ကချင်ပြည်နယ် ရွှေကူမြို့ဆိပ်ကမ်းမှ ဗန်မော်မြို့သို့ ဆန်တက်လာသည့် စစ်ကောင်စီတပ်၏ လက်နက်နှင့်ရိက္ခာတင်ဆောင်လာသည့် သင်္ဘောကိုးစီးတန်းကို ဒုတိယ ဧရာဝတီမြစ်ကျဉ်းအတွင်း ၁၀၇ မမ ရှော့တိုက်ဒုံးများဖြင့် စောင့်ကြိုတိုက်ခိုက်ခဲ့ကြောင်း မြို့လှ K-PDF တပ်ရင်းမှ သတင်းထုတ်ပြန်သည်။

စစ်ကောင်စီတပ်၏ လက်နက်နှင့်ရိက္ခာတင်ဆောင်လာသည့်သင်္ဘောကိုးစီးတန်းအား မြို့လှ K-PDF တပ် ရင်း တပ်ခွဲ(၂) ဗိုလ်တခွန်အဖွဲ့မှ ၁၀၇ မမ ရှော့ဒုံးများဖြင့် ပစ်ခတ်တိုက်ခိုက်ခဲ့ရာ သင်္ဘောတစီး၏ ခါးပိုင်း ကို ထိမှန်ခဲ့ကြောင်း၊ နောက်တစီးမှာလည်း ဒုတိယမြစ်ကျဉ်းအတွင်း၌ ရှော့တိုက်ဒုံးနှစ်လုံးထိမှန်ခဲ့၍ ထိခိုက်သွားသည့်သင်္ဘောနှစ်စီးကို နောင်မိုအထက်ဘက်၌ရပ်နားခဲ့ကာ ယနေ့ ညနေ ၄ နာရီခွဲ့ခန့်၌ နှစ်စီး တွဲကာ ပြန်ဆန်တက်လာပြီး စင်းခန်းဆိပ်ကမ်းသို့ရောက်ရှိရပ်နားနေကြောင်း သိရသည်။

စစ်သင်္ဘောသုံးစီးပါဝင်သည့် သင်္ဘောကိုးစီးအုပ်စုသည် ဇူလိုင် ၂၆ ရက်နေ့တွင် မန္တလေးမြို့ ဂေါဝိန်ဆိပ် ကမ်းမှစတင်ထွက်ခွာလာပြီး  ဩဂုတ် ၇ ရက်နေ့က ရွှေကူမြို့နယ်သို့ ဝင်ရောက်ချိန်၌  ကာကွယ်ရေးတပ် များမှပစ်ခတ်ခဲ့သဖြင့် သင်္ဘောတစီးထိခိုက်ခဲ့ကြောင်း သိရသည်။

အဆိုပါသင်္ဘောကို ရွှေကူဆိပ်ကမ်း၌ ပြန်လည်ပြုပြင်နေစဉ် ခြေလျင်စစ်ကြောင်းက ဧရာဝတီမြစ်ကမ်း ဘေးရှိ ဆင်တပ်၊ ရေလဲ၊ မိုးစစ်၊ သင်္ဘောအင်းစသည့် ကျေးရွာများကို စစ်ကြောင်းထိုးခဲ့သောကြောင့် ဒေသခံများ တိမ်းရှောင်နေရကြောင်း မြို့ခံများကပြောသည်။

ရွှေကူဆိပ်ကမ်း၌ ကိုးရက်ခန့်ရပ်နားထားသည့် စစ်သင်္ဘောသုံးစီးပါသင်္ဘောကိုးစီးအုပ်စုသည် ယနေ့ နံနက်ပိုင်းတွင် ဗန်မော်မြို့သို့ဆန်တက်နေခြင်းဖြစ်ပြီး မြို့လှ K-PDF တပ်ရင်းက ပစ်ခတ်တိုက်ခိုက်ခဲ့ ခြင်းဖြစ်သည်။

စာတည်း။  ။စောဖေ

#ဧရာဝတီမြစ်
#စစ်သင်္ဘော
#ဒုတိယမြစ်ကျဉ်း

#Hard news