စစ်ကိုင်းတိုင်း၊ထီးချိုင့်မြို့တွင် ယနေ့ နိုဝင်ဘာ ၈ ရက် ညနေ၌ တိုက်ပွဲပြင်းထန်နေပြီး စစ်ကောင်စီက လေကြောင်းမှ တိုက်ခိုက်သွားကြောင်း ဒေသခံများကပြောသည်။
ထီးချိုင့်မြို့၊အမှတ်(၁)ရပ်ကွက် တောင်ရိုးတနေရာရှိ စစ်ကောင်စီစခန်းကို ပြည်သူ့ကာကွယ်ရေးတပ်ဖွဲ့များက ယနေ့နေ့လယ်တွင် စတင်တိုက်ခိုက်စဉ် တိုက်ပွဲဖြစ်ပွားခြင်းဟုသိရသည်။ ယနေ့ညနေ ၄နာရီ ၄၀ မိနစ်ခန့်တွင် စစ်ကောင်စီက ဂျက်ဖိုက်တာဖြင့် မြို့ပေါ်တနေရာသို့ ပစ်ခတ်သွားကြောင်း ဒေသခံများကပြောသည်။
" တိုက်လေယာဉ်တစီးချနေပြီ။ မြို့ပေါ်ကို။ ကျွန်တော်တို့လူတွေ(PDFများ)ရှိမယ်ထင်တဲ့နေရာကိုပစ်တာထင်တယ်။ပစ်ခတ်သံက အသံကစိတယ်ဗျ။ ဒုန်းဒုန်းဒုန်းဒုန်းနဲ့။ ဒုံးကျည်လိုပုံစံမျိုးအသံစိပ်တယ်" ဟု ဒေသခံသတင်းရင်းမြစ်တဦးကပြောသည်။
ထို့အပြင် ယမန်နေ့ နိုဝင်ဘာလ ၇ရက် ညက စစ်ကောင်စီပစ်သည့် လက်နက်ကြီးကြောင့် အမှတ် (၁) ရပ်ကွက်မှ ပြည်သူအချို့ ထိခိုက်သေဆုံးမှုရှိကြောင်း သတင်းရရှိသည်။
"လောလောဆယ် စစ်ကောင်စီ လက်နက်ကြီးကြောင့် ပြည်သူ လေးဦးသေဆုံးသွားကြောင်း သိရှိထားရသည်။ စကစ(စစ်ကောင်စီ) တံတားပေါ်ကနေ လက်နက်ကြီးတွေ နှင့်မြို့ပေါ်ကိုပစ်လို့ ဆိပ်ကမ်းနေပြည်သူအချို့ ထိခိုက်ကြောင်းသိထားရပါသည်" ဟု ထီးချိုင့်မြို့နယ် ပြည်သူ့ကာကွယ်ရေးတပ်ဖွဲ့ ပြန်ကြားရေးမှ မဇ္ဈိမကိုပြောသည်။ ဒေသခံများထိခိုက်သေဆုံးမှုနှင့်ပတ်သက်၍ မဇ္ဈိမအနေဖြင့် သီးခြားအတည်မပြုနိုင်သေးပေ။
တကောင်း-ထီးချိုင့်-အင်းတော် လမ်းပိုင်းကိုလည်း ယနေ့ ညနေ ၃နာရီ ၃၀မိနစ်မှစ၍ ယာယီ ပိတ်လိုက်ပြီးဖြတ်သန်းခွင့် မပြုတော့ကြောင်း ပြည်သူ့ကာကွယ်ရေးတပ်ဖွဲ့များက ထုတ်ပြန်ထားသည်။
စစ်ကိုင်းတိုင်းအတွင်း ကောလင်းမြို့အား နိုဝင်ဘာ ၆ ရက်နေ့တွင် ပြည်သူ့ကာကွယ်ရေးတပ်ဖွဲ့များက သိမ်းပိုက်ခဲ့ပြီးနောက် ကောလင်းမြို့နှင့် နယ်စပ်ချင်းဆပ်စပ်နေသော ထီးချိုင့်မြို့တွင်လည်း တိုက်ပွဲဖြစ်လာနိုင်ကြောင်း သတင်းများ ထွက်ပေါ်ခဲ့သည်။ ထို့ကြောင့်ဒေသခံအများစုသည် နိုဝင်ဘာလ ၇ရက်မှစ၍ တိမ်းရှောင်နေခဲ့ကြသည်။ ယနေ့တွင် ထီးချိုင့်မြို့ပေါ်၌ တိုက်ပွဲစတင်ဖြစ်ပွားခြင်းဖြစ်သည်။
စာတည်း - အေးချမ်း
#Mizzima
#ထီးချိုင့်မြို့
#တိုက်ပွဲပြင်းထန်
#လေကြောင်းတိုက်ခိုက်
#Breaking News
29m
