မုံရွာ၊ ဖေဖော်ဝါရီ ၁၈။ ။ အလောင်းတော်ကသပ ဘုရားဖူးယာဉ် တစ်စီး ဖေဖော်ဝါရီ ၁၇ ရက် ညနေပိုင်းက တိမ်းမှောက်ခဲ့ပြီး လူတစ်ဦးသေဆုံးခဲ့ကြောင်း ယင်းမာပင်မြို့မရဲစခန်းမှ သိရသည်။
ယင်းမာပင်မြို့နယ်၊ ကွင်းစပ်ကျေးရွာအနီးတွင် အဆိုပါဘုရားဖူးယာဉ်တိမ်းမှောက်ခဲ့ပြီး ရှေ့ဘီးပေါက်ကာ လမ်း၏လက်ယာဘက်သို့ ထိုးကျတိမ်းမှောက်ခဲ့ခြင်း ဖြစ်ကြောင်း သိရသည်။
ဘုရားဖူးယာဉ်ပေါ်တွင် ခရီးသည် ၇ ဦး လိုက်ပါလာပြီး မချိုမြသီ(၃၇)နှစ်၊(ဘ)ဦးမြတ်ထူး၊ ကသာမြို့နေထိုင်သူမှာ မေးစေ့ပေါက်ပြဲဒဏ်ရာဖြင့် နေရာတွင်ပင် သေဆုံးသွားခဲ့ကြောင်း ယင်းမာပင်မြို့နယ်ရဲမှူး ရဲမှူးမြင့်သိန်းက ပြောသည်။
ယင်းကြောင့် ယင်းမာပင်မြို့မရဲစခန်းမှ ယာဉ်မောင်းသူအား ရာဇသတ်ကြီးပုဒ်မ ၃၀၄(က)/၃၃၇ အရ အမှုဖွင့်အရေးယူထားကြောင်း သိရသည်။
ထို့ပြင် ဇန်နဝါရီ ၁၂ ရက်နေ့ကလည်း အလောင်းတော်ကသပ ဘုရားဖူးယာဉ်ပေါ်မှ ခရီးသည်အမျိုးသမီးတစ်ဦးပြုတ်ကျ သေဆုံးခဲ့သေးသည်။
