ရန်ကုန်၊ ဧပြီ၊ ၂၅ ။ ။ ရန်ကုန်မြို့၏ အထင်ကရသမိုင်းအမွေအနှစ်အဆောက်အအုံ ၂၀၀ ခန့်ကို သုတေသနပြုမှတ်တမ်းတင်ထားသော Relics Of Rangoon စာအုပ်မှာ ထွက်ရှိရန် အသင့်အနေအထားတွင် ရှိနေပြီဖြစ်ကြောင်း ယင်းစာအုပ်ကိုပြုစုထုတ်ဝေသူများက ကြေညာချက်ထုတ်ပြန်လိုက်သည်။
ထိုစာအုပ်ကို အမေရိကန်အလွတ်တမ်းသတင်းစာဆရာ ဖိလစ်ဟေဂျမန်စ်က အချိန် ၂ နှစ်ကျော်ယူပြီး သုတေသနအဖွဲ့တစ်ဖွဲ့၊ ဓါတ်ပုံပေါင်း ၈၀၀၀ ကျော်၊ အစိုးရအရာရှိများ၊ ထိန်းသိမ်းစောင့်ရှောက်သူများ ၊ ဗိသုကာပညာရှင်များ အပါအဝင် သက်ဆိုင်ရာတာဝန်ရှိသူများ၊ ကျွမ်းကျင်သူများ နှင့် တွေ့ဆုံမေးမြန်းထားသည့် အင်တာဗျူးများကို သုတေသနပြု ဖန်တီးထားခြင်းဖြစ်သည်။
အရည်အသွေးမြင့်ဓါတ်ပုံစာအုပ်တစ်အုပ်ဖြစ်သော Relics of Rangoon စာအုပ်သည် စာမျက်နှာ ၃၆၀ ကျော် ပါဝင်ပြီး အရွယ်အစားမှာ ၁၀ x ၁၂ လက်မ ရှိမည်ဖြစ်သည်။
အဆိုပါစာအုပ်နှင့်ပတ်သက်ပြီး NLD ပါတီ၏ စီးပွားရေးအကြံပေးတစ်ဦးလည်းဖြစ် ၊ ဘောဂဗေဒပါမောက္ခတစ်ဦးလည်း ဖြစ်သည့် ရှောင်တာနယ်လ် က'' ဒီလှပတဲ့စာအုပ်ဟာ အသိဉာဏ်မျက်စိတွေကို ဖွင့်ပေးမယ့် စာအုပ်တစ်အုပ်ဖြစ်လာမှာပါ။ ဖိလစ်ဟေဂျမန်စ် ရဲ့ အကောင်းတကာ့အကောင်းဆုံးဓါတ်ပုံတွေ နဲ့ သူ့ရဲ့ လိုရင်းတိုရှင်းနဲ့ထိရောက်တဲ့ သုတေသန သုတေသနတင်ပြပုံတွေက ကမ္ဘာလှည့်ခရီးသွားတွေ၊ သက်ဆိုင်ရာပညာရှင်တွေ မျက်စိကျစရာဖြစ်လာမှာပါ '' ဟု ပြောကြားထားသည်။
Relics of Rangoon စာအုပ်ကို မေလ၊ ၄ ရက်နေ့၊ ည ၇ နာရီတွင် ရန်ကုန်မြို့၊ ဘိုကလေးဈေးလမ်းရှိ ပန်ဆူရီယာ ဂယ်လယ်ရီစတင်မိတ်ဆက်ဖြန့်ချိသွားမည်ဖြစ်သည်။