မန္တလေး၊ဧပြီ ၂၅ ။ ။ မန္တလေးမြို့တော်စည်ပင်သာယာရေးကော်မတီနှင့် စစ်မှုထမ်းဟောင်းအဖွဲ့တို့မှ သိမ်းယူထားသော ပုသိမ်ကြီးမြို့နယ်၊ ရေကြည်ညောင်ပင်ကျေးရွာရှိ လယ်ယာမြေများပြန်လည်ရရှိအောင် ကူညီဆောင်ရွက်ပေးခဲ့သူ ကိုမျိုးဝင်းအား ပြန်လည်လွှတ်ပေးရန်နှင့်အမှုများရုပ်သိမ်းပေးရန်အတွက် ဒေသခံတောင်သူတချို့ကတောင်းဆိုခဲ့သည်။
ဧပြီ ၂၅ ရက်၊နံနက် ၁၀ နာရီကကိုမျိုးဝင်းအားရုံးထုတ်လာစဉ် ပုသိမ်ကြီးမြို့နယ်တရားရုံးနှင့်အထွေထွေအုပ်ချုပ်ရေးမှူးရုံးရှေ့တို့တွင် ဒေသခံတောင်သူတစ်ချို့က တောင်းဆိုခဲ့ကြသည်။
တောင်းဆိုမှုတွင်ပါဝင်သူ ရေကြည်ကျေးရွာမှ မချိုက"တောင်သူကို ကူညီနေတာပါ။သူပုန်ကို ကူညီတာမဟုတ်ဘူး။ ကျွန်မတို့ခံစားနေရတာတွေ၊ ဆုံးရှုံးခဲ့တာတွေကို မားမားမတ်မတ်ရပ်တည်ပြီး ကူညီခဲ့တဲ့သူပါ။ ဒါကြောင့်လွှတ်ပေးဖို့တောင်းဆိုတယ်။ လွတ်မြောက်ဖို့ဆုတောင်းတယ်။"ဟုပြောသည်။
ဆန္ဒဖော်ထုတ်တောင်းဆိုနေမှုနှင့်ပတ်သက်၍ ပုသိမ်ကြီးမြို့နယ်အထွေအုပ်ချုပ်ရေးမှူး ဦးကျော်သက်ခိုင် က "တောင်းဆိုလို့ရပါတယ်။ ဒါပေမယ့် ခွင့်ပြုမိန့်လေးနဲ့ လုပ်ရင်ကောင်းတာပေါ့။ ပုဒ်မ ၁၈ ဆိုတာကလည်း ရှိနေသေးပါတယ်။ ဥပဒေကြောင်းအရ ဆောင်ရွက်လိုပ်မယ်ဆို တောင်သူတွေပဲ ခံရမှာလေ။ ကျွန်တော်အနေနဲ့တော့ ဆက်မလုပ်ဖို့ပြောထားပါတယ်။"ဟုပြောသည်။
မန္တလေးတိုင်းဒေသကြီးလွှတ်တော်ကိုယ်စားလှယ် ဦးရဲမင်းဦးကလည်း "ဥပဒေဘောင်ထဲက လွှတ်မြောက်ဖို့ကူညီပေးသွားပါမယ်။"ဟုပြောသည်။
ဒေသခံတောင်သူများအနေဖြင့် ကိုမျိုးဝင်းလွတ်မြောက်စေရန်အတွက် ဆုတောင်းပွဲများနှင့်တောင်းဆိုမှုများ ရုံးချိန်းရက်တိုင်း ပြုလုပ်သွားနိုင်ရန်စီစဉ်သွားမည်ဟု ဆန္ဒပြတောင်းဆိုမှုကို ဦးဆောင်သူ ကိုအေးသိန်းကဆိုသည်
