မကွေးတိုင်း၊ပခုက္ကူမြို့နယ်၊ပန်းတိုင်းခြုံကျေးရွာ တိုက်ပွဲတွင် စစ်ကောင်စီတပ်ဖွဲ့ ဝင် ၁၆ ဦးထက်မနည်း သေဆုံးသွားကြောင်း Southern YSO PDF အဖွဲ့က ယမန်နေ့ နိုဝင်ဘာလ ၂၃ရက်တွင် သတင်းထုတ်ပြန်သည်။
ပန်းတိုင်းခြုံကျေးရွာရှိ စစ်ကောင်စီစခန်းကို ဒေသကာကွယ်ရေးတပ်ဖွဲ့များက နိုဝင်ဘာလ ၂၁ ရက်နေ့ ညနေ ၄ နာရီတွင် စစ်ကြောင်းသုံးကြောင်း ခွဲ၍ အနီးကပ်ဝင်ရောက်တိုက်ခိုက်ခဲ့ခြင်းဟု Southern YSO PDF အဖွဲ့တာဝန်ခံ ကိုအောင်မောင်းက ပြောသည်။
“ တိုက်ပွဲဖြစ်ပြီး မိနစ် ၄၀ လောက်မှာ လက်နက်ချဖို့ပြောခဲ့တယ်။ အဲ့မှာလက်နက်ချချင်တဲ့သူတွေက လက်နက်ချမယ်ဆိုလို့ အပစ်ရပ်ပေးခဲ့တယ်။ သူတို့ ဘန်ကာထဲက ထွက်လာဖို့လုပ်နေချိန်မှာပဲ လက်နက်မချချင်တဲ့ တပ်သားတွေက ပြန်ပစ်လာတော့ ထွက်လာမယ့်သူတွေလည်း ပြန်ဝင်သွားပြီး တိုက်ပွဲတခါပြန်ဖြစ်ခဲ့တယ်” ဟုပြောသည်။
တိုက်ပွဲအတွင်း စခန်းသိမ်းပိုက်နိုင်မည့်အခြေအနေကို ရောက်ရှိခဲ့သော်လည်းစစ်ကောင်စီတပ်ဖွဲ့ ဘက်မှ စစ်ကူများ ရောက်ရှိလာသည့်အတွက် ပြန်လည်ဆုတ်ခွာလာရကြောင်း ကိုအောင်မောင်းက ဆိုသည်။
၎င်းက “ သူတို့ သုံးလေးယောက်လောက်ပဲ ကျန်တော့တာ။ ဘန်ကာထဲကနေ ခံပစ်နေတာ။ နောက်ထပ် သုံး လေးမိနစ်လောက်ဆို တစခန်းလုံးကို သိမ်းနိုင်မယ့်အခြေအနေရောက်နေပြီ။ အဲ့မှာ တပ်မ (၁၀၁) ကလည်း လက်နက်ကြီး နဲ့ လှမ်းပစ်တာ နောက်ပြီး ထွက်လာတဲ့ ခြေလျင်စစ်ကြောင်းကလည်း ကျတော်တို့ကို ပ စောက်ပုံစံ ၀ိုင်းလာနေတဲ့အခြေအနေကြောင့် နောက်ဆုတ်လာခဲ့ရတယ်” ဟုပြောသည်။
တပ်မ(၁၀၁)သည် ပခုက္ကူမြို့နယ်၌အခြေစိုက်သည့် စစ်ကောင်စီ ခြေမြန်တပ်မဌာနချုပ်ဖြစ်သည်။
တိုက်ပွဲကြာမြင့်ချိန် ၁ နာရီ ၄၀ မိနစ်ခန့်အတွင်း စစ်ကောင်စီတပ်ဖွဲ့ ဝင် ၁၆ ဦးသေဆုံးကာ ငါးဦး ဒဏ်ရာရရှိခဲ့ပြီး ကာကွယ်ရေးတပ်ဖွဲ့များဘက်မှတဦး ဒဏ်ရာရရှိခဲ့ကြောင်း ကိုအောင်မောင်းက ဆိုသည်။ စစ်ကောင်စီဘက်မှ ထိခိုက်သေဆုံးမှုကို မဇ္ဈိမအနေဖြင့် သီးခြားအတည်မပြုနိုင်သေးပေ။
စစ်ကူရောက်ရှိလာသည့် စစ်ကောင်စီတပ်ဖွဲ့ဝင်များသည် ပန်းတိုင်းခြုံကျေးရွာ အတွင်းရှိ ပြည်သူ့ နေအိမ်များကို ဝင်ရောက်ဖျက်ဆီးပြီး စခန်းတွင် ပြန်လည်တပ်စွဲထားကြောင်း သိရသည်။
“ ပန်းတိုင်းခြုံမှာက ပုံမှန် အင်အား ၂၇ ယောက်ရှိတယ်။ တိုက်ပွဲဖြစ်ပွားပြီးနောက်နေ့ မနက်အလောင်း တွေကို သယ်သွားတယ်။ ဘန်ကာတွေကို ပြန်ပြင်တဲ့အနေနဲ့ စလစ်လောင်းတယ်။ အင်အားထပ်ဖြည့် ပြီးတော့ တပ်စွဲထားနေဆဲဖြစ်တယ်” ဟု ကိုအောင်မောင်းက ပြောသည်။
ယခုတိုက်ခိုက်မှုကို Southern YSO PDF အဖွဲ့ ၊ ဗမာအမျိုးသားတော်လှန်ရေးတပ်တော် - BNRA၊ Yesagyo Revolution Group(ပခုက္ကူခရိုင်တပ်ရင်း (၂) တို့ပူးပေါင်းတိုက်ခိုက်ခဲ့ခြင်းဖြစ်ကြောင်း သိရသည်။
စာတည်း - အေးချမ်း
