စစ်ကိုင်းတိုင်း၊ ဒီပဲယင်းမြို့နယ်က စစ်ဘေးရှောင် ၂,ဝဝဝ ကျော်အတွက် ရိက္ခာနဲ့ကူညီထောက်ပံ့မှုတွေ လိုအပ်နေတယ်လို့ စစ်ဘေးရှောင်ကူညီနေသူတွေက ပြောပါတယ်။
စစ်ကိုင်းတိုင်း၊ ရေဦးမြို့နယ် တိုင်းရင်းဆေးရုံမှာ အထိုင်ချထားတဲ့ စစ်ကောင်စီတပ်ဖွဲ့ စစ်ကြောင်းဟာ ဒီပဲယင်းမြို့နယ် အရှေ့ခြမ်း လက်ယက်ကုန်းကျေးရွာဝန်းကျင်ကို စက်တင်ဘာလ ၂၅ ရက်မှာ စစ်ကြောင်းထိုးခဲ့ပါတယ်။
ဒါ့အပြင် စက်တင်ဘာလ ၂၆ ရက်နေ့မှာ မုံရွာ နမခ က တက်လာတဲ့ Mi 35 တိုက်ခိုက်ရေးရဟတ်ယာဉ် တစီးဟာ ဒီပဲယင်းနယ် အရှေ့ခြမ်းက ညောင်လှ၊ မူးခံတွင်း ၊ လက်ယက်ကုန်း နဲ့ သစ်တုံကျေးရွာတဝိုက်ကို လေကြောင်းတိုက်ခိုက်မှု ပြုလုပ်ခဲ့ပါတယ်။
စစ်ကောင်စီတပ်ဖွဲ့ဟာ မြေပြင်စစ်ကြောင်းအပြင် လေကြောင်းနဲ့ပါ တိုက်ခိုက်ခဲ့တာကြောင့် လက်ယက်ကုန်းကျေးရွာ အနီးအနားမှာရှိတဲ့ ကျေးရွာပေါင်း ၁၀ ရွာကျော်က ဒေသခံတွေ စစ်ဘေးတိမ်းရှောင်ခဲ့ရတာပါ။
အဲ့ဒီအထဲက နေရပ်မပြန်နိုင်သေးတဲ့ စစ်ဘေးရှောင် ၂,ဝဝဝ ကျော်အတွက် ဆန်၊ ဆီ ၊ ရိက္ခာတွေ ကူညီထောက်ပံ့ဖို့ နေ့စဉ်လိုအပ်နေတယ်လို့ ဒီပဲယင်းမြို့နယ် စစ်ရှောင်ထောက်ပံ့ရေးအဖွဲ့ဝင်က ပြောပါတယ်။
တင်ဆက်၊တည်းဖြတ် - KMN
#စစ်ကိုင်းတိုင်း
#စစ်ဘေးရှောင်
#စာနပ်ရိက္ခာ