လာမည့်သီတင်းပတ်တွင် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က စင်ကာပူသို့ သွားရောက်ရန် ရှိကြောင်း နိုဝင်ဘာ ၂၇ ရက်၊ တရားဝင်ထုတ်ပြန်ချက်တစ်ရပ်အရ သိရသော်လည်း ခရီးစဉ်နှင့် ပတ်သက်ပြီး အသေးစိတ် ဖော်ပြခြင်း မရှိပေ။

စင်ကာပူဝန်ကြီးချုပ် လီရှန်လွန်း၏ ဖိတ်ကြားချက်အရ သွားရောက်ခြင်းဖြစ်ပြီး ဒီဇင်ဘာ ၁ ရက်တွင် ဖြစ်နိုင်ကြောင်း သတင်းရင်းမြစ်များထံမှ သိရသည်။

ဧပြီ ၁ ရက်က NLD အစိုးရ တက်လာပြီးနောက်ပိုင်း ပထမဆုံး အာရှခေါင်းဆောင်တစ်ဦးအနေဖြင့် မြန်မာနိုင်ငံသို့ လီရှန်လွန်း လာရောက်လည်ပတ်ခဲ့သည်မှစကာ မြန်မာနှင့် စင်ကာပူနိုင်ငံအကြား ဆက်ဆံရေး ကဏ္ဍသစ်တစ်ရပ် ဖွင့်လှစ်နိုင်ခဲ့သည်။

စင်ကာပူဝန်ကြီးချုပ် လီရှန်လွန်း၏ မြန်မာခရီးစဉ်အတွင်း ဒီဇင်ဘာ ၁ ရက်တွင် စတင်အသက်ဝင်မည်ဖြစ်သည့် နှစ်နိုင်ငံများ ပြည်သူများအနေဖြင့် ပတ်စ်ပို့ရှိရုံဖြင့် ရက် ၃၀ ဗီဇာကင်းလွတ်လည်ပတ်ခွင့်အား သဘောတူလက်မှတ်ရေးထိုးခဲ့သည်။

စင်ကာပူသည် တရုတ်နိုင်ငံပြီးလျှင် မြန်မာနိုင်ငံ၏ ဒုတိယအကြီးဆုံး ရင်းနှီးမြှပ်နှံသည့်နိုင်ငံဖြစ်ပြီး ၂၀၁၆ ခုနှစ်၊ အောက်တိုဘာအထိ အမေရိကန်ဒေါ်လာ ၁၅ ဒဿမ ၅၉၆ ဘီလီယံ ရင်းနှီးမြှပ်နှံထားသည်။

မြန်မာနှင့် စင်ကာပူသည် ၁၉၆၆ ခုနှစ်မှစကာ သံတမန်ဆက်ဆံရေး ထူထောင်ခဲ့သည်။