါ) ၂ လက်အား ပြန်လည်တွေ့ရှိခဲ့ခြင်း ဖြစ်သည်။
မတ် ၁၁ ရက် ညနေ ၄ နာရီ ၁၅ မိနစ်က မောင်တောမြို့နယ် နယ်မြေ(၂) အောင်ဇံရဲကင်းမှ လက်နက်များလုယူထွက်ပြေးသွားသူများအားစုံစမ်းရာ ၂ ဦးမှာ မြန်မာ-ဘင်္ဂလားဒေ့ရှ် နယ်စပ်မှတ်တိုင် ၄၃ ခြံစည်းရိုးတစ်ဖက်ဘေးအနီးရှိ ရွာတွင်နေထိုင်သူ ဒိုင်းနက်လူမျိုးများဖြစ်ပြီး ကျန် ၃ ဦးမှာ မောင်တောမြို့ မြို့မဘုန်းကြီးကျောင်းတွင် နေထိုင်သူများဖြစ်ကြောင်း သိရသည်။
ဆိုင်ကယ် ကယ်ရီမောင်းနှင်သူ(စိစစ်ဆဲ) ၅ ဦးသည် ခမောက်ဆိပ်ကျေးရွာတွင် နထိုင်သူများဖြစ်ကြောင်းသိရှိရပြီး ၎င်းတို့၏ ဆိုင်ကယ်များအား ရွာအတွင်းထားရှိကာထွက်ပြေးတိမ်းရှောင်လျက်ရှိကြောင်းသိရသည်။
၎င်းတို့ငါးဦးမှ ရဲတပ်ဖွဲ့ဝင်ငါးဦးအား လုံးထွေး၍ ရဲကင်းမှBA 94 (၂)လက်၊ (ကျည်အိမ်ကျည်မပါ)နှင့် BA 63၁ လက်၊ (ကျည်အိမ်တစ်ခု ကျည်ဆံ ၁၅ တောင့်)တို့အားလုယူ၍ နယ်စပ်မှတ်တိုင် ၄၃ ဘက်သို့ထွက်ပြေးသွားခဲ့ခြင်း ဖြစ်သည်။
လက်နက်များ လုယူထွက်ပြေးသွားသူများအား နယ်ခြားစောင့့်ရဲတပ်ဖွဲ့ဝင်များက လိုက်လံရှင်းလင်းလျက်ရှိပြီး ဘင်္ဂလားဒေ့ရှ်နိုင်ငံ နယ်ခြားစောင့်တပ်သို့ ကူညီဖမ်းဆီးပေးရန် အကြောင်းကြားထားကြောင်းသိရှိရသည်။