ရှမ်းပြည်နယ်မြောက်ပိုင်းတွင် စစ်ကောင်စီတပ်နှင့် မြန်မာအမျိုးသား ဒီမိုကရက်တစ် မဟာမိတ်တပ်မတော် ကိုးကန့် (MNDAA)တို့ တိုက်ပွဲဖြစ်ပွားခဲ့ရာ စစ်ကောင်စီတပ်မှ ၂၀ ဦးကျော် သေဆုံး၊ ဒဏ်ရာရခဲ့သည်ဟု ကိုးကန့်သတင်းကွန်ရက်မှ ထုတ်ပြန်သည်။
ဇွန်လ ၅ ရက်တစ်နေ့က မဟာမိတ်တပ်နှင့် အာဏာသိမ်းတပ်ဖွဲ့တို့ကြား တိုက်ပွဲများ ဖြစ်ပွားခဲ့ရာ ဒါကိုးဇီ၊ ဘိုင်ရှာဂေါကျေးရွာနှင့် ဇီရှုးတောင်တန်း၊ Dakouzi တို့တွင် တိုက်ပွဲပြင်းထန်ခဲ့ကြောင်း ထုတ်ပြန်ချက်တွင် ဖော်ပြထားသည်။
MNDAA ပူးပေါင်းတပ်နှင့် စစ်ကောင်စီတပ်တို့အကြား အပြန်အလှန် တိုက်ပွဲဖြစ်ပွားခဲ့ခြင်းဖြစ်ပြီး စက် သေနတ် ကျည်အတောင့် ၂၃၀ ၊ ဒုံးကျည်များ၊ မိုင်းများနှင့် စစ်ဘက်ဆိုင်ရာပစ္စည်းအချို့ကို သိမ်းဆည်း ရမိခဲ့သည်ဟု ဆိုသည်။
နှစ်ဖက်ထိတွေ့တိုက်ပွဲအခြေအနေကို ယခုထက်ပို၍သိရှိနိုင်ရန် မဇ္ဈိမအနေဖြင့် MNDAA တာဝန်ရှိသူများ ထံသို့ ဆက်သွယ်မေးမြန်ရန် ကြိုးပမ်းနေဆဲဖြစ်သည်။
စစ်ကောင်စီတပ်နှင့် MNDAA ပူးပေါင်းတပ်များသည် ပြီးခဲ့သည့် ဇွန်လ ၁ ရက်နေ့မှစတင်ပြီး တိုက်ပွဲများ အပြန်အလှန်ဖြစ်ပွားနေခြင်းဖြစ်သည်။
တရုတ်နိုင်ငံ၏စီစဉ်ပေးမှုဖြင့် ညီနောင်မဟာမိတ်အဖွဲ့သုံးဖွဲ့ဖြစ်သည့် မြန်မာအမျိုးသား ဒီမိုကရက်တစ် မဟာမိတ်တပ်မတော် (MNTJP၊MNDA)၊ ရက္ခိုင့်အမျိုးသားအဖွဲ့ချုပ်/ရက္ခိုင့်တပ်တော်(ULA၊AA)၊ ပလောင် ပြည်နယ် လွတ်မြောက်ရေးတပ်ဦး/တအာင်းအမျိုးသား လွတ်မြောက်ရေးတပ်မတော် (PSLF၊ TNLA) နှင့် စစ်ကောင်စီ၏ ငြိမ်းချမ်းရေးအဖွဲ့တို့ ရှမ်းပြည်နယ်အရှေ့ပိုင်းမိုင်းလားမြို့တွင် ဇွန်လ ၁ ရက်နေ့က စတင် တွေ့ဆုံခဲ့ကြသည်။
နှစ်ရက်တာကျင်းပသည့် အစည်းအဝေးသည် ဇွန်လ ၁ ရက်နေ့တရက်တည်းသာ ဆွေးနွေးချက်များထွက် ခဲ့ပြီး ဇွန်လ ၂ ရက်နေ့တွင် မည့်သည့် ဆုံးဖြတ်ချက်မှထွက်ပေါ်လာခြင်းမရှိဘဲ ပြီးဆုံးသွားခဲ့သည်။
Photo- the Kokang
စာတည်း ။ ။ Alden
စာမူတည်းဖြတ်။ ။စောဖေ
