မန္တလေးတိုင်း၊ ပုသိမ်ကြီးမြို့နယ်၊ မြကန်သာကျေးရွာအုပ်ချုပ်ရေးရုံးမှူးရုံးတွင် တပ်စွဲထားသည့် စစ်ကောင်စီတပ်ဖွဲ့တိုက်ခိုက်ခံရပြီးနောက် လူငယ်နှစ်ဦးကို စစ်ကောင်စီတပ်က ဖမ်းဆီးသွားပြီး မြကန်သာရွာအတွင်း အိမ်ငှားနေထိုင်သူစာရင်းများကိုကောက်ယူနေကြောင်းသိရသည်။
မြကန်သာကျေးရွာအုပ်ချုပ်ရေးရုံးမှူးရုံးတွင် တပ်စွဲထားသည့် စစ်ကောင်စီတပ်ဖွဲ့သည် မေ ၁၈ရက်၊နံနက် ၁၀နာရီခန့်တွင် လက်နက်ကြီးဖြင့် ပစ်ခတ်တိုက်ခိုက်ခံခဲ့ရခြင်းဖြစ်သည်။
"မနေ့ မနက်က ဖြစ်သွားတာဗျ။သေတာတော့ မကြားဘူး။ထိတာတွေတော့ရှိတယ်။လူမှုကူညီရေးအသင်းကား နှစ်စီးပေါ်တင်သွားတာမြင်တယ်။ဘယ်နှစ်ယောက်ဆိုတာတော့ မသိဘူး" ဟု မြကန်သာရွာသားတစ်ဦးက ယနေ့ မေလ ၁၉ရက်တွင် မဇ္ဈိမကို ပြောသည်။
ပစ်ခတ်ခံရပြီးနောက် စစ်ကောင်စီတပ်ဖွဲ့က မြကန်သာ ကျေးရွာပတ်ဝန်းကျင်ကို ပိတ်ဆို့ရှာဖွေခဲ့ပြီး ဆိုင်ကယ်စီးလာသည့် လူငယ်နှစ်ဦးကို ရိုက်နှက် ဖမ်းဆီးသွားကြောင်းသိရသည်။ စစ်ကောင်စီတပ်သားများသည် ယနေ့ မေလ ၁၉ရက်တွင် မြကန်သာရွာအတွင်းသို့ အရပ်ဝတ်များဖြင့် ဝင်ရောက်ကာ ကျေးရွာအုပ်ချုပ်ရေးမှူး နေအိမ်တွင်ရောက်ရှိနေပြီး ရွာအတွင်း အိမ်ငှားနေထိုင်သူစာရင်းများကိုကောက်ယူနေကြောင်းသိရသည်။
"အဖမ်းခံရတာတော့ ရွာကမဟုတ်ဘူးဗျ။ဒီအတိုင်း ဖြတ်သွား ဖြတ်လာပဲ။ တားပြီး ဖမ်းသွားတာ။နောက်ထပ်တော့ ဘာမှ မကြားရဘူး"ဟု မြကန်သာ ရွာသား တစ်ဦးကပြောသည်။
စစ်ကောင်စီတပ်ဖွဲ့တပ်စွဲထားသည့် မြကန်သာကျေးရွာအုပ်ချုပ်ရေးမှူးရုံးကို ၄၀ မမ ဗုံးပစ်လောင်ချာဖြင့် ပစ်ခတ်ခဲ့ခြင်းဖြစ်ပြီး တိုက်ခိုက်မှုကို ပုသိမ်ကြီးမြို့နယ် ပြည်သူ့ကာကွယ်ရေးတပ်ဖွဲ့နှင့် ပူးပေါင်း လုပ်ဆောင်ခဲ့ကြောင်း နတ်ဆိုးမြေအောက်တော်လှန်ရေးတပ်ဖွဲ့ ဦးဆောင်သူ ဗိုလ်နတ်ဆိုးကပြောသည်။
စာတည်း - မောင်ကြီး
