ဘန်ကောက်၊ စက်တင်ဘာ ၂၁ ။ ။ ထိုင်းနိုင်ငံတွင် ရွှေ့ပြောင်းသူများအခွင့်အရေး တက်ကြွလှုပ်ရှားသူ ဗြိတိန်နိုင်ငံသား အန်ဒီဟောသည် အသရေဖျက်မှုနှင့် ကွန်ပြူတာရာဇဝတ်မှုများတွင် အပြစ်ရှိကြောင်း တွေ့ရှိသည်။
ယင်းအပြစ်များအတွက် ထောင်ဒဏ်သုံးနှစ်နှင့် ငွေဒဏ် ထိုင်းဘတ်ငွေ တစ်သိန်းခွဲ(အမေရိကန်ဒေါ်လာ ၄၃၀၀) ချမှတ်သည်။
၂၀၁၃ ခုနှစ်က Natural Fruit Company သည် အလုပ်သမားများအပေါ် မဖွယ်မရာကျုးလွန်နေသည်ဟု ဖင်လန်နိုင်ငံက စောင့်ကြည့်ရေးအဖွဲ့ Finnwatch က စွပ်စွဲမှုတွင် ဟောကလည်း ပါဝင်ကူညီခဲ့ခြင်းဖြစ်သည်။
ဟောအပေါ် ပြစ်ဒဏ်ချမှတ်ခြင်းကြောင့် တုန်လှုပ်ခြောက်ခြားစရာကောင်းကြောင်း Finnwatch က ပြောသည်။
“အန်ဒီဟောက ရွှေ့ပြောင်းလှုပ်ရှားသူများအခွင့်အရေးအတွက် လှုံ့ဆော်ပြောဆိုပေးနေတာကြောင့် ကြားကဓားစာခံအနေနဲ့ ပြစ်ဒဏ်ခံလိုက်ရတာပဲဖြစ်တယ်။”ဟု ယင်းအဖွဲ့ အမှုဆောင်ဒါရိုက်တာ ဆွန်ဂျာဗာတီယာလာက ပြောသည်။
“ထိုင်းနိုင်ငံမှာ လွတ်လပ်စွာ ထုတ်ဖော်ပြောဆိုခွင့်အတွက် ဝမ်းနည်းစရာနေ့တစ်နေ့ပါပဲ။ ဒီလို အန်ဒီဟောကို ထောင်ချလိုက်တာကြောင့် လူ့အခွင့်အရေးလှုပ်ရှားတွေ၊ ကုမ္ပဏီတွေရဲ့ အလွဲသုံးစားလုပ်ခံနေရသူတွေ အသံမထွက်ရဲအောင် ဖြစ်လာမှာ စိုးရိမ်မိတယ်။”ဟု ၎င်းက ပြောခဲ့သည်။
