နေပြည်တော်အချုပ်ထောင်တွင် ဖမ်းဆီးခံထားရသည့် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ထံသို့ စစ်ဗိုလ်ချုပ်အချို့ သွားရောက်တွေ့ဆုံခဲ့ကြောင်း နေပြည်တော် သတင်းရင်း မြစ်အချို့ထံမှ သိရသည်။

စစ်ကောင်စီ၏ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီ (NSPNC) ဉက္ကဋ္ဌ ဒုတိယဗိုလ်ချုပ်ကြီးရာပြည့်၊ ပြည်ထဲရေးဝန်ကြီး ဒုတိယဗိုလ်ချုပ်ကြီး စိုးထွဋ်၊ ဒုတိယ ဗိုလ်ချုပ်ကြီးခင်ဇော်ဦး(ငြိမ်း)တို့က မေလ ၂၇ ရက်နေ့နှင့် ဇွန်လ ၄ ရက်နေ့တို့တွင် သွားရောက်တွေ့ဆုံ ခဲ့ခြင်းဖြစ်ကြောင်း သတင်းရင်းမြစ်ကပြောသည်။

“ ဒေါ်အောင်ဆန်းစုကြည်ကတော့ ဘာမှမှတ်ချက်မပေးဘူးလို့ သိရတယ်။ အခုက နှစ်ကြိမ်တွေ့တယ် ပေါ့။ မေ ၂၇ ရက်နေ့မှာတကြိမ်၊ ပြီးရင် ဇွန်လ ၄ ရက်နေ့မှာ တကြိမ်။ ဒါကတော့ ရက်အတည်ပြုလို့ ရတာ။ သည့်မတိုင်ခင် ရှေ့ပိုင်းမှာလည်း တွေ့နိုင်တဲ့အခြေအနေတွေရှိတယ်။ ဒါပေမဲ့ အတည်ပြုလို့မရဘူး” ဟု မဇ္ဈိမ၏ နေပြည်တော်သတင်းရင်းမြစ်က ဆိုသည်။

အဆိုပါတွေ့ဆုံမှုနှင့်ပတ်သက်၍ စစ်ကောင်စီဘက်မှ သတင်းတစုံတရာထုတ်ပြန်ခြင်း မရှိသေးသကဲ့သို့ တရားရုံးနှင့်နီးစပ်သူများကလည်း ယင်းကိစ္စကိုမသိရသေးကြောင်း မဇ္စျိမကို ပြောသည်။

နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အား စစ်ကောင်စီလက်အောက်ခံ အထူးတရားရုံး က အမှု ၁၉ မှုအတွက် ထောင်ဒဏ် ၃၃ နှစ်ချမှတ်ခဲ့ပြီး နေပြည်တော်အချုပ်ထောင်တွင် ဖမ်းဆီးထိန်း သိမ်းထားခြင်းဖြစ်သည်။

ပြီးခဲ့သည့် ၂၀၂၂ ခုနှစ်၊ နိုဝင်ဘာလအတွင်းက စစ်ကောင်စီ၏စီစဉ်ပေးမှုဖြင့် ဒေါ်စန္ဒာမင်းအပါအဝင် သုံးဦးသည် ဒေါ်အောင်ဆန်းစုကြည်ထံသွားရောက်တွေ့ဆုံခဲ့သော်လည်း အတိုင်ပင်ခံပုဂ္ဂိုလ်အနေဖြင့်မည် သည့်မှတ်ချက်မှပြန်မပေးကြောင်း ဒေါ်စန္ဒာမင်းက BBC Burmese နှင့် သီးသန့်အင်တာဗျူးတွင် ဖြေကြား ခဲ့သည်။

လက်ရှိတွင် စစ်ကောင်စီက နိုင်ငံတော်၏အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ထံ တပတ်လျှင် တကြိမ် ထောင်ဝင်စာပစ္စည်းပို့ခွင့်ပေးထားပြီး ရှေ့နေအဖွဲ့မှ အမှုကိစ္စအတွက် လူချင်းတွေ့ဆုံခွင့် တင်ပြ ထားသော်လည်း ခွင့်မပြုသေးပေ။ အသေးစိတ်ကို မဇ္ဈိမအနေဖြင့် ဆက်လက်စုံစမ်းနေဆဲဖြစ်သည်။

စာတည်း ။ ။ Alden

စာမူတည်းဖြတ်။ ။စောဖေ

#အတိုင်ပင်ခံပုဂ္ဂိုလ်

#ဒေါ်အောင်ဆန်းစုကြည်

#စစ်ဗိုလ်ချုပ်

#တွေ့ဆုံ