ဒီဇင်ဘာ ၂၆ ။ ။ ဂျာမနီနိုင်ငံ တောင်ပိုင်းမြို့တစ်မြို့၌ အလေးချိန် ၁ ဒသမ ၈ တန်ရှိ ဒုတိယကမ္ဘာစစ်လက်ကျန်ဗုံးတစ်လုံး တွေ့ရှိခဲ့ပြီးနောက်ပိုင်း ဒေသခံ ၅၀,၀၀၀ ကျော်ကို ယင်းအရပ်မှ ယာယီစွန့်ခွာခိုင်းခဲ့ရသည်ဟု သတင်းတစ်ရပ်တွင် ဖော်ပြထားသည်။
ပြီးခဲ့သည့်သီတင်းပတ်က Augsburg မြို့၌ မြေအောက်ကားပါးကင်တစ်ခု ဆောက်လုပ်ရေးလုပ်ငန်းဆောင်ရွက်စဉ် အဆိုပါ ဗုံးကို ရှာတွေ့ခဲ့ပြီးဖြစ်ကာ ယခုအခါ ဗုံးရှင်းလင်းရေးလုပ်ငန်းဆောင်ရွက်ရန် ဒေသခံများကို ဘေးကင်းရာအရပ်သို့ ယာယီရွှေ့ပြောင်းပေးခဲ့ရသည်။
ပြီးခဲ့သည့် ဒီဇင်ဘာ ၂၅ ရက်စ၍ အဆိုပါဗုံးတွေ့သည့်နေရာ၏ ၁ ဒသမ ၅ ကီလိုမီတာ ကျော်ပတ်ဝန်းကျင်အတွင်း နေထိုင်သူ အိမ်ထောင်စုပေါင်း ၃၂,၀၀၀၊ လူဦးရေပေါင်း ၅၄,၀၀၀ ကို ရွှေ့ပြောင်းခိုင်းခဲ့ရသည်။
ယင်းဒေသခံများကို ၎င်းတို့၏နေအိမ်များမှ နံနက် ၁၀ နာရီနောက်ဆုံးထား ထွက်ခွာကြရန် ထုတ်ပြန်ထားပြီး ယာယီတည်းခိုနေထိုင်ရေးစခန်းများကိုလည်း ဒေသတွင်း ကျောင်းများ၊အားကစားရုံများတွင် ဖွင့်လှစ်ပေးထားခဲ့သည်။
ယခုအခါ ယင်းမြို့တာဝန်ရှိသူများ၏ ဖေ့ဘွတ်ခ်အကောင့်တွင် ဖော်ပြချက်အရ ဗုံးကို အောင်မြင်စွာ စနက်တံဖြုတ်နိုင်ခဲ့ပြီဖြစ်ကြောင်းနှင့် အခြေအနေများမှ ပုံမှန်ပြန်ဖြစ်သွားခဲ့ပြီဟု သိရသည်။