ဇူလိုင် ၂၆၊ အမေရိကန် ။ ။ တိုရွန်တိုအသင်းက ဒီစီယူနိုက်တက်အသင်းကို ၄ ဂိုး ၁ ဂိုးဖြင့် အနိုင်ရသည့်ပွဲတွင် တိုရွန်တိုတိုက်စစ်မှူး ဂျီယိုဗင်ကိုသည် ဖရီးကစ်မှ သွင်းဂိုးနှစ်ဂိုးသွင်းယူနိုင်ခဲ့သည့် အတွက် ဒေးဗစ်ဘက်ခမ်၏ မေဂျာလိဂ် ဖရီးကစ်စံချိန်ကို ကျော်လွန်သွားခဲ့ပြီ ဖြစ်သည်။
အင်္ဂလန်အသင်းခေါင်းဆောင်ဟောင်း ဒေးဗစ်ဘက်ခမ်သည် အယ်လ်အေဂလက်ဆီအသင်းတွင် ကစားခဲ့စဉ်က ဖရီးကစ်မှ ခြောက်ဂိုးအထိသွင်းယူထားသူဖြစ်သည်။ ယခု ဂျီယိုဗင်ကိုမှာ ဖရီးကစ်မှ ၇ ဂိုးအထိသွင်းယူထားနိုင်ပြီ ဖြစ်သည်။
ဂျူဗင်တပ်စ်တိုက်စစ်မှူးဟောင်း ဂျီယိုဗင်ကိုသည် ဖရီးကစ်ကန်သွင်းမှုတွင် ဂိုးအများဆုံးသွင်းနိုင်သူဖြစ်သော်လည်း ရာခိုင်နှုန်းများအရ အကောင်းဆုံးဖရီးကစ်ကန်သွင်းနိုင်သူတော့ မဟုတ်ပေ။ ဂျီယိုဗင်ကိုသည် ထိုဖရီးကစ် ၇ ဂိုးရရန် ဖရီးကစ်ပေါင်း ၇၆ ကြိမ် ကန်သွင်းခဲ့ရသည်။ ထို့ကြောင့် ၎င်း၏ ဖရီးကစ်ဂိုးရရှိမှု ရာခိုင်နှုန်းမှာ ၉.၂ ရာခိုင်နှုန်းသာ ရှိသည်။
မွန်ထရီရယ်အသင်းမှ ချယ်လ်ဆီးတိုက်စစ်မှူးဟောင်း ဒရော့ဂ်ဘာမှာ ဖရီးကစ် ၂၂ ကြိမ် ကန်သွင်းရာတွင် ငါးဂိုးရရှိထားသည့်အတွက် ၎င်း၏ဖရီးကစ်ဂိုးရရှိမှု ရာခိုင်နှုန်းမှာ ၂၂.၇ ရာခိုင်နှုန်းဖြစ်သည်။ ဒေးဗစ်ဘက်ခမ်မှာမူ ၁၃ ရာခိုင်နှုန်းဖြစ်ပြီး ၄၆ ကြိမ်ကန်သွင်းကာ ခြောက်ဂိုးရရှိခဲ့သည်။
