ဇန်နဝါရီ ၂၀ ။ ။ ရှမ်းပြည်မြောက်ပိုင်း မူဆယ်မြို့နယ်၊ စယ်လန့်ကျေးရွာအုပ်စု၊ စယ်လန့်ရှမ်းလူငယ်များ ဦးဆောင်ပြီး ဆောက်လုပ်ထားသော “ဆေခန်ဖ" ကိုယ်ထူကိုယ်ထ မူကြိုကျောင်းဖွင့်ပွဲအထိမ်းအမှတ် စာပေဟောပြောပွဲကို ဇန်နဝါရီ ၁၉ ရက် မနက် ၉ နာရီကနေ ညနေ အထိ ကျင်းပခဲ့သည်။
“ဒီနေ့ ဟောပြောပွဲကတော့ ကျွန်တော်တို့ စယ်လန့် ရှမ်းလူငယ်တွေရဲ့ ကြိုးစားအားထုတ်မှု အသီးအပွင့်တစ်ခုပါ။ မူကြိုကျောင်းဖွင့်ပွဲ အထိမ်းအမှတ်လည်း ဖြစ်သွားတာပေါ့။
လာရောက်ဟောပြောပေးခဲ့ကြတဲ့ ဆရာတွေကလည်း ကလေးသူငယ် ပညာရေး အကြောင်းတွေပဲ ဟောပြောခဲ့ကြပါတယ်။ မိဘပြည်သူတွေကလည်း ကလေးပြုစုပျိုးထောင်နည်းတွေ အရင်ကထက် ပိုသိလာရပါတယ်" ဟု ဟောပြောပွဲဖြစ်မြောက်ရေးနှင့် မူကြိုကျောင်းကော်မတီ အတွင်းရေးမှူး(၁) စိုင်းမောဝ်အွန် က မဇ္ဈိမသို့ပြောသည်။
ယခုဟောပြောပွဲသည် ဒုတိယအကြိမ်မြောက်ဖြစ်ပြီး လာရောက်ဟောပြောသည့် ပုဂ္ဂိုလ်များမှာ ရှမ်းစာပေ ပညာရှင် ဆရာ လုံးစိုင်းဖှ၊ စာရေးဆရာ ဟင်း(ကာယန်း)၊ စာရေးဆရာ ခွန်ယုံးချို၊ ကာတွန်းဆရာ ဟန်လေး၊ သိန္နီမြို့နယ် ပြည်သူ့လွှတ်တော်ကိုယ်စားလှယ် စိုင်းဦးခမ်း၊ မန္တလေးမြို့၊ Smart Kids College - SKC ကိုယ်ပိုင် ဆရာဖြစ်သင်တန်းကျောင်း ၏ Principal ဖြစ်သူ နန်းမေသဲအေးတို့ ဖြစ်သည်။
၂၀၁၅ ခုနှစ်က ပထမအကြိမ် စာပေဟောပြောပွဲ ကျင်းပခဲ့ပြီး ထိုမှလက်ကျန်ငွေတွေကို ကလေးသူငယ်ပညာရေးအပိုင်းတွင် အသုံးပြုမည်ဟု ဆုံးဖြတ်ကြကာ ယနေ့ဖွင့်လှစ် ခဲ့သည့် မူကြိုကျောင်းကို ဆောက်လုပ်ခဲ့ကြောင်း၊ ငွေကြေးလုံလောက်မှု မရှိသောကြောင့် ရပ်နီးရပ်ဝေး မိဘပြည်သူများထံ အလှူငွေ ကောက်ခံခဲ့ရကြောင်း သိရှိရသည်။