ရန်ကုန်၊ဇန်နဝါရီ ၆ ။ ။ ဆက်သွယ်ရေး ဥပဒေပုဒ်မ ၆၆(ဃ)နှင့် တရားစွဲဆိုခြင်းခံထားရသော အမျိုးသား ဒီမိုကရေစီအဖွဲ့ချုပ် ဗဟိုသုတေသနလမ်းညွှန်အဖွဲ့၏ အတွင်းရေးမှူးဖြစ်သူ ဦးမျိုးရန်နောင်သိမ်း ၏ အာမခံလျှောက်ထားမှုကို ကမာရွတ်မြို့နယ် တရားရုံးက ထပ်မံပယ်ချလိုက်ကြောင်း သိရသည်။
ယင်းအာမခံလျှောက်ထားမှုသည် ၄ ကြိမ်မြောက် ရုံးချိန်းတွင် ထပ်မံပယ်ချခံရခြင်း ဖြစ်သည်။
အဆိုပါအမှုကို ရုံးထုတ်ရာမှာ တရားလိုပြသက်သေနှစ်ဦးဖြစ်သော လှိုင်မြို့မရဲစခန်းမှ စခန်းမှုး ဦးကျော်ဇော နှင့် အရပ်သားတစ်ဦးဖြစ်သော ဦးစန်းလွင်တို့ကို တရားသူကြီးဒေါ်သန္တာရှင်က စစ်ဆေးခဲ့သည်။
“အမှုကို တရားစွဲချင်လို့ရှိရင်စွဲ၊ ကြိုတင်ခွင့်ပြုချက်လိုတယ်။ ကျွန်တော်တို့ ဆက်သွယ်ရေးဝန်ကြီးဌာနက ကြိုတင်ခွင့်ပြုချက်ကြည့်လိုက်တဲ့အခါကျတော့ အကြောင်းကြားတဲ့စာ။ သူက သေချာကိုရေးထားတာ။ အကြောင်းကြားပါတယ်ပေါ့။ ဒါကို ကျွန်တော်တို့က ကြိုတင်ခွင့်ပြုချက်လည်း မဟုတ်ဘူး။ ဒီဟာ အပြင် ကြိုတင်ခွင့်ပြုချက် ထပ်တောင်းတယ်။ ဒါပေမယ့် တရားရုံးက လက်မခံဘူး။ ဒီအကြောင်းကြားစာကိုပဲ ကြိုတင်ခွင့်ပြုချက် ဖြစ်တယ်လို့ပဲ မှတ်ယူတယ်။ ပြီးတော့ ကျွန်တော်တို့ လျှောက်ထားတာကို ပယ်ချလိုက်တယ်”ဟု တရားလွှတ်တော် ရှေ့နေ ဦးကျော်ဟိုးက အာမခံလျှောက်ထားခြင်း ပယ်ချခံရမှုနှင့် ပတ်သက်ပြီး မဇ္စျိမကို ပြောသည်။
နောက်တစ်ကြိမ်ရုံးချိန်းအဖြစ် ဇန်နဝါရီလ (၁၀) ရက်နေ့ကို ထပ်မံချိန်းဆိုခဲ့ပြီး ယနေ့ ရုံးချိန်းသို့ အမျိုးသားဒီမိုကရေစီအဖွဲ့ချုပ် နာယကဖြစ်သူ ဦးတင်ဦး လာရောက်တွှေ့ဆုံခဲ့သည်။
ဦးမျိုးရန်နောင်သိမ်းသည် တပ်မတော်ကာကွယ်ရေးဦးစီးချုပ်ကို ဂုဏ်သိက္ခာ ကျဆင်းစေပြီး အသရေပျက်စေမည့် စကားများကို လူမှုကွန်ရက်တွင် ရေးသားခဲ့သည်ဟုဆိုကာ တရားစွဲဆိုခံ ထားရခြင်းဖြစ်သည်။
