ဇူလိုင် ၆ ။ ။ ကမ္ဘောဒီးယားနိုင်ငံရှိ ထင်ရှားကျော်ကြားသော အန်းကောဝပ် ဘုရားကျောင်းတော်ဝင်းအတွင်းသို့ အဝတ်အစားမလုံမခြုံ ဝတ်ဆင်ကာ လာရောက်လည်ပတ်သည့် ခရီးသွားများကို လာမည့် သြဂုတ်လမှစ၍ အဝင်ခံတော့မည်မဟုတ်ကြောင်း အာဏာပိုင်များက ထုတ်ပြန်လိုက်သည်။
အန်းကောဝပ် ဘုရားကျောင်းဥယျာဉ်သို့ လာရောက်ရန် စီစဉ်ထားသော ခရီးသွားဧည့်သည်များအနေဖြင့် အဝတ်အစားများကို သင့်တင့်လျောက်ပတ်စွာ ဝတ်ဆင်လာကြရန် အဆိုပါ ရှေးဟောင်း ယဉ်ကျေးမှုနယ်မြေကို စီမံခန့်ခွဲပေးနေသော အဖွဲ့မှ ဒုတိယအကြီးအကဲ လောင်ကိုဆယ်လ် က ပြောကြားသွားသည်။ ယင်း ဘုရားကျောင်းဝင်းသို့ ဝင်ရန် လက်မှတ်ဝယ်ယူချိန်တွင် သရုပ်ပျက်ဝတ်စားထားသူများကို လက်မှတ်မရောင်းရန်လည်း အရောင်းဌာနကို ညွှန်ကြားထားမည်ဟု ဆိုသည်။
" ဘယ် နိုင်ငံခြား ခရီးသွားကိုမဆို မလုံ့တလုံ ဝတ်စားလာမယ်ဆိုရင်တော့ ဒီဘုရားကျောင်းထဲကို ဝင်ခွင့်ပေးတော့မှာမဟုတ်တော့ပါဘူး၊ ၂၀၁၆ သြဂုတ်လ ၄ ရက်ကနေ စပြီးတော့ ကြပ်မတ်သွားတော့မှာပါ" ဟု ကိုဆယ်လ်က ပြောကြားသွားသည်။
သရုပ်ပျက်အဝတ်အစားများ ဝတ်ဆင်လာခြင်းက ကမ္ဘောဒီးယား၏ ယဉ်ကျေးမှု၊ ရိုးရာအစဉ်အလာနှင့် အမျိုးသမီးထု၏ အိန္ဒြေကို ပျက်ပြားစေသည်ဟုလည်း ၎င်းက ထပ်လောင်းပြောကြားသွားသည်။
