မန္တလေးတိုင်း၊ မြင်းခြံခရိုင်၊ တောင်သာမြို့နယ်၊ ဇရပ်ကြီးကျေးရွာတွင် တပ်စွဲထားသော အင်အား ၂၅ ဦးခန့်ပါ စစ်ကောင်စီတပ်သားများကို ဒေသကာကွယ်ရေးပူးပေါင်းတပ်ဖွဲ့ဘက်မှ လက်နက်ကြီး၊ လက်နက်ငယ်များဖြင့် အလစ်အငိုက် ဝင်ရောက်တိုက်ခိုက်ခဲ့ကြောင်း မြင်းခြံခရိုင် အမှတ်(၈) တပ်ရင်း - NRDF မှ ဇွန်လ ၅ ရက်နေ့တွင် ထုတ်ပြန်သည်။
ဇရပ်ကြီးကျေးရွာအရှေ့ဘက် ဘုန်းကြီးကျောင်းအလွတ်တွင် တပ်စွဲထားသော တပ်မ (၈၈) လက်အောက်ခံ စစ်ကောင်စီတပ်သားများနှင့် ၎င်းတို့လက်နက်တပ်ဆင်ပေးထားသော ပျူစောထီးများကို ဇွန်လ ၂ ရက်နေ့ ညနေ ၄ နာရီခန့်တွင် အလစ်အငိုက် ဝင်ရောက်တိုက်ခိုက်ခြင်း ဖြစ်သည်။
“ စစ်ကောင်စီတပ်ဘက်မှ သေဆုံးတာတွေကိုတော့ ကျွန်တော်တို့ ပစ်ခတ်နေတဲ့ရှေ့မှာပဲ ဒီကောင်တွေ ထိတာဆိုတော့ ကိုယ်တွေ့မြင်နေရတာလေ။ ရန်သူ့ဘက်က ခြောက်ဦး သေဆုံးပြီး ဒဏ်ရာရတဲ့သူ တော်တော်များတယ်ဗျ။ တပ်ကြပ်တစ်ဦးကတော့ ဆေးရုံတင်ထားရတယ် ” ဟု မြင်းခြံခရိုင် အမှတ်(၈) တပ်ရင်း - NRDF မှ တာဝန်ရှိသူက ပြောသည်။
ဇရပ်ကြီးကျေးရွာသည် တောင်သာမြို့မှ ခုနစ်မိုင်ခန့်အကွာတွင် တည်ရှိသော ကျေးရွာဖြစ်ပြီး အပြန်အလှန်ပစ်ခတ်မှုကြာချိန် နှစ်နာရီခန့်ရှိခဲ့ကြောင်း သိရသည်။
“အဓိက အခက်အခဲကတော့ လက်နက်ခဲယမ်းပေါ့ဗျာ။ လက်နက်ခဲယမ်း မလုံလောက်တော့ ကျွန်တော်တို့ လိုချင်တဲ့ Target ထိ မရောက်ဘဲ ပြန်ပြန်ဆုတ်ခဲ့ရတာ၊ တိုက်ပွဲအတွင်း အရပ်သားထိခိုက်မှုမရှိပါဘူး ” ဟု NRDF တာဝန်ရှိသူက ဆက်ပြောသည်။
စစ်ကောင်စီတပ်ဘက်မှ ထိခိုက်သေဆုံးမှုနှင့်ပတ်သက်၍ မဇ္ဈိမအနေဖြင့် သီးခြား အတည်အပြုနိုင်ခြင်း မရှိသေးပေ။
တိုက်ခိုက်မှုကို Natogyi People Defence Force မြင်းခြံခရိုင်အမှတ် (၄) တပ်ရင်းနှင့်အတူ မြင်းခြံခရိုင်အမှတ် (၁) တပ်ရင်း ၊ မြင်းခြံခရိုင်အမှတ်(၃)တပ်ရင်း ၊ မြင်းခြံခရိုင်အမှတ်(၈) တပ်ရင်း တို့ပူးပေါင်း၍ တိုက်ပွဲဆောင်ရွက်ခဲ့ခြင်းဖြစ်ကြောင်း သိရသည်။
စာတည်း ။ ။ Alden
စာမူတည်းဖြတ်၊၊ ။ သန့်ဇော်(သန်လျင်)