စစ်တပ်က အာဏာသိမ်းပြီး နောက် ထိုင်းနိုင်ငံဘက်သို့ ထွက်ပြေးတိမ်းရှောင်နေရသည့် NLD အစိုးရ၏ တနင်္သာရီတိုင်းစိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဟောင်း ဦးမြင့်စန်းသည် ကင်ဆာရောဂါဖြင့် ယနေ့ မေလ ၁၇ ရက်နံနက်ပိုင်းတွင် ကွယ်လွန်သွားကြောင်း သတင်းရရှ်ိသည်။
" ဦးမြင့်စန်းကွယ်လွန်သွားပါတယ်။ ဒီနေ့ပဲ။ ကင်ဆာရောဂါနဲ့လို့ ကြားတယ်။ သူ အဲ့လောက်အထိ ကျန်းမာရေးချုချာနေတယ်ဆိုတာ မသိဘူး" ဟု NLD ပါတီဝင် လွှတ်တော်ကိုယ်စားလှယ်တစ်ဦးကပြောသည်။
ဝန်ကြီးဟောင်း ဦးမြင့်စန်းသည် ကွယ်လွန်ချိန်တွင် အသက် ၆၇ နှစ်ရှိပြီဖြစ်သည်။၎င်းသည် ၂၀၁၅ ရွေးကောက်ပွဲတွင် အမျိုးသားဒီမိုကရေစီအဖွဲ့ချုပ်ပါတီ-NLDကိုယ်စားပြုကာ လောင်းလုံးမြို့နယ် မဲဆန္ဒနယ် အမှတ် (၂) မှ ဝင်ရောက်ယှဉ်ပြိုင်ပြီး အနိုင်ရခဲ့သည်။ထို့နောက် တနင်္သာရီတိုင်း အစိုးရအဖွဲ့တွင် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးအဖြစ် တာဝန်ထမ်းဆောင်ခဲ့သည်။
၂၀၂၀ ရွေးကောက်ပွဲတွင်လည်း ယခင် မဲဆန္ဒနယ်မှပင် ထပ်မံရွေးကောက်ခံရာအနိုင်ရခဲ့ပြီး စစ်အာဏာသိမ်းပြီးနောက် လွတ်မြောက်နယ်မြေသို့ ထွက်ပြေးတိမ်းရှောင်ခဲ့ရသည်။ထို့နောက် ကျန်းမာရေးအခြေအနေကြောင့် ထိုင်းနိုင်ငံဘက်သို့ ကူးကာ ဆေးကုသမှုခံယူနေစဉ် ကွယ်လွန်ခဲ့သည်ဟု သိရသည်။
" သူကလူတော်တစ်ယောက်ပါ။ သူ့ယုံကြည်ချက်အတိုင်း ရပ်တည်သူပါ။ ပုဂ္ဂိုလ်ရေးအရ လေးစားရတဲ့ နိုင်ငံရေးသမားတစ်ယောက်ပါ"ဟု ၂၀၂၀ ခုနှစ်ရွေးကောက်ပွဲအနိုင်ရ လွှတ်တော်ကိုယ်စားလှယ်တစ်ဦးကပြောသည်။
စာတည်း- မောင်ကြီး
