မုံရွာ၊ ဇူလှိုင် ၆ ။ ။ ချင်းတွင်းမြစ်အထက်ပိုင်းရှိ ခန္တီးမြို့တွင် မြစ်ရေဝင်ရောက်လာမှုကြောင့် ရပ်ကွက်နှင့် ကျေးရွာတစ်ချို့ ပြောင်းရွှေ့နေရကြောင်း ခန္တီးမြို့ဒေသခံ ကိုအောင်ဆန်းမြင့်က မဇ္ဈိမကို ပြောသည်။
ခန္တီးမြို့ ရပ်ကွက်(၃)ခုနှင့် ကျေးရွာ(၇)ရွာတို့တွင် ရေဝင်ရောက်လျက်ရှိပြီး ရေတဖြည်းဖြည်း တက်လျက်ရှိရာ စိုးရိမ်ရေမှတ် ၁၃၆၀စင်တီမီတာကို ကျော်လွန်၍ ၁၄၁၈ စင်တီမီတာသို့ ရောက်ရှိနေပြီးဖြစ်ကြောင်း ဇူလိုင် ၆ ရက် ညနေ ၄ နာရီခွဲအချိန်ခန့်က ပြောသည်။
"စိုးရိမ်ရေမှတ်ကျော်နေပြီ၊ ရေကတော့ တက်နေဆဲပဲ၊ တစ်ချို့တွေ ဘေးလွတ်ရာ ပြောင်းရွေ့နေရပြီ၊ မနေ့ကရေစဝင်တာ၊ အတက်မြန်နေတယ်၊ ကိုယ့်အစီအစဉ်နဲ့ကိုယ် ဘေးလွတ်ရာရွှေ့နေကြတာတွေ မြင်တွေ့နေရတယ်။" ဟု ၎င်းက ဆိုသည်။
အထက်ပိုင်းရှိ ခန္တီးမြို့နှင့် ဟုမ္မလင်းမြို့တို့ တွင် စိုးရိမ်ရေမှတ်ကျော်လွန်နေပြီး ချင်းတွင်းမြစ်အောက်ပိုင်းရှိ ဒေသများတွင် ရေတိုးလာဖွယ်ရှိကာ ရေကြောင်းသွားလာသူများ အထူးဂရုစိုက်ပါရန် စစ်ကိုင်းတိုင်းဒေသကြီး အစိုးရအဖွဲ့ မှ ထုတ်ပြန်ထားသည်။
