မန္တလေး ၊ ဇွန် ၂၀ ။ ။ မန္တလေးမြို့ ချမ်းမြသာစည်မြို့နယ်အတွင်းရှိ ဘုန်းကြီးကျောင်း(၂)ကျောင်းမှ လိုင်စင်မဲ့ကား ၃၆ စီးအား ဇွန်လ ၂၀ ရက် နံနက် ပိုင်းက ဖမ်းဆီးရမိခဲ့ကြောင်း ချမ်းမြသာစည်မြို့နယ် ရဲတပ်ဖွဲ့မှ ခေတ္တမြို့နယ်မှူး ဒုရဲမှူး မြင့်ဇော်နိုင်က ပြော သည်။
"သတင်းရတာက မနေ့ကတည်းကပဲ။ ကားတွေက ဘုန်းကြီးကျောင်းထဲမှာဆိုတော့ မြို့နယ် သံဃာ့နာယကတို့ စည်းကမ်း ထိန်းသိမ်းရေးအဖွဲ့တို့နဲ့ ပူးပေါင်းဖမ်းစီးရမှာဖြစ်တဲ့ အတွက် ဒီနေ့မှ ဖမ်းဆီးနိုင်ခဲ့တာပါ။ ဒီကားတွေကို ကျွန်တော် ကိုယ်တိုင်ပဲ ဝယ်မယ့်ပုံစံနဲ့ သွားရောက်ကြည့်ရှုခဲ့ပြီး ဖမ်းဆီးခဲ့တာပါ" ဟု ဒုရဲမှူးမြင့်ဇော်နိုင် က ပြောသည်။
အဆိုပါ ကားများထဲမှ ကား ၂၇ စီးအား ၇၈ လမ်း ဦးပွားဂုံးကျော် အနီးရှိ အောင်မြေရွှေဘုံဘုန်းကြီးကျောင်း အတွင်းမှ နံ နက် ၈ နာရီခန့် က ဖမ်းဆီးရမိခဲ့ပြီး ကျန် ၉ စီးကို နေ့လည် ၁၂ နာရီခန့်တွင် လေယာဉ်ကွင်းဟောင်း အနီးရှိ သာသနာ့ ရံ သီ အတုလကာရီ ကျောင်းတိုက်အတွင်းမှ ဖမ်းဆီးရမိခဲ့ခြင်းဖြစ်ကြောင်း သိရသည်။
ဖမ်းဆီးရမိသော ကားအမျိုးအစားများသည် အိမ်စီးကား အမျိုးအစားများဖြစ်ကြပြီး ပိုင်ရှင်မှာ မြဝတီမြို့ဘက်မှ ဦးကိုကြီး ဆိုသူဖြစ်ကြောင်း ဒုရဲမှူးမြင့်ဇော်နိုင်က ဆိုသည်။
လက်ရှိတွင် ဖမ်းဆီးရမိသည့် တရားခံမှာ ပိုင်ရှင်ဦးကိုကြီး၏ သားဖြစ်သူ ရဲထက်အောင်နှင့် အလုပ်သမားတစ်ဦးဖြစ်ကာ ကားများအား ချမ်းမြသာစည်မြို့နယ် ရဲတပ်ဖွဲ့မှူးရုံးတွင် ဖမ်းဆီးထားပြီး ဆက်လက်စစ်ဆေးမှုများ ဆောင်ရွက်လျှက် ရှိသည်။
