ရန်ကုန်၊ ဇန်နဝါရီ ၁၂ ။ ။ ဗိုလ်တစ်ထောင်မြို့နယ်အတွင်း အိုးအိမ်မှသိမ်းဆည်းထားသည့် မြေပိုင်ရှင် ၂၄ ဦး၏ မြေကွက်များ ပြန်လည်ရရှိရေးအတွက် ဆန္ဒထုတ်ဖော်ပွဲတစ်ရပ် ဇန်နဝါရီလ ၁၂ရက်၊ ရန်ကုန်မြို့တော်ခန်းမရှေ့၌ ပြုလုပ်ခဲ့သည်။
ပြီးခဲ့သည့် ၂၀၁၆ ခုနှစ်၊ ဇွန်လ (၂၉) ရက်နေ့တွင် အိုးအိမ်ဦးစီးဌာနမှ မြေပိုင်ရှင် ၂၇၇ ဦးကို လျော်ကြေးနစ်နာကြေးအဖြစ် တိုက်ခန်း ၁ ခန်းနှင့် ငွေသိန်း ၃၂၀ ကျပ်အား ပေးအပ်ခဲ့သော်လည်း မြေပိုင်ရှင် ၂၄ ဦး ကျန်ရှိနေသောကြောင့် ယခုကဲ့သို့ ဆန္ဒထုတ်ဖော်ရခြင်းဖြစ်သည်ဟု မြေပိုင်ရှင်များက ပြောသည်။
“ သူတို့မပေးချင်လို့ တမင်အချိန်ဆွဲထားတယ်လို့ပဲ ထင်တယ်။ အချိန်ဆွဲထားတာက အတားအဆီးတစ်ခုပဲ။ ပြည်သူတွေကအချိန်တွေနစ်နာတယ်။ ဒီနေ့ဆိုရင်လည်း လမ်းတွေကြပ်တယ်။ အလုပ်တွေဖျက်ပြီးတော့ လာရတယ်။ မအားတဲ့ကြားတည်းက ကိုယ့်မြေကိုယ်ပြန်ရအောင်ဆန္ဒဖော်ထုတ်ကြရတာ” ဟု ဆန္ဒထုတ်ဖော်သူ မသင်းသင်းနိုင်က ပြောသည်။
အဆိုပါမြေနေရာကိစ္စနှင့်ပတ်သက်ပြီး အိုးအိမ်ဦးစီးဌာနမှ နိုင်ငံအတော်အဆင့် စီမံဆုံးဖြတ်ရမှာဖြစ်ကြောင်း ပြောသည်။
“ဒီကိစ္စက နိုင်ငံတော်အဆင့်ကမှ စီမံဆုံးဖြတ်လို့ရမှာ။ ပြီးခဲ့တဲ့ ၂၇၇ ယောက်ကို လျော်တုန်းကလည်း နိုင်ငံတော်က လျော်လိုက်ပါတော့ပြောလို့ လျော်ပေးခွင့်ပေးလိုက်တာပေါ့နော်။ နိုင်ငံတော်အဆင့်က လျော်ပါဆိုရင် ကျွန်တော်တို့အိုးအိမ်ဌာနက လျော်မှာပဲ” ဟု ဗိုလ်တထောင်မြို့နယ်၊ အိုးအိမ်ဦးစီးဌာနရှိတာဝန်ရှိသူတစ်ဦးမှ ပြောဆိုသည်။
အဆိုပါမြေနေရာများအတွက် ဆန္ဒထုတ်ဖော်မှုမှာ ၂၀၁၃ ခုနှစ် ၁ လမှ စတင်ခဲ့ပြီး ယခု ၂၂ ကြိမ်မြောက်ဖြစ်ကာ ဆန္ဒထုတ်ဖော်သူများက ထပ်မံ၍ ဇန်နဝါရီလ ၂၆ ရက်နေ့တွင်လည်း ယခင်အတွင်းဝန်ကြီးများရုံးမှ အိုးအိမ်ဦးစီးဌာနအထိ လမ်းလျှောက်ဆန္ဒပြသွားမည်ဟု သိရပါသည်။
