မြန်မာနိုင်ငံသို့ အလည်အပတ်ရောက်ရှိခဲ့သော ဗြိတိန်ဝန်ကြီးတစ်ဦးဖြစ်သည့် ရော်ရီစတီးဝပ်က မြန်မာနိုင်ငံ၏ အနာဂတ်နှင့် ပတ်သက်ပြီး ကောင်းမွန်သော အမြင်သဘောထားရှိနေကာ စိန်ခေါ်မှုပြဿနာများစွာကို ပြေလည်အောင် အစိုးရအနေဖြင့် ဖြေရှင်းနေရစဉ်အချိန်အခါ၌ ပြည်သူများအနေဖြင့် စိတ်ရှည်ရှည်ထားပေးဖို့ကို တိုက်တွန်းထားသူပါ။

မဇ္ဈိမ က သီးသန့် အင်တာဗျုးရာ၌ ဗြိတိန် နိုင်ငံတကာဖွံ့ဖြိုးရေးဝန်ကြီးဌာန ဝန်ကြီးဖြစ်သူ ရော်ရီစတီးဝပ်က သြဂုတ် ၂၇ ရက်တွင် အဆုံးသတ်မည့် ၎င်း၏ သုံးရက်တာ မြန်မာနိုင်ငံခရီးစဉ်အတွင်း မြင်တွေ့သိရှိခဲ့သည့် သဘောထားများအား ဖြေကြားခဲ့သည်။

ရော်ရီစတီးဝပ်သည် ဇူလိုင်လက စတင်ဝန်ကြီးတာဝန်ထမ်းဆောင်သည်။ ယခုခရီးစဉ်သည် ဝန်ကြီးအဖြစ် မြန်မာနိုင်ငံသို့ တရားဝင်လာရောက်ခြင်းဖြစ်သည်။ ယခင်က သုံးကြိမ် လာရောက်ခဲ့ဖူးသူလည်းဖြစ်သည်။ သူ့၏ ဖခင်မှာ ၁၉၅၈ ခုနှစ်က ရန်ကုန်ရှိ ဗြိတိသျှသံရုံးတွင် ဒုတိယအတွင်းဝန်အဖြစ် တာဝန်ထမ်းဆောင် သွားခဲ့သူဖြစ်သည်။

အခု မြန်မာခရီးစဉ်မှာ ခင်ဗျားအနေနဲ့ အဓိကဘာတွေများ ပြောချင်ပါသလဲ။

မြန်မာသမိုင်းစဉ်တစ်လျှောက်မှ ခုချိန်က အမှန်စိတ်လှုပ်ရှားစရာကောင်းတဲ့ အချိန်လို့ ကျွန်တော်တော့ ထင်ပါတယ်။ မြန်မာပြည်သူတွေရဲ့ အကောင်းမြင်စိတ်ထားနဲ့ ကာယဉာဏစွမ်းအားတွေက ကျွန်တော်ကို သဘောကျစေတယ်။ ဒါကြောင့် အဓိကနယ်ပယ်သုံးရပ်အပေါ် ကျွန်တော်တို့ ပစ်မှတ်ထားရမှာဖြစ်တယ်။ ပထမက ကျွန်တော်တို့ ပြောပြောနေတဲ့ ကျန်းမာရေးနဲ့ ပညာရေးဆိုတဲ့ လူစွမ်းအားအရင်းအမြစ်ဖွံ့ဖြိုးရေး၊ ဒုတိယက အသက်မွေးဝမ်းကျောင်းပညာပေါ့။ ဒါက စီးပွားရေးပါပဲ။ တတိယအချက်ကတော့ အုပ်ချုပ်ရေးနဲ့ လုံခြုံရေးတို့ပါပဲ။

ကျန်းမာရေးနဲ့ ပညာရေးကဏ္ဍအကြောင်း ပြောပေးပါ။ ဒီကဏ္ဍာတွေအတွက် ဗြိတိန်အနေနဲ့ ဘာတွေများ လုပ်ဆောင်ပေးနေပါသလဲ။

ကျန်းမာရေးကဏ္ဍာအတွက် ပထမဆုံးပြောလိုတာက တီဘီပါ။ အဓိက ဆေးယဉ်ပါး တီဘီပဲ။ ကျွန်တော်တို့က စီမံကိန်းနှစ်ရပ်နဲ့ ထောက်ပံ့ပေးနေတယ်။ တစ်ခုက ဆေးယဉ်ပါး တီဘီဖြစ်သူတွေ ဆေးညွှန်းအတိုင်း ဆုံးတဲ့အထိ ဆေးပတ်လည်အောင်သောက်ဖို့ သေချာဂရုစိုက်လုပ်ဆောင်တယ်။ နောက်တစ်မျိုးကတော့ နည်းပညာ။ တီဘီ ရှိမရှိ သေချာစေတဲ့ ရင်ဘတ်ဓာတ်မှန်ရိုက်ပေးတာတွေပါ။ ငှက်ဖျားရောဂါအတွက်ဆို ဥပမာ ကျွန်တော်တို့ နောက်ထပ် ခြင်ထောင်နှစ်သန်း လှူဒါန်းထောက်ပံ့ထားတယ်။ ပြည်သူ ထောင်ပေါင်းများစွာကိုလည်း ကုသပေးနေတယ်။ ရာပေါင်းများစွာ အတွက်လည်း စမ်းသပ်ကိရိယာတွေ ထောက်ပံ့ပေးထားတယ်။

ပညာရေးအကြောင်း ပြောပေးပါဦး။

ပညာရေးမှာ မတူတဲ့ အစီအစဉ်နှစ်ရပ်နဲ့ လုပ်တယ်။ ကျွန်တော်အတွက် အားအပေးချင်ဆုံးက ဆရာအတတ်သင် ကျောင်းမှာ အင်္ဂလိပ်ဘာသာစကား လေ့ကျင့်သင်ကြားပေးတာပဲဖြစ်တယ်။ ဆရာဆရာမတွေ အတွက်ပါ။ လက်ရှိမှာ မော်လမြိုင်ပညာရေး ကောလိပ်တစ်ခုမှာ အင်္ဂလိပ်စာ ဘာသာစကား သင်ကြားမှုအပြင် သင်ကြားနည်းစနစ်တွေ အတွေ့အကြုံကြွယ်ဝတဲ့ ဗြိတိသျှလူငယ်နှစ်ဦး ပေးပို့ထားပါတယ်။

ဗြိတိန်အစိုးရအတွက် အစိုးရသစ်နဲ့ အစိုးရဟောင်းနှစ်ရပ်မှာ လက်တွဲလုပ်ဆောင်ရတာ ဘယ်လိုများ ကွာခြားမှုရှိပါသလဲ။

အတော်လေးကွာတာပေါ့။ ဒီမိုကရေစီနည်းကျ ရွေးကောက်ခံရတဲ့ အစိုးရတစ်ရပ်နဲ့ဆို ကျွန်တော်တို့က ပိုပြီးနီးကပ်စွာ လက်တွဲလုပ်နိုင်တယ်။ ကျွန်တော်တို့ လှူဒါန်းထောက်ပံ့မှုတွေမှာလည်း ကျွန်တော်တို့ ပူးပေါင်းလုပ်နိုင်တယ်။ သမ္မတ၊ အစိုးရသစ်ရဲ့ နိုင်ငံတော်အတိုင်ပင်ခံပုဂ္ဂိုလ်တို့ရဲ့ ဦးစားပေးကိစ္စရပ်ကို ကျွန်တော်တို့ သိရှိနာကြားနိုင်ပြီး ဗြိတိန်အစိုးရနဲ့ မြန်မာအစိုးရတို့ အချင်းချင်းကြား ကောင်းကောင်း အလုပ်လုပ်နိုင်တယ်။

ဗြိတိန်အစိုးရရဲ့ ဖွံ့ဖြိုးမှုပရိုဂရမ်တွေရဲ့ တိုးတက်မှုတွေကိုရော ခင်ဗျားအမြင်ဘယ်လိုရှိလဲ။

အမှန်တကယ်အကျိုးရှိတာ တော်တော်များများ လုပ်ဆောင်ပေးနိုင်တယ်လို့ ကျွန်တော်တော့ထင်ပါတယ်။ ဥပမာအနေနဲ့ဆို တီဘီနဲ့ ငှက်ဖျားရောဂါလို ကျန်းမာရေးကဏ္ဍမှာပေါ့။ ကျွန်တော်တို့ တော်တော်လေးကို လုပ်ထားနိုင်ပါတယ်။ အဲဒီမှာ တော်တော်လေး ကူညီဆောင်ရွက်ပေးထားတယ်။ နောက်ပြီး ဒီနိုင်ငံမှာ အပြုစိတ်ထားနဲ့ ကာယဉာဏာစွမ်းပကားလည်း အတော်လေးရှိတယ်လို့ ထင်တယ်။ ဘာကြောင့်လည်းဆိုတော့ ကမ္ဘာ့တစ်ခြားနေရာတွေက လူတွေက နှစ်တွေများစွာ အကူအညီတွေကို ယူနေတယ်။ ပြီးတော့ ကိုယ်ထူကိုယ်ထ လုပ်ဖို့ နည်းပါးနေတာ ဖြစ်နိုင်တယ်။ ဒီမှာကတော့ ကိုယ်တိုင်အားထုတ်မှုနဲ့ အပြုသဘောထားက အမှန်ရှိနေတယ်။

မြန်မာအစိုးရသစ်အပေါ် အတော်လေးကို မျှော်လင့်နေကြတယ်။ ရက် ၁၀၀ စီမံချက်အပြီး အစိုးရသစ်ရဲ့ စွမ်းဆောင်ရည်အပေါ် ခင်ဗျားရဲ့ အမြင်သဘောထား ဘယ်လိုရှိပါသလဲ။

အစိုးရသစ်ရဲ့ အကြီးမားဆုံးစွမ်းပကားလို့ပြောရမှာက ဒီမိုကရေစီနည်းကျ အုပ်ချုပ်ရေးပါပဲ။ တနည်းပြောရရင် ခုအစိုးရက ရွေးကောက်ခံအစိုးရပါ။ ပွင့်လင်းမြင်သာတဲ့ အုပ်ချုပ်ရေးပါ။ ပြည်သူအသံကို နားထောင်မယ့် အစိုးရပါပဲ။ ဒါကို ဥပမာပေး ပြောရရင် လက်ရှိလုပ်ဆောင်နေတဲ့ ငြိမ်းချမ်းရေးဆွေးနွေးပွဲတွေကို ကြည့်ရင်သိပါတယ်။ ကိုဖီအာနန်ကို ရခိုင်ပြည်နယ်ကော်မရှင်မှာ ခန့်အပ်တာ တွေ့ရတယ်။ ဒါက စီမံအုပ်ချုပ်တာ၊ ပြည်သူ့အသံနားထောင်တာဖြစ်တယ်။

နိုင်ငံက နိုင်ငံရေးသမားတစ်ဦးပါ။ ဗြိတိန်နိုင်ငံရဲ့ ဝန်ကြီးတစ်ဦးလည်းဖြစ်ပါတယ်။ ပြီး တစ်ခုက ကျွန်တော်ပြောလိုတာ အချိန်လိုပါတယ်။ နည်းနည်းလောက် သည်းခံစိတ်ရှည်ဖို့ပါ။ ဘယ်ဒီမိုကရေစီ နိုင်ငံမှာမဆို ပြည်သူတွေက သိပ်စိတ်မရှည်တတ်ကြဘူး။ အမြဲ မြန်မြန်ဆန်ဆန်နဲ့ ပြီးမြောက်လိုကြတယ်။ ဒါပေမယ့် မြန်မာနိုင်ငံမှာက လုပ်စရာတွေ အများကြီးရှိနေတယ်။ စိန်ခေါ်မှုတွေ မျိုးစုံရှိနေတယ်။ ကျွန်တော်ပြောလိုတာ ကျွန်တော်တို့ ခုအစိုးရကို အချိန်တစ်ချို့ပေးပြီး နည်းနည်းလောက် စိတ်ရှည်ဖို့ လိုတယ်ဆိုတာပါပဲ။

ငြိမ်းချမ်းရေးညီလာခံအပေါ် ခင်ဗျားရဲ့ အမြင်ကိုလည်း ပြောပေးပါဦး။

အတော်စိတ်ဝင်စားစရာကောင်းတဲ့ လမ်းကြောင်းပေါ်မှာ ရှိနေတယ် ထင်ပါတယ်။ ဒါပေမယ့် ခက်ခဲမှုတော့ ရှိတယ်။ ပဋိပက္ခနှစ်ပေါင်းများစွာ ဖြစ်ပြီးနောက်မှာ သာမန်အခြေအနေပြန်ရောက်ဖို့ သွားရာလမ်းက အမြဲကို အလွန်ပဲ ခက်ခက်ခဲခဲနိုင်ပါတယ်။ ဘာကြောင့်လည်းဆိုတော့ ပြည်သူတွေတော်တော်များများ နာကျင်ကြရလို့ပဲဖြစ်တယ်။ ခုက အမှန်တကယ် အစမ်းသပ်ခံနိုင်တဲ့ ငြိမ်းချမ်းရေးဆီသွားနေတယ်။ အာလုံးအတွက် လိုအပ်တာက ယုံကြည်မှုကနေ တည်ဆောက်သွားဖို့ပါပဲ။

ဖြည့်စွက်ပြောစရာများ ရှိပါသလား။

မြန်မာနိုင်ငံအကြောင်း၊ မြန်မာပြည်သူတွေရဲ့ အကောင်းမြင်တတ်တဲ့ စိတ်ထား၊ အံ့သြဖွယ်အနာဂတ်ရှိနေတဲ့ မြန်မာနိုင်ငံ ဒီလိုအကြောင်းတွေ ပြောရလို့ ကျွန်တော် ကျေနပ်ပါတယ်။ မြန်မာနိုင်ငံက အမြန်ဖွံ့ဖြိုးနေတဲ့ စီးပွားရေး ရှိနေပါတယ်။ လူဦးရေနှုန်းထားကလည်း နိုင်ငံအကျယ်အဝန်းယှဉ်ရင် ကောင်းမွန်ပါတယ်။ ပြီးတော့ လှပတဲ့ နေရာဒေသတစ်ခုပါ။

ဥပမာအနေနဲ့ ပြောချင်တယ်။ ရန်ကုန်မြို့တော်ဟောင်းကို ကြည့်ရှုမြင်တွေ့ရတာကို ကျွန်တော် မြတ်နိုးတယ်။ ခင်ဗျားတို့အနေနဲ့ ဒါကို ကာကွယ်လိမ့်မယ်လို့ ကျွန်တော် အတော်လေးမျှော်လင့်ထားပါတယ်။ ဘာကြောင့်လည်းဆိုတော့ ကမ္ဘာ့အနှံ့က လူတွေက ဒီကိုလာလည်ရင် ခင်ဗျားတို့ရဲ့ သမိုင်း၊ ခင်ဗျားတို့ရဲ့ အမွေအနှစ်တွေကို အံ့သြချီးကျုးကြလိမ့်မယ်။ ခင်ဗျားတို့တွေ ဖွံ့ဖြိုးမှုခေတ်မီအောင် ဖော်ဆောင်တာနဲ့အတူ အတိတ်က အကောင်းဆုံးအရာတွေကို မပျောက်ပျက်သွားအောင် ကာကွယ်ပြီး သမိုင်းတန်ဖိုး၊ အတိတ်တန်ဖိုးကို ထိန်သိမ်းထားမယ်လို့ ကျွန်တော် မျှော်လင့်ပါတယ်။