ဇန်နဝါရီ ၁၀ ။             ။ ယခုသီတင်းပတ်ကုန်တွင်းက ဟော်မုဇ် ရေလက်ကြားသို့ အရှိန်မြှင့်ချဉ်းကပ်လာခဲ့သော အီရန်သင်္ဘောလေးစီးကို အမေရိကန်စစ်သင်္ဘောတစ်စီးက သတိပေးခြောက်လှန့် ပစ်ခတ်ခဲ့ရကြောင်း အမေရိကန်တာဝန်ရှိသူများက ပြောသည်။

ဇန်နဝါရီ ၈ ရက်က အမေရိကန်ဖျက်သင်္ဘော USS Mahan က ယခုကဲ့သို့ ပစ်ခတ်သတိပေးမှုများ ပြုလုပ်ခဲ့ရခြင်းဖြစ်ကြောင်းနှင့် ယခုကဲ့သို့ အီရန်သင်္ဘောများ၏ အပြုအမှုမှာ အန္တရာယ်များသည့် လုပ်ရပ်တစ်ခုဖြစ်ပြီး သင့်လျော်မှုမရှိလှကြောင်း အမေရိကန်တာဝန်ရှိသူများက ပြစ်တင်သွားသည်။

ထိုကဲ့သို့ ရေလက်ကြားတွင် မြန်နှုန်းမြင့်ချဉ်းကပ်လာနေသော အီရန်သင်္ဘောများပေါ်မှ သင်္ဘောသားများမှာ အမေရိကန်သင်္ဘောအနီးချဉ်းကပ်လာချိန်တွင် လက်နက်များအနီး အသင့်အနေအထား ရှိနေကြသည်ဟုလည်း သိရသည်။

" Mahan ဘက်က သူတို့ကို ရေဒီယိုကနေ ဆက်သွယ်ခဲ့ပြီး သတိပေးဖို့ လုပ်ခဲ့ပါတယ်" ဟု အမေရိကန်စစ်ဘက်တာဝန်ရှိသူတစ်ဦးက ပြောသည်။

ယင်းအပြင် သတိပေး မီးကျည်များ ပစ်ဖောက်ခြင်း၊ အချက်ပေးဥသြများ ဆွဲခြင်းတို့ဖြင့် သတိပေးခဲ့သည်ဟုလည်း သိရသည်။

ယင်းနောက် ယင်းသတိပေးချက်များကို မလိုက်နာဘဲ အီရန်သင်္ဘောများမှာ အမေရိကန်စစ်သင်္ဘောဆီ တိုက်ရိုက်ဆက်လက်ချဉ်းကပ်လာနေခြင်းကြောင့် သတိပေးပစ်ခတ်မှု သုံးကြိမ်ပြုလုပ်ခဲ့ရပြီး   နောက်မှ  ယင်းသင်္ဘောများ ပြန်လည်အရှိန်သတ်သွားခဲ့သည်ဟုလည်း သိရသည်။