ကာရက်ကက်စ်၊ ဧပြီ၊ ၂၇ ။ ။ ဗင်နီဇွဲလားနိုင်ငံတွင် လျှပ်စစ်ဓါတ်အားမလုံလောက်သဖြင့် အစိုးရဝန်ထမ်းများကို တစ်ပတ်လျှင် ၂ ရက်သာ အလုပ်ဆင်းရန် အာဏာပိုင်များက ညွှန်ကြားလိုက်သည်။
ဗင်နီဇွဲလားတွင် မိုးခေါင်ရေရှားပြီး လျှပ်စစ်ဓါတ်အားလိုအပ်ချက်ပြည့်မီအောင်မရရှိခြင်းကို ယာယီဖြေရှင်းသည့် အစီအမံတစ်ရပ်အနေဖြင့် အစိုးရက သူ၏ဝန်ထမ်းများကို လျှပ်စစ်မီးပြဿနာပြန်လည်ပြေလည်သည်အထိ တစ်ပတ်လျှင် တနင်္လာ၊အင်္ဂါ ၂ ရက်သာ အလုပ်ဆင်းရန်ညွှန်ကြားလိုက်ခြင်း ဖြစ်သည်။
ဗင်နီဇွဲလားတွင် မိုးခေါင်ရေရှားမှုကို ဆိုးဆိုးရွားရွားခံစားနေရပြီး အဓိကရေအားလျှပ်စစ်ဆည်ကြီးတွင် ရေသိသိသာသာ လျော့နည်းသွားခြင်းကြောင့် လျှပ်စစ်မီးအတွက် အခက်အခဲဖြစ်လျှက်ရှိသည်။
အတိုက်အခိုက်များကမူ အစိုးရ၏ယခုအစီအမံကို မယောင်ရာဆီလူး စီမံခန့်ခွဲမှုဟု ဝေဖန်လျှက်ရှိသည်။
နိုင်ငံတဝမ်းရှိ အစိုးရဝန်ထမ်း ၂ သန်းခန့်အပေါ်သက်ရောက်မှုရှိမည့် အဆိုပါအစီအမံကို ဗင်နီဇွဲလားဒုသမ္မတ က နိုင်ငံပိုင်ရုပ်သံလိုင်းမှတဆင့် ကြေညာသွားခဲ့ခြင်း ဖြစ်သည်။
'' မဖြစ်မနေလုပ်ရမယ့်အလုပ်တွေအတွက်ကလွဲပြီး ဗုဒ္ဓဟူး၊ ကြာသာပတေး နဲ့ သောကြာနေ့ တွေမှာ အစိုးရဌာနတွေမှာ လုပ်ငန်းဆောင်တာတွေ ဆောင်ရွက်ခြင်းရှိမှာ မဟုတ်ပါဘူး '' ဟု ဒုသမ္မတ အရစ္စတိုဘူလိုအစ္စတူရစ်ဇ် က ပြောကြားသွား ခဲ့သည်။
သမ္မတ နီကိုးလက်စ်မာရူဒိုသည် လျှပ်စစ်သုံးစွဲမှုကိုလျှော့ချရန်အတွက် ဧပြီ နှင့် မေလများအတွင်းတွင် အပတ်စဉ် သောကြာနေ့တိုင်းကို ရုံးပိတ်ရက်အဖြစ် သတ်မှတ်ကြေညာပြီး ဖြစ်သည်။
ဗင်နီဇွဲလားအနေဖြင့် အယ်လ်နီညိုဒဏ်ကို ပြင်းပြင်းထန်ထန်ခံစားနေရပြီး မိုးကျသည့်အခါတွင် အစိုးရဌာနများ ပုံမှန်အတိုင်းအလုပ်ပြန်လုပ်သွားမည်ဖြစ်ကြောင်းလည်း သမ္မတမာရူဒို က ပြောကြားထားသည်။
ဗင်နီဇွဲလားအစိုးရသည် လျှပ်စစ်ဓါတ်အားမလုံလောက်ခြင်းအတွက် အခြားသောဖြေရှင်းနည်းများကိုလည်း ဆောင်ရွက် ထားသေးရာ ဖေဖော်ဝါရီလအတွင်းကဈေးဝယ်စင်တာများကို ဖွင့်လှစ်ချိန်လျှော့ချရန်ညွှန်ကြားခဲ့သည်။
ထို့အပြင် ယခုအပတ်အစောပိုင်းကလည်း ညနေပိုင်းတွင် လျှပ်စစ်ဓါတ်အားသုံးစွဲမှုလျော့ကျစေရန်အတွက် အစိုးရဌာန များတွင် နာရီများကို နာရီဝက်ခန့်မြန်ထားခဲ့သေးသည်။
လျှပ်စစ်မီးမလုံလောက်မှုပြဿနာကြောင့် ဗင်နီဇွဲလားနိုင်ငံ၏ စီးပွားရေးအကျပ်အတည်းပြဿနာမှာ ပိုမိုဆိုးရွားလျှက်ရှိပြီး စီးပွားရေးလုပ်ငန်းရှင်များနှင့် အတိုက်အခံနိုင်ငံရေးခေါင်းဆောင်များကမူ အစိုးရ၏စီမံခန့်ခွဲပုံညံ့ဖျင်းမှုကြောင့် လျှပ်စစ်ဓါတ်အားမလုံလောက်မှု၊ အခြေခံကုန်ပစ္စည်းများပြတ်လပ်မှု တို့နှင့်ရင်ဆိုင်နေရခြင်းဖြစ်သည်ဟု ဝေဖန်လျှက်ရှိသည်။
