စျေးဘက်တွင်မက ဆေးဘက်လည်းဝင် နံနံပင်ကို စိုက်ပျိုးကြ

27 December 2016
စျေးဘက်တွင်မက ဆေးဘက်လည်းဝင် နံနံပင်ကို စိုက်ပျိုးကြ
 

စိုက်ပျိုးပျော်ရွှင် သိစေချင်အစီအစဉ်ကနေ ဒီနေ့မှာတော့ နံနံပင် စိုက်ပျိုးရေးအကြောင်းကို တင်ဆက်ပေးမှာဖြစ်ပါတယ်။

နံနံပင်ကတော့ မုန့်ဟင်းခါး ညှပ်ခေါက်ဆွဲတို့နဲ့ ဆိုရင်တော့ အလွန်လိုက်ဖက်တဲ့ အပင်လည်း ဖြစ်ပါတယ်။ အခြားသော ဟင်းလျာများ ချက်ပြုတ်ရာမှာလည်း နံနံပင်ကို အုပ်ပြီးတော့ ချက်စားနိုင်သလို အတို့အမြှုပ်အဖြစ်လည်း စားသုံးနိုင်ပါတယ်။

နံနံပင်ရဲ့ မူရင်းဒေသကတော့ မြေထဲပင်လင် အနီးတဝိုက်မှာရှိတဲ့ နိုင်ငံတွေကပဲ ဖြစ်ပါတယ်။ နံနံပင်ကတော့ မြေနက်မှာရော မြေနီနုံးမှာရော ကောင်းစွာ ဖြစ်ထွန်းပါတယ်။ စနပ်ဖွတ်ချေးမြေမှာ မြေသြဇာ ချစရာမလိုပဲ နှုန်းမြေနီနဲ့ နှုန်းမြေနက်တို့မှာတော့ မြေသြဇာ ချပေးဖို့ လိုပါတယ်။ နံနံပင်ကို ဆောင်းရာသီမှာ စိုက်ပျိုးမယ်ဆိုရင်တော့ ပိုမိုအောင်မြင်ပါတယ်။ နံနံပင် စိုက်ပျိုးရန်အတွက်ကတော့ ၁ ဧကကို မျိုးစေ့ ၄ ပိဿာခွဲခန့် လိုအပ်ပါတယ်။

စိုက်တန်း တစ်တန်းနဲ့တစ်တန်းကိုတော့ ၉ လက်မခန့် ခြားပေးရမှာပါ။ ကြွက်မြီးတန်း မျိုးစေ့ချစနစ်နဲ့ စိုက်ပျိုးနိုင်ပါတယ်။ မျိုးစေ့ချပြီးရင်တော့ မြေပါးပါးလေး ချပေးရပါတယ်။ ပေါင်းမြတ်များကိုလည်း ရှင်းလင်းပေးထားရမှာပါ။ ပေါင်းမြတ်များကို ရှင်းလင်းပေးခြင်း မြေဆွပေးခြင်းတို့ကိုလည်း ပြုလုပ်ပေးရမှာပါ။ နံနံပင်ကို စိုက်ပျိုးပြီး ၃၆ ရက်အကြာမှ ရက်ပေါင်း ၆၀ အတွင်းမှာ နှုတ်ယူစားသုံးနိုင်မှာလည်း ဖြစ်ပါတယ်။ နံနံပင်မှာ အဓိကကျရောက်တတ််တဲ့ ပိုးမွှားတွေကတော့ ပြပိုးပဲဖြစ်ပါတယ်။

နံနံပင်ကိုတော့ အတို့အမြှုပ် စားသောက်ရုံတင်သာမက ဆေးဘက်ဝင်အပင်အဖြစ်လည်း အသုံးပြုနိုင်ပါတယ်။ နံနံစေ့ တစ်မတ်သား သကြားတစ်မတ်သားတို့ကို ရောစပ်ပြီး စားသုံးပေးပါက အဆစ်အမြစ်ကိုက်ခဲခြင်းများ သက်သာပျောက်ကင်းစေမှာလည်း ဖြစ်ပါတယ်။ ကလေးငယ်များ ချောင်းဆိုးနေရင်တော့ နံနံစေ့ကို ဆန်ဆေးရေနဲ့ စိမ်ပြီးတော့ သကြားအနည်းငယ်ထည့်ပြီး ကလေးငယ်များကို ကျွေးပေးမယ်ဆိုရင်တော့ ချောင်းဆိုးရောဂါ ပျောက်ကင်းစေမှာလည်း ဖြစ်ပါတယ်။

Mizzima Weekly