ဒီဇင်ဘာ ၂၄ ။ ။ မလေးရှားနိုင်ငံ Johor ပြည်နယ် Pagoh မြို့အနီး တောင်-မြောက်အဝေးပြေးလမ်းမပေါ်တွင် အဝေးပြေးဘတ်စ်ကားတစ်စီး ဒီဇင်ဘာ ၂၄ ရက်က လျိုတစ်ခုထဲ ထိုးကျသွားခဲ့ရာ ၁၄ ဦးသေဆုံးပြီး ၁၆ ဦးထိခိုက်ဒဏ်ရာရရှိခဲ့သည်။
ယင်းဖြစ်စဉ်တွင် တာဝန်ရှိသူများ၏ အတည်ပြုချက်အရ သေဆုံးသူ ၁၄ ဦးရှိခဲ့ကြောင်းနှင့် ဒဏ်ရာရရှိသွားသူများထဲတွင် မြန်မာနိုင်ငံသားနှစ်ဦးလည်း ပါ၀င်နေသည်ဟု သိရပြီး အသေးစိတ် အချက်အလက်များကို မသိရသေးပေ။
နံနက် ၃ နာရီခွဲခန့်တွင် ဖြစ်ခဲ့သော ယင်းယာဉ်တိုက်မှုကြောင့် သေဆုံးသွားသူများထဲတွင် မွေးကင်းစကလေးငယ်တစ်ဦးအပါအဝင် ခရီးသည် ၁၃ ဦး၊ ဒရိုင်ဘာဖြစ်သူတို့ ပါ၀င်သည်ဟု Muar မြို့ရဲတပ်ဖွဲ့အကြီးအကဲ Azman Ayob က ပြောသည်။
လူ ၃၀ ထိ လိုက်ပါလာခဲ့သော အဆိုပါ ဘတ်စ်ကားသည် Johor Bahru မှ Kuala Lumpur သို့ သွားရောက်ခဲ့စဉ် ယခုကဲ့သို့ မတော်တဆမှုနှင့် ကြံုတွေ့ခဲ့ရခြင်းဖြစ်သည်။
ဒဏ်ရာရရှိသွားသူများထဲတွင် စင်ကာပူနိုင်ငံသားခြောက်ဦး၊ မလေးရှားနိုင်ငံသား ခုနစ်ဦးနှင့် မြန်မာနိုင်ငံသား နှစ်ဦးတို့ ပါ၀င်ကြောင်းနှင့် အခြားဒဏ်ရာရရှိထားသူ အမျိုးသမီးတစ်ဦးကို အတည်မပြုနိုင်သေးကြောင်း ကနဦးစုံစမ်းမှုများအရ သိရသည်။
မျက်မြင်တွေ့ရှိသူများ၏ အဆိုအရယင်းဘတ်စ်ကားမှာ မတော်တဆမှုမဖြစ်ခင် အရှိန်များနေခဲ့သည်ဟုလည်း ဆိုသည်။
