ကရင်ပြည်နယ်၊ ကြာအင်းဆိပ်ကြီးမြို့နယ်တွင် စစ်ကောင်စီသည် လေကြောင်းမှသာ ခလရ (၃၂)သို့ လက်နက်နှင့် စားနပ်ရိက္ခာထောက်ပို့ခြင်းများပြုလုပ်နေသည်ဟု ကာကွယ်ရေးတပ်ထံမှ သိရသည်။
“ဒီဘက်ခွင်က သူတို့ မြေပြင်ကနေ ထောက်ပို့လုပ်လို့ မရတော့ဘူး။ အရှေ့တောင်တိုင်းစစ်ဌာနချုပ် မော်လမြိုင်ကနေကြာအင်းဆိပ်ကြီးကို ထောက်ပို့လုပ်ရင် လမ်းပိုင်းတွေ မထိန်းချုပ်နိုင်တဲ့အတွက် ကား တွေနဲ့ မလာရဲတော့တာ” ဟု Cloud Wings တပ်ဖွဲ့ မှ တာဝန်ရှိသူတဦးက မဇ္ဈိမကိုပြောသည်။
စက်တင်ဘာလ ၁ ရက်နေ့ မွန်းလွဲပိုင်းက ကြာအင်းဆိပ်ကြီးမြို့နယ်အခြေစိုက် ခလရ(၃၂)သို့ ရိက္ခာလာပို့ သည့် စစ်ကောင်စီ၏ ရဟတ်ယာဉ်နှစ်စီးကိုလည်း လက်နက်ကြီးဖြင့် ပစ်ခတ်တိုက်ခိုက်ခဲ့သည်ဟု ၎င်းက ပြောသည်။
ရိက္ခာများ လာရောက်ပို့ဆောင်သည့် စစ်ကောင်စီတပ်၏ Mi 35 ရဟတ်ယာဉ်တစီးနှင့် Mi 17 ရဟတ်ယာဉ် တစီးအား တပ်မဟာ (၆) KNLA ၊ Cloud Wings ပူးပေါင်းတပ်ဖွဲ့က လက်နက်ကြီးများဖြင့် ပစ်ခတ်တိုက် ခိုက်ခဲ့ခြင်းဖြစ်သည်ဟု ကာကွယ်ရေးတပ်ဖွဲ့ထံမှ သိရသည်။
တိုက်ခိုက်မှုအပြီးတွင် စစ်ကောင်စီတပ်ဘက်မှ လက်နက်ကြီးများဖြင့် ပစ်ခတ်မှုရှိခဲ့သော်လည်း ကာကွယ် ရေးတပ်ဖွဲ့ဘက်တွင် ထိခိုက်မှုမရှိကြောင်း သိရသည်။
ကြာအင်းဆိပ်ကြီးမြို့နယ်အတွင်း၌ စစ်ကောင်စီလက်အောက်ခံ တပ်ရင်း၊ တပ်စခန်းများ၊ အစိုးရရုံးများ မကြာခဏတိုက်ခိုက်ခံရလေ့ရှိပြီး တော်လှန်ရေးအင်အားစု ပူးပေါင်းတပ်ဖွဲ့ဝင်များက ဂိတ်စခန်းများ ဖွင့်ကာ လုံခြုံရေးယူစစ်ဆေးလျက်ရှိကြောင်း သိရသည်။
စာတည်း ။ ။ ဖူးသိမ်ကျ
စာမူတည်းဖြတ်။ ။စောဖေ