မြန်မာနိုင်ငံနှင့် ပိုမိုနီးနီးကပ်ကပ် ဆက်ဆံသွားမည်ဟု အမေရိကန် ပြော

.

ဒီဇင်ဘာ ၃၁ ။                   ။ မြန်မာနိုင်ငံနှင့် အမေရိကန်အကြား ဆက်ဆံရေးကို ပိုမိုခိုင်မာစေရန် လုပ်ဆောင်သွားမည်ဖြစ်ကြောင်းနှင့် မြန်မာအစိုးရ၏ ကြိုးပမ်းအားထုတ်မှုများ အောင်မြင်နိုင်စေရန် ကူညီသွားမည်ဖြစ်ကြောင်း ၀ါရှင်တန်အစိုးရက ဒီဇင်ဘာ ၃၀ ရက်တွင် ထုတ်ပြန်ပြောကြားသွားသည်ဟု သိရသည်။

" ပြီးခဲ့တဲ့နှစ်ကဆိုရင် မြန်မာနိုင်ငံအတွက် သမိုင်းဝင်နှစ်တစ်နှစ် ဖြစ်ခဲ့ပါတယ်၊ နိုင်ငံမှာ ဒီမိုကရေစီနည်းကျ ရွေးချယ်တင်မြှောက်လိုက်တဲ့ အရပ်သား အစိုးရသစ်တစ်ရပ် ပေါ်ထွက်လာခဲ့ပါတယ်" ဟု အမေရိကန်နိုင်ငံခြားရေးဝန်ကြီးဌာနက ဇန်န၀ါရီလ ၄ ရက် လွတ်လပ်ရေးနေ့ အကြို မြန်မာပြည်သူပြည်သားများထံ ပေးပို့သော သတင်းအမှာစကားတစ်ခုတွင် ပြောကြားသွားသည်။

" အမေရိကန်-မြန်မာအကြား နွေးထွေးနီးကပ်တဲ့ ဆက်ဆံမှုရှိနေတာ၊ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ ၀ါရှင်တန် ခရီးစဉ်နဲ့အတူ စီးပွားရေးဒဏ်ခတ်ပိတ်ဆို့မှုတွေကို သမ္မတအိုဘားမားအစိုးရက ဖြေလျှော့ပေးခဲ့တာတွေ ရှိထားခဲ့ပါတယ်" ဟု ယင်းထုတ်ပြန်ချက်တွင် ပါရှိသည်။

" အမေရိကန်အနေနဲ့ မြန်မာနိုင်ငံရဲ့ အောင်မြင်ရာ အောင်မြင်ကြောင်းအတွက် ပံ့ပိုးပေးသွားမှာဖြစ်ပါတယ်၊ မြန်မာအစိုးရနဲ့လည်း ဆက်လက်နီးနီးကပ်ကပ် လက်တွဲလုပ်ဆောင်သွားမှာဖြစ်ပါတယ်၊ ငြိမ်းချမ်းရေး၊ အမျိုးသားရင်ကြားစေ့ရေး၊ စီးပွားရေးနဲ့ လူမှုဖူလုံမှုဆိုင်ရာ အခွင့်အလမ်းတွေ တိုးပွားရရှိနိုင်မှုနဲ့ လူ့အခွင့်အရေးဆိုင်ရာ လေးစားလိုက်နာမှု စတဲ့အပိုင်းတွေမှာလည်း သက်ဆိုင်ရာ တာဝန်ရှိသူတွေနဲ့ပါ နီးနီးကပ်ကပ် လုပ်ဆောင်သွားမှာဖြစ်ပါတယ်" ဟု ယင်းထုတ်ပြန်ချက်တွင် ပြောထားသည်။