မတ်ပဲ စိုက်ပျိုးရေး

17 February 2017
မတ်ပဲ စိုက်ပျိုးရေး

မတ်ပဲကတော့ အစေ့အပေါ်မှာ မူတည်ပြီး သုံးမျိုး ခွဲခြားနိုင်ပါတယ်။ အစိမ်းပုပ်ရောင်၊ အညိုဖျော့ရောင်နဲ့ အညိုရင့်ရောင် မတ်ပဲတို့ ဖြစ်ပါတယ်။

မတ်ပဲဟာ မြေသားအနည်းအငယ် သဲဆန်တဲ့မြေမျိုးကနေ ရွံ့စေးဆန်တဲ့ မြေမျိုးအထိ စိုက်ပျိုးနိုင်ပါတယ်။ တောင်ပေါ်ရော မြေပြန့်ပါ စိုက်ပျိုးနိုင်ပါတယ်။

မတ်ပဲစိုက်ပျိုးရန်အတွက် ထယ် တစ်စပ်နှစ်စပ် ၊ ထွန် တစ်စပ်နှစ်စပ် ဝင်ပြီးမှ ကျဲပက်၍သော်လည်ကောင်း အတန်းလိုက်၍သော်လည်ကောင်း စိုက်ပျိုးနိုင်ပါတယ်။ စိုက်ပျိုးချိန်မှာ မူတည်ပြီးတော့ မိုးဦးစိုက် မတ်ပဲနဲ့ မိုးနှောင်းစိုက် မတ်ပဲဆိုပြီးတော့ နှစ်မျိုးရှိပါတယ်။ မိုးဦးစိုက်မှာတော့ တစ်ပင်နဲ့တစ်ပင်ကို တစ်ပေခန့် ခွာထားရပြီး မိုးနှောင်းစိုက်မှာတော့ ခြောက်လက်မခန့် ခွာပြီးတော့ စိုက်ပျိုးပေးရမှာဖြစ်ပါတယ်။

မျိုးစေ့ချတဲ့နေရာမှာတော့ မိုးတွင်းမှာစိုက်မယ်ဆိုရင် မြေအနက် တစ်လက်မခန့် ဒါမှမဟုတ်ရင် တစ်လက်မခွဲခန့်နဲ့ မိုးနှောင်းစိုက်မှာဆိုရင်တော့ တစ်လက်မခွဲ ဒါမှမဟုတ်ရင် သုံးလက်မအထိ မြေထဲချပြီး စိုက်ပျိုးရမှာဖြစ်ပါတယ်။

မျိုးစေ့ချပြီး တစ်ပတ် ဆယ်ရက်ခန့်အကြာမှာတော့ အပင်များပေါက်လာပြီး သုံးပတ်သားအရွယ်မှာတော့ ကြားကို ထွန်လိုက်ပေးခြင်း အပင်မှုန်းခြင်းတို့ကို ပြုလုပ်ပေးရမှာပါ။ နှစ်လခွဲမှာဆိုရင်တော့ ပန်းများ စတင်ဖူးပွင့်လာပြီးတော့ သုံးလခွဲအရွယ်မှာတော့ နှုတ်သိမ်းရမှာပဲ ဖြစ်ပါတယ်။

Mizzima Weekly