ရန်ကုန်၊ မတ် ၈ ။ ။ မြန်မာ-တရုတ် နယ်စပ်ရှိ လောက်ကိုင်မြို့၌ MNDAA လက်နက်ကိုင်အဖွဲ့နှင့် အစိုးရစစ်တပ်တို့အကြား ၂ ရက်ကြာ တိုက်ပွဲများဖြစ်ပွားခဲ့ပြီးနောက် လောက်ကိုင်မှ လာရှိုးမြို့သို့ ကားခများ ကျပ် ၁ သိန်းထိ ဆယ်ဆ မြင့်တက်ခဲ့ကြောင်း သိရသည်။
အနိမ့်ဆုံး ကျပ်ငွေ ၂၅၀၀၀မှ ၅၀၀၀၀၊ အမြင့်ဆုံး ကျပ် တစ်သိန်းထိ ကားခများ မြင့်တက်ခဲ့ပြီး လက်ရှိတွင် လောက်ကိုင်မှ လားရှိုးသို့ မှန်လုံအလတ်စားနှင့် ဗင်ကားများပြေးဆွဲနေကာ ကားခတက်မှုကြောင့် နေရပ်မပြန်နိုင်သည့်သူများ ကျန်ရှိနေသေးကြောင်း လက်ရှိတွင် လားရှိုးမြို့၊ မန်ဆူကျောင်းတိုက်သို့ ရောက်ရှိနေသည့် စစ်ဘေးရှောင် ဦးနိုင်စိုးက ပြောသည်။
“ ကျွန်တော်က အောင်လံဘက်ကနေ လောက်ကိုင်ကို ကြံသွားခုတ်တာ။ ၈ ရက်လောက်ပဲရှိသေးတယ်။ ခုစစ် ဖြစ်တော့ လားရှိုးသွားမယ်ဆိုတော့ ပိုက်ဆံကလည်း မရှိဘူး။ ကျွန်တော်တို့ရှေ့မှာ ကားခကို တစ်သိန်းလည်း တောင်းတယ်။ ငါးသောင်းလည်း တောင်းတယ်။ ပိုက်ဆံရှိတဲ့သူကတော့ လိုက်သွားတာပေါ့။ ကျွန်တော်တို့က နှစ်သောင်းခွဲနဲ့ ရတယ်ဆိုပေမယ့် လူကများလို့ပါ။ ဒါတောင်မှ ပိုက်ဆံမပြည့်လို့ မှတ်ပုံတင် အပ်ခဲ့ရတယ်။ လောက်ကိုင်မှာလည်း လင်မယား စုံတွဲနှစ်တွဲ ကျန်ခဲ့တယ်။ ပိုက်ဆံ သုံးသောင်းလောက်ပဲ ရှိလို့၊ ကားခ မ လောက်လို့။ တစ်ယောက်ကို အနည်းဆုံး နှစ်သောင်းခွဲဆိုတော့ မလိုက်နိုင်လို့ ကျန်ခဲ့တာ ”ဟု ဦးနိုင်စိုးက ပြောသည်။
ပုံမှန်ကားခနှုန်းမှာ လောက်ကိုင်မြို့မှ လားရှိုးမြို့သို့ အများဆုံး ၁၂၀၀၀ သာ ကျသင့်ပြီး မှန်လုံအလတ်စား ကားများမှာ ယခင်က ကျပ် ၁၀၀၀၀ သာ ကျသင့်သည်ဟု ဒေသခံအစိုးရဝန်ထမ်းတစ်ဦးက ပြောသည်။
“ အခုက လားရှိုးထိကို လူတစ်ယောက်ကို တစ်သိန်းတောင်းနေတယ်လို့ ကြားတယ်။ ကားတွေကတော့ ဟိုင်း လတ်တွေရော။ ဗင်ကားတွေရောပေါ့။ တိုက်ပွဲဖြစ်နေတဲ့ အချိန်ဆိုတော့ သူတို့အနေနဲ့ တစ်သိန်းတောင်းလည်း ပေးသွားကြတာပေါ့။ မပေးနိုင်တဲ့သူတွေကတော့ ကျန်ခဲ့တယ်”ဟု ၎င်းက ပြောသည်။
လက်ရှိတွင် လာရှိုးမြို့ရှိ သီရိမင်္ဂလာ မန်ဆူဘုန်း ကြီးကျောင်းတွင် စစ်ဘေးရှောင်ဦးရေ ၂၀၀၀ ကျော်နေပြီး ထပ်မံလာ ရောက်သူများလည်းရှိနေသေးကြောင်း သိရသည်။
