မုံရွာ၊ ဇန်နဝါရီ ၂၇ ။ ။ စစ်ကိုင်းတိုင်းဒေသကြီး၊ တန့်ဆည်မြို့နယ်တွင် ဘုရားပွဲသွားသည့် ထော်လာဂျီတိမ်းမှောက်၍ သုံးဦးသေဆုံးကာ ၄၀ ကျော်ဒဏ်ရာရရှိခဲ့ကြောင်း တိုင်းဒေသကြီး ရဲတပ်ဖွဲ့မှူးရုံးမှ သိရသည်။
တန့်ဆည်မြို့နယ်၊ ရေဦး-ကလေးဝသွား ကားလမ်းတွင် ကံထူးမကျေးရွာဘုရားပွဲသို့ သွားသော ထော်လာဂျီယာဉ်မှာ ဆိုင်ကယ်အား ရှောင်ရာမှ တိမ်းမှောက်ခဲ့ကြခြင်းဖြစ်သည်။
တန့်ဆည်မြို့နယ်၊ ကံထူးမနယ်မြေရဲစခန်း သို့ ဖုန်းဆက်သွယ်မေးမြန်းရာ ဟုတ်မှန်ကြောင်း တာဝန်ကျ ရဲဝန်ထမ်းတစ်ဦးက အတည်ပြုခဲ့ပြီး အဆိုပါထော်လာဂျီ၏ ယာဉ်လိုင်စင်ရှိမရှိအား စစ်ဆေးနေဆဲဖြစ်ကြောင်း ပြန်လည်ဖြေဆိုခဲ့သည်။
အဆိုပါ ဘုရားပွဲသွားသည့်ယာဉ် တိမ်းမှောက်မှုကြောင့် လိုက်ပါလာသူ ကျား ၃ ဦးသေဆုံးခဲ့ပြီး ကျား(၂၀)၊ မ(၂၂)ဦးတို့မှာ မစိုးရိမ်ရသောဒဏ်ရာရရှိခဲ့ကြောင်း သိရသည်။
ယင်းကြောင့် တန့်ဆည်မြို့နယ်၊ ကံထူးမ နယ်မြေရဲစခန်း ယာဉ်(ပ)၂/၂၀၁၇၊ ရာဇသက်ကြီးဥပဒေပုဒ်မ ၃၀၄-က/၃၃၇/၃၃၈ အရအမှုရေးဖွင့်ကာ ယာဉ်မောင်းအား ဖမ်းဆီးထားကြောင်း သိရသည်။
