နိုဝင်ဘာ ၁၃ ။ ။ ဂျာမနီ နှင့် ဆွစ်ဇာလန်နိုင်ငံတို့တွင် ငှက်တုပ်ကွေး ဗိုင်းရပ်စ်ပိုး ကူးစက်မှု ဖြစ်စဉ်များ တွေ့ရှိထားခဲ့ရပြန်ပြီဖြစ်ကြောင်း သက်ဆိုင်ရာအာဏာပိုင်များက ပြောသည်။
H5N8 ဗိုင်းရပ်စ်ပိုးကို သြစတြေးလျ၊ ဟန်ဂေရီ၊ ပိုလန်၊ နယ်သာလန်၊ ဒိန်းမတ်နှင့် ခရိုအေးရှားတို့တွင် တွေ့ရှိထားခဲ့ရခြင်းဖြစ်သည်။
ယခုအခါ ဂျာမနီနိုင်ငံ Schleswig-Holstein ပြည်နယ်မှာ မွေးမြူရေးခြံတစ်ခု၌ အဆိုပါ ငှက်တုပ်ကွေးကူးစက်မှုဖြစ်စဉ်တစ်ခု တွေ့ရှိထားခဲ့ရကြောင်းနှင့် ယခုအခါ ယင်းခြံအတွင်းမှ ကြက်ကောင်ရေ ၃၀,၀၀၀ ကို သုတ်သင်သွားတော့မည်ဖြစ်ကြောင်း သိရသည်။ အလားတူ အကျယ်အဝန်း ၃ စတုရန်းကီလိုမီတာခန့် ကိုလည်း ပိတ်ပင်တားမြစ်ထားလိုက်ပြီ ဖြစ်ကြောင်း ပြည်နယ်စိုက်ပျိုးရေးဝန်ကြီးက ပြောသည်။
အလားတူ နိုဝင်ဘာလ ၁၂ ရက်နေ့က ဆွစ်ဇာလန်နိုင်ငံရှိ Lake Geneva ကန်တစ်လျှောက် အဆိုပါ ဗိုင်းရပ်စ်ပိုးကြောင့် ငှက်များသေဆုံးနေခဲ့ကြောင်း သက်ဆိုင်ရာက အတည်ပြုထားခဲ့သည်။
ယင်းအတွက်ကြောင့် သက်ဆိုင်ရာ နိုင်ငံများအနေဖြင့် ယင်းငှက်တုပ်ကွေးပိုး ပြည်တွင်းရှိ မွေးမြူရေးလုပ်ငန်းများအတွင်း ဆက်လက်ကူးစက်ပြန့်ပွားသွားခြင်းမရှိစေရန် ကြိုတင်ကာကွယ်ရေးလုပ်ငန်းများကို လုပ်ဆောင်နေလျက်ရှိသည်။
