ဆော်ဒီအာရေးဗီးယားရဲ့ ထူးခြားတဲ့ ဘောလုံးလောကချဲ့ထွင်မှုဟာ ခဏတာအတွင်း တရုတ်တိုးတက်မှုနဲ့မတူဘဲ ခိုင်မာတဲ့ အစိုးရပံ့ပိုးမှုဖြင့် "ရေရှည်စီမံကိန်း"တစ်ခု ဖြစ်တယ်လို့ အကြီးတန်းလိဂ်အရာရှိတစ်ဦးက AFP ကို ပြောပါတယ်။
ဆော်ဒီပရိုလိဂ်ဟာ ကမ္ဘာ့ထိပ်တန်းပြိုင်ပွဲတွေထဲက တစ်ခုဖြစ်လာဖို့ ၎င်းရဲ့ရည်မှန်းချက်မှာ ရေနံကြွယ်ဝတဲ့ နိုင်ငံရဲ့ အုပ်ချုပ်သူတွေထံကနေ နှစ်ရှည်ကြာ ကတိကဝတ်ရရှိထားတယ်လို့ လုပ်ငန်းလည်ပတ်ရေးအရာရှိချုပ် ကားလို နိုရာက ပြောပါတယ်။
ရူးသွပ်စရာကောင်းလောက်အောင် ဒေါ်လာရာနဲ့ ကုန်ကျခံပြီး ခေါ်ယူထားတဲ့ ခရစ္စတီယာနို ရော်နယ်လ်ဒို၊ ကာရင် ဘန်ဇီမာနဲ့ တခြားနာမည်ကြီး အများအပြားနဲ့အတူ ပူပေါင်းခဲတဲ့ ဘရာဇီးလ် စူပါစတား နေမာရဲ့ အယ်လ်ဟီလာ မိတ်ဆက်ပွဲမှာ နိုရာက ပြောဆိုခဲ့တာပါ။
"ဒါဟာ နေ့ချင်းညချင်း ဖြစ်လာမယ်လို့ ကျနော်တို့ မျှော်လင့်ထားတဲ့အရာတော့ မဟုတ်ပါဘူး။ တစ်ပတ်တာ ပိတ်ရက် ပွဲစဉ်တစ်ခု မဟုတ်ပါဘူး၊ ဒါက ရေရှည် စီမံကိန်းဖြစ်ပြီး ဒါကို လူတိုင်း လက်ခံပါတယ်" လို့ နိုရာက King Fahd International Stadium မှာ စနေနေ့နှောင်းပိုင်းက ပြောပါတယ်။
“ပြီးတော့ ဒါက ငွေနဲ့ ပစ်ပေါက်ပြီး လုပ်ဆောင်ရတဲ့ အရာမဟုတ်ဘူး။ ရေရှည်စီမံကိန်းက ဖြစ်လာလိမ့်မယ်”လို့ သူက ထပ်လောင်းပြောဆိုခဲ့ပါတယ်။ "အရာအားလုံးနဲ့ လူတိုင်းနဲ့ ဂေဟစနစ်ကို ပေါင်းစည်းဖို့ လမ်းကြောင်းတလျှောက် မှန်ကန်တဲ့အရာတွေ အားလုံးကို ကျနော်တို့တွေ လုပ်ဆောင်ဖို့ဆိုတာ ဒါဟာ သေချာနေပါတယ်။"
ဆော်ဒီလိဂ်ရဲ့ အရှိန်အဟုန်ဖြင့် ချဲ့ထွင်မှုဟာ ကလပ်အသင်းတွေ ငွေကြေးပြဿနာတွေအထိ မရောက်မချင်း ကစားသမားတွေကို အဆမတန် ငွေကြေးပမာဏများစွာဖြင့် ဆွဲသွင်းခဲ့တဲ့ တရုတ်စူပါလိဂ်နဲ့ နှိုင်းယှဉ်မှုတွေ တန်းညှိလာပါတယ်။
အဲဒီအချိန်က ကွမ်ကျိုးအဲဗားဂရင်းဒီအသင်းဟာ လူသိနည်းတဲ့ အာဂျင်တီးတိုင်းကစားသမား ဒါရီယို ကွန်ကာကို ကမ္ဘာ့လစာအကောင်းဆုံး ကစားသမားတွေထဲက တစ်ဦးဖြစ်စေခဲ့ပြီးတော့ ရှန်ဟိုင်း ရှင်ဟွာအသင်းဟာ အသက်အရွယ်ရ ကားလို့စ် တီဗက်ဇ်ကို တစ်ပတ်ကို ယူရို ၇၉၅,၀၀ (ဒေါ်လာ ၇၉၅,၀၀၀) ကုန်ကျခံသုံးစွဲခဲ့ပါတယ်။
“ဒီလို နှိုင်းယှဉ်မှုတွေဟာ ရှောင်လွှဲလို့ မရပါဘူး”လို့ နိုရာက ဆိုပါတယ်။
"ဒါပေမယ့် ကျနော်တို့အတွက်ကတော့ ဒီပရောဂျက်ဟာ အသွင်ကူးပြောင်းရေးပရောဂျက်ရဲ့ တစ်စိတ်တစ်ပိုင်းဖြစ်တယ်ဆိုတဲ့ အချက်ဖြစ်တယ်။ ဒါက ဒီနိုင်ငံရဲ့ တိုးတက်မှုအတွက် တိကျတဲ့ ဦးတည်ချက်ဖြစ်ပြီး ရှေ့ဆက်လျှောက်လှမ်းနိုင်ရေးအတွက် ကျနော်တို့ လိုအပ်နေတဲ့ ခွန်အားအရင်းအမြစ်ကို ထောက်ပံ့ပေးပါတယ်။"
'ရည်မှန်းချက်အတွက် အဆုံးမရှိ'
ကုန်ကျစရိတ်ကန့်သတ်ချက်တွေကို ထည့်သွင်းစဉ်းစားခြင်းမရှိဘဲ ပြုပြင်မွမ်းမံခြင်းကို လုပ်ဆောင်နေခြင်းဟာ ကမ္ဘာ့ထိပ်တန်းရေနံတင်ပို့သူရဲ့ စီးပွားရေးကို ပြန်လည်ပုံဖော်ဖို့ ရည်ရွယ်ထားတဲ့ အသက် ၃၇ နှစ်အရွယ် အိမ်ရှေ့မင်းသား မိုဟာမက် ဘင်ဆာလ်မန်ရဲ့ ရည်မှန်းချက်ကြီး Vision 2030 ပရောဂျက်ရဲ့ တစ်စိတ်တစ်ပိုင်းဖြစ်ပါတယ်။
ဒေါ်လာ ဘီလီယံ ၅၀၀ ကုန်ကျသွားမယ့် ခရီးသွားအပန်းဖြေစခန်းတွေနဲ့ အားကစားပွဲတော်အပြင် US PGA Tour နဲ့ ဥရောပရဲ့ DP World Tour တို့ကို ထိထိရောက်ရောက် ဆုပ်ကိုင်နိုင်ခဲ့တဲ့ Formula One နဲ့ LIV Golf အပါအဝင် အနာဂတ်မြို့တော်သစ် Neom ဟာ ဘင်ဆာလ်မန်ရဲ့ အစီအစဉ်တွေရဲ့ တစ်စိတ်တစ်ပိုင်းလည်းဖြစ်ပါတယ်။
"နောက်ဆုံးမှာတော့ ကျနော်တို့ အမှန်တကယ်ကြိုးစားလုပ်ဆောင်နေတာက ဆော်ဒီတွေအတွက် ဘောလုံးနဲ့ ဖျော်ဖြေရေးကနေတစ်ဆင့် ပေးပို့တာဖြစ်တယ်"လို့ နိုရာက ပြောပါတယ်။
"ဗျူဟာက 360 degrees ဖြစ်ပြီး အစိတ်အပိုင်းတွေ အများကြီးပါပါတယ်။ အဲဒါရဲ့ အဓိကအချက်ကတော့ ကျနော်တို့အတွက် အဲဒီရည်မှန်းချက်တွေထဲက တစ်ခုက ကမ္ဘာ့အဆင့် အားကစားဖျော်ဖြေသူတွေနဲ့အတူ ကွင်းထဲမှာ စွမ်းဆောင်ရည်ကို ကျနော်တို့ ဘယ်လိုတိုးတက်အောင် လုပ်ဆောင်မလဲဆိုတာပါပဲ"
Public Investment Fund က မကြာသေးခင်က ဝယ်ယူထားတဲ့ ကလပ် လေးသင်းအပါအဝင် ပရိုလိဂ်ကလပ်အသင်းတွေဟာ ဥရောပရဲ့ အပြောင်းအရွှေ့ဈေးကွက်ပိတ်ပြီး သုံးပတ်အကြာ စက်တင်ဘာ ၂၀ မှာ ပိတ်သိမ်းမယ့် ဆော်ဒီအပြောင်းအရွှေ့ဈေးကွက်မပိတ်ခင် ကစားသမားတွေကို လိုက်လံရှာဖွေနေဆဲဖြစ်တယ်လို့ နိုရာက ပြောပါတယ်။
နိုရာက သူတို့ရဲ့ ပစ်မှတ်တွေကို "အနီးကပ်စောင့်ကြပ်ထားတဲ့ လျှို့ဝှက်ချက်"လို့ ခေါ်ဆိုရင်း "ဈေးကွက်ထဲမှာ ကစားသမားတွေကို ရှာဖွေနေသေးတဲ့ ကလပ်တွေရှိပါတယ်။"လို့ ပြောပါတယ်။
နေမာရဲ့ အလ်-ဟီလာလ်အသင်းဟာ ဒီနှစ်နွေရာသီမှာ ကမ္ဘာ့ဒုတိယ သုံးစွဲမှုအများဆုံးအသင်းဖြစ်ပြီး သုံးစွဲစရိတ် ကြီးမားပေမယ့်လည်း ဘတ်ဂျက်ငွေမှာ ကန့်သတ်ချက်ရှိတဲ့အပြင် အသင်းတွေအတွက် ရည်ရွယ်ချက်မှာ ငွေရေးကြေးရေးအရ ရပ်တည်နိုင်စေဖို့နဲ့ ကိုယ်ပိုင်သီးသန့်သွားနိုင်စေဖို့လည်း ဖြစ်ပါတယ်။
"(အသုံးစရိတ်) ကန့်သတ်ချက် ချမှတ်ထားပြီးဖြစ်ပါတယ်၊ ဟုတ်ပါတယ်၊ ဒါပေမယ့် ကျနော်တို့ ဒီနေရာမှာ သက်ရောက်မှုရှိဖို့ လိုအပ်နေတဲ့ အရည်အသွေးရှိတဲ့ ကစားသမားတွေကို ရအောင်ယူဖို့၊ အဲဒီအတွက် ပရီမီယံကြေး ပေးဆောင်ရမယ်ဆိုတာကို အစကတည်းက နားလည်ထားပါတယ်"လို့ နိုရာက ပြောပါတယ်။
"လောလောဆယ်မှာ ထောက်ပံ့မှုရလို့ ကျနော်တို့ ကံကောင်းပါသေးတယ်၊ အဲဒါက အချိန်အတိုင်းအတာတစ်ခုအထိ ဆက်ရှိနေမှာပါ"လို့ သူက ထည့်သွင်းပြောဆိုပါတယ်။
"ဒါပေမယ့် သူတို့ဟာ တခြားတစ်ဖက်ကမ်းကနေ တံတားကို ဖြတ်ကူးပြီး ငွေကြေးအရအလည်း အမှီအခိုကင်းမှု ရှိစေဖို့ ကျနော်တို့မှာလည်း တာဝန်ရှိပါတယ်။"
ကစားသမားတွေရဲ့ အရည်အသွေး၊ ကွင်းတွင်းလာရောက်ကြည့်ရှုမှုနဲ့ စီးပွားရေးအရ အောင်မြင်မှုတို့ကို တိုင်းတာတဲ့အချိန်ကျရင် ပရိုလိဂ်ဟာ ထိပ်တန်းလိဂ် (၅)ခုထဲ ဝင်ရောက်လာနိုင်မယ်လို့ သူ "သေချာပေါက်"ယုံကြည်ကြောင်း နိုရာက ပြောပါတယ်။
ဆော်ဒီကလပ်တွေရဲ့ အဓိကပစ်မှတ်အဖြစ် အာရှချန်ပီယံလိဂ်ပြိုင်ပွဲကို ညွှန်းဆိုရင်း “ဒီနေရာမှာ လူတွေရဲ့ ရည်မှန်းချက်မျိုးက အဆုံးမရှိပါဘူး”လို့ သူက ပြောပါတယ်။
"ဒီနည်းဗျူဟာက အချိန်နှင့်အမျှ ဆက်လက်တိုးတက်နေဦးမှာပါ။ ကျနော်တို့ဟာ လမ်းကြောင်းမှန်ကို ပြင်လိုက်မယ်၊ ကျနော်တို့ဟာ နောက်တစ်ဆင့်ဆီ တက်လှမ်းဖို့ လိုအပ်တဲ့ တံခါးပေါက်တစ်ခုကို ရောက်ရှိနေပြီလို့ ကျနော်တို့တွေ ခံစားမိတာကြောင့် ကွဲပြားတဲ့ ပုံစံကို လုပ်ဆောင်သွားပါမယ်။"
(AFP)
