စစ်ကိုင်းတိုင်း၊ ခင်ဦးမြို့နယ်၊ ကုန်းကြီးကျေးရွာတွင် စစ်ကောင်စီစစ်ကြောင်း ပြန်ထွက်သွားပြီးနောက်နေအိမ်နှင့် ကြက်မွေးမြူရေးခြံများ မီးရှို့ဖျက်ဆီးခံရပြီး မီးလောင်ကျွမ်းထားသည့် ရုပ်အလောင်းတစ်လောင်းကို တွေ့ရှိခဲ့ကြောင်း ဒေသခံများထံမှ သိရသည်။
အင်အား ၁၀၀ ကျော်ပါဝင်သည့် စစ်ကောင်စီစစ်ကြောင်းမှာ ခင်ဦးမြို့နယ် အရှေ့ခြမ်း ကုန်းကြီးရွာသို့ ဇူလိုင်လ ၅ ရက်နေ့တွင် စတင် ဝင်ရောက်ခဲ့ပြီး နေအိမ် ၂၅ လုံးကို မီးရှို့ခဲ့ကာ ဇူလိုင်လ ၇ ရက်နေ့ နံနက်ပိုင်းတွင် ပြန်လည်ထွက်ခွာသွားခြင်းဖြစ်ကြောင်း သိရသည်။
“ခန့်မှန်းပြောတာက ကုန်းကြီးရွာက အဖမ်းခံရတဲ့လူလည်းဖြစ်နိုင်တယ်ပေါ့နော်။ သူက မီးကျွမ်းနေပြီ။ အဖမ်းခံရတာကတော့ မသိသေးဘူး”ဟု ခင်ဦးမြို့နယ်သတင်းမှန်ပြန်ကြားရေးအဖွဲ့မှ တာဝန်ရှိသူတစ်ဦးကပြောသည်။
အဆိုပါ ရုပ်အလောင်းနှင့် ပတ်သက်ပြီး မည်သူ ၊ မည်ဝါဖြစ်ကြောင်း အသေးစိတ်သိရှိနိုင်ရန် မဇ္စျိမအနေဖြင့် ဆက်လက်စုံစမ်းနေဆဲဖြစ်သည်။
အဆိုပါ စစ်ကောင်စီစစ်ကြောင်းမှာ ဇူလိုင်လ ၆ ရက်နေ့တွင်ခင်ဦး အရှေ့ခြမ်း လယ်သစ်တောကျေးရွာနှင့် ကုန်းကြီးကျေးရွာတို့ရှိ အသားစားကြက်မွေးမြူရေးခြံ ၁၂ ခြံကိုလည်း မီးရှို့ခဲ့မှုကြောင့် အသားစားကြက်အကောင်ရေ ၄,၀၀၀ ကျော်ဆုံးရှုံးခဲ့ကြောင်း သိရသည်။
ထို့နောက် ယနေ့ ဇူလိုင်လ ၇ ရက်နေ့ နံနက်ပိုင်းတွင် ဝက်သဲရွာဘက်သို့ ဆက်လက်စစ်ကြောင်းထိုးနေသည့်အတွက် ဒေသခံများ ထွက်ပြေးတိမ်းရှောင်နေရကြောင်း သိရသည်။
ခင်ဦးမြို့နယ်အနောက်ဘက်ခြမ်းတွင်လည်း စစ်ကောင်စီတပ်၏ နောက်ထပ်စစ်ကြောင်းတစ်ခုက ယနေ့ နံနက်ပိုင်းတွင် မြကန်ရွာကိုဝင်ရောက်ခဲ့ကြောင်း မြင်းဒေါင်းဒေသခံတစ်ဦးက ပြောသည်။
ထို့နောက် မြကန်ရွာရှိ ဒေသခံတစ်ဦးဖမ်းဆီးခံခဲ့ရကာ နေအိမ်အချို့လည်း မီးရှို့ခံရပြီး အရေအတွက် မသိရသေးကြောင်း အဆိုပါဒေသခံကပြောသည်။
လက်ရှိတွင် ခင်ဦးမြို့နယ်အရှေ့ခြမ်းတွင် ကုန်းကြီး၊ တမာ၊ ရသာ၊ဆူးတပ်၊ ဝက်သဲ စသည့်ကျေးရွာများနှင့် ခင်ဦးမြို့နယ်အနောက်ခြမ်းတွင် မြကန်၊ မြင်းဒေါင်း၊ အင်းပတ်၊ မရမ်းအင်း၊ ကုန်းသာ စသည့်ကျေးရွာများမှ ဒေသခံပြည်သူ ၆,၀၀၀ ကျော် စစ်ဘေးရှောင်နေရကြောင်း သိရသည်။
ခင်ဦးမြို့နယ်အတွင်း စစ်ကောင်စီတပ်စစ်ကြောင်းတစ်လျှောက်ကျေးရွာများမှ ဖမ်းဆီးခံရသည့် ဒေသခံ ၁၀ ဦးထက်မနည်းရှိနေပြီဖြစ်ကြောင်းလည်း ခင်ဦးမြို့နယ် သတင်းမှန်ပြန်ကြားရေးအဖွဲ့ထံမှ သိရသည်။
Data for Myanmar၏ ဇွန်လ ၁၄ ရက်နေ့ ထုတ်ပြန်ချက်အရ စစ်ကောင်စီတပ်နှင့် လက်အောက်ခံ အဖွဲ့အစည်းများ၏ မီးရှို့မှုကြောင့် စစ်ကိုင်းတိုင်းတွင် နေအိမ် ၅၃,၈၁၆ လုံး မီးလောင်ပျက်စီးထားကြောင်း သိရသည်။
စာတည်း - သန့်ဇော်(သန်လျင်)