ပြီးခဲ့တဲ့ အောက်တိုဘာလ ၂၀ ရက်နေ့ မနက်ပိုင်းက မြစ်ကြီးနား ဗန်းမော်လမ်းပိုင်း နန့်ဆန်ယန် အနီးမှာ ရှိတဲ့ လိုင်လွမ်အောင်ဂျာစခန်းကို KIA နဲ့ ပူးပေါင်းမဟာမိတ်တွေ တိုက်ခိုက်သိမ်းပိုက်ခဲ့ပါတယ်။
ဒီလို သိမ်းပိုက်ရာမှာ ကချင်လွတ်လပ်ရေးတပ်မတော် (KIA)အပါအဝင် ပြည်သူ့ကာကွယ်ရေးတပ်မတော် (PDF)၊ ရက္ခိုင့်တပ်တော် (AA)၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (မြောက်ပိုင်း) (ABSDF-NB)၊ ချင်းအမျိုးသားတပ်မတော် (CNA)နှင့် ကူကီးအမျိုးသားတပ်မတော် (မြန်မာပြည်) (KNA-Burma) စတဲ့ မဟာမိတ် ငါးဖွဲ့တို့နဲ့ တိုက်ခိုက်ခဲ့တာလည်းဖြစ်ပါတယ်။
ဒီလို ပူးပေါင်း တိုက်ခိုက်ခဲ့တာကြောင့် ကချင်လွတ်လပ်ရေးတပ်မတော် (KIA) စစ်ဦးစီးချုပ်က မဟာမိတ်ငါးဖွဲ့ကိုပေးပို့တဲ့ ဂုဏ်ပြုမှတ်တမ်းတင်စာ လက်ခံရရှိခဲ့တယ်လို့ အမျိုးသားညီညွတ်ရေးအစိုးရ(NUG)နဲ့ မြန်မာနိုင်ငံလုံးဆိုင်ရာ ကျောင်းသားများဒီမိုကရက်တစ်တပ်ဦး (ABSDF) တို့က ထုတ်ပြန်လာပါတယ်။
ဒီသတင်း အပြည့်အစုံကိုတော့ မဇ္ဈိမ ဝိုင်းတော်သား ခက်နွေက ပေးပို့တင်ဆက်ထားပါတယ်။
တင်ဆက်/တည်းဖြတ် - မောင်ခက်နွေ
စာတည်း- သန့်ဇော်(သန်လျင်)
#mizzima