မြိတ်၊နိုဝင်ဘာ-၁၀ ။ ။ တနင်္သာရီတိုင်းဒေသကြီး ကျွန်းစုမြို့နယ်၊ ကဘင်ကျေးရွာအုပ်စု၊ မိုင်းသွေးရွာတွင် ငွေကျပ် ၁ သောင်း တန်ငွေစက္ကူ အတု(၁၂၄)ရွက် သုံးစွဲခဲ့သူတစ်ဦး ဖမ်းဆီးရမိခဲ့ကြောင်း နိဝင်ဘာ (၁၀)တွင် မြိတ်ခရိုင်ရဲစခန်းမှ သိရသည်။
နိဝင်ဘာ ၉ ရက်က မိုင်းသွေးကျေးရွာဒေသခံ ဦးကျော်နိုင်ထွန်းထံမှ လှေဝယ်ယူရန်အတွက် လှေဖိုးပေးချေရာတွင် ယင်း ငွေစက္ကူ များ အသုံးပြုပေးချေခဲ့သည့်အတွက် အဆိုပါငွေစက္ကူများသည် အတုဟုယူဆသဖြင့် ကံမော်နယ်မြေရဲစခန်း သို့ အကြောင်းကြားခဲ့၍ ယင်းငွေတုသုံးစွဲခဲ့သူကို စစ်ဆေးအရေးယူခဲ့ကြောင်း သိရသည်။
သက်သေများရှေ့၌ ငွေစက္ကူအတုဟုယူဆရသော ၁ သောင်းကျပ်တန် (၁၂၄)ရွက်ကို သိမ်းဆည်းခဲ့ပြီး လက်ရှိတွင် ကံမော်နယ်မြေရဲစခန်းမှ (ပ)၄၃/၂၀၁၆ မြန်မာနိုင်ငံဗဟိုဘဏ် ဥပဒေ ပုဒ်မ ၁၀၅/၁၀၆ ဖြင့် အမှုဖွင့်စစ်ဆေး လျက်ရှိကြောင်း သိရသည်။
အဆိုပါ ငွေစက္ကူ အတုဟု ယူဆရသော ၁ သောင်းကျပ်တန်များ သုံးစွဲခဲ့သူသည် ထိုင်းနိုင်ငံ၊ ရနောင်းမြို့တွင် နေထိုင် သူဖြစ်ပြီး၊ ယခင်က ကျွန်းစုမြို့နယ် သဘောင်းတောင်ကျေးရွာတွင် နေထိုင်ခဲ့ဖူး သူဖြစ်ကြောင်း သိရသည်။
