အန်ဂိုလာတွင် ငှက်ဖျားကြောင့်သေဆုံးသူအရေအတွက် မြင့်တက်

အန်ဂိုလာတွင် ငှက်ဖျားကြောင့်သေဆုံးသူအရေအတွက် မြင့်တက်

လူယန်ဒါ၊ ဧပြီ၊ ၂၆ ။            ။ အန်ဂိုလာနိုင်ငံတွင် ယခုနှစ်အတွင်း ငှက်ဖျားကြောင့်သေဆုံးသူ အရေအတွက်မြင့်တက်လျှက်ရှိပြီး ၂၀၁၅ ခုနှစ်က ထက်ပင် များပြားနိုင်ကြောင်း ကမ္ဘာ့ကျန်းမာရေးအဖွဲ့အစည်းကထုတ်ပြန်လိုက်သည်။

အန်ဂိုလာနိုင်ငံတွင် ဆယ်စုနှစ်များစွာအတွင်းအဆိုးရွားဆုံး ငန်းဝါးအဖျားရောဂါကူးစက်ပျံ့နှံ့မှုအပါအဝင် ကျန်းမာရေးဆိုင်ရာပြဿနာများနှင့်ရင်ဆိုင်ရလျှက်ရှိရာ ငှက်ဖျားဖြင့်သေဆုံးသူ အရေအတွက်မှာလည်း ယမန်နှစ်ကထက် များစွာမြင့်တက်ဖွယ်ရှိနေသည်။

ယခုနှစ် ပထမလေးလပတ်အတွင်းမှာပင် အန်ဂိုလာ၌ ငှက်ဖျားကြောင့်သေဆုံးသူပေါင်းမှာ ၂၉၁၅ ဦးခန့်ရှိသွားပြီဖြစ်ပြီး ၂၀၁၅ ခုနှစ်တစ်နှစ်လုံးတွင် ငှက်ဖျားဖြင့်သေဆုံးသူစုစုပေါင်းမှာ ၈၀၀၀ ခန့်ရှိခဲ့ကာ ၂၀၁၄ ခုနှစ်က ၅၅၀၀ ခန့် ရှိခဲ့သည်ဟု ကမ္ဘာ့ကျန်းမာရေးအဖွဲ့အစည်း(WHO) က ထုတ်ပြန်ခဲ့သည်။

ငှက်ဖျားရောဂါကူးစက်မှုမှာတစ်နိုင်ငံလုံးသို့ပျံ့နှံ့လျှက်ရှိပြီး ကူးစက်နိုင်ချေနိမ့်သည့် ဒေသများ သို့ပင် ပျံ့နှံ့ရောက်ရှိလျှက် ရှိသည်ဟု WHO ၏ အန်ဂိုလာနိုင်ငံဆိုင်ရာကိုယ်စားလှယ်က ပြောကြားသည်။

အစိုးရကဘက်ဂျက်လျှော့ချဖြတ်တောက်လိုက်မှုကြောင့် လူယန်ဒါရှိ အမှိုက်များကို မသိမ်းဆည်းနိုင်ခြင်းနှင့် မိုးရေချိန် စံချိန်တင်မြင့်တက်မှုတို့ကြောင့် ငှက်ဖျား၊ ငန်းဝါအဖျား နှင့် ဝမ်းလျှောဝမ်းပျက်ဖြစ်ခြင်းများကို မြင့်တက်စေခဲ့ခြင်း ဖြစ်ကြောင်း ၎င်းကပြောကြားသည်။

ခြင်မှတဆင့်ပင် ကူးစက်သည့်ရောဂါဖြစ်သော ငန်းဝါအဖျားရောဂါကြောင့် သေဆုံးရသူပေါင်းမှာ အန်ဂိုလာတွင် ၂၂၅ ဦး နှင့် ကွန်ဂိုတွင် ၂၁ ဦးရှိပြီဖြစ်ကြောင်း လွန်ခဲ့သည့် နှစ်ပတ်က အချက်အလက်များအရ သိရကာ ကမ္ဘာလုံးဆိုင်ရာ ခြိမ်းခြောက်မှုတစ်ရပ်ဖြစ်လာနိုင်သည်ဟု WHO ကသတိပေးထားသည်။

ကမ္ဘာ့ရေနံဈေးနှုန်းကျဆင်းမှုဒဏ်ကို အာဖရိက၏ ဒုတိယမြောက်ရေနံတင်ပို့မှုအများဆုံးနိုင်ငံဖြစ်သည့် အန်ဂိုလာအနေဖြင့် ယခုနှစ်တွင် ပြင်းပြင်းထန်ထန်ခံစားရလျှက်ရှိပြီး အကြွေးများမြင့်တက်လျှက်ရှိကာ ငွေတန်ဖိုးလည်း ကျဆင်းလျှက်ရှိသည်။

Mizzima Weekly