ကရင်အမျိုးသားအစည်းအရုံး (KNU)၊ တပ်မဟာ (၃) နယ်မြေ၊ ညောင်လေးပင်ခရိုင်၊ ကျောက်ကြီးမြို့နယ်မှ ဒေသခံတစ်ဦးအား စစ်ကောင်စီတပ်သည် ၁၀ ရက်အကြာ ဖမ်းဆီးချုပ်နှောင်ထားခဲ့ပြီး ပြန်လွှတ်ချိန်တွင် ခန္ဓာကိုယ်အား ဓာတ်ဆီလောင်း မီးရှို့ခဲ့ကြောင်း KNU ၏ ထုတ်ပြန်ချက်အရ သိရသည်။
ပြီးခဲ့သည့် ဧပြီလ ၂၄ ရက်နေ့က ကျောက်ကြီးမြို့နယ်၊ ကျောက်မော်ဘုရားကြီးကျေးရွာနေ အသက် ၄၀ နှစ်အရွယ်ရှိ စောအယ်မူးသည် ရွှေကျင်မြို့တွင် ဈေးဝယ်ရန် သွားစဉ် စစ်ကောင်စီတပ် ခလရ(၅၇) ၏ ဖမ်းဆီးခံခဲ့ရခြင်းဖြစ်သည်။
" ဖမ်းဆီးရသည့် အကြောင်းအရင်းမှာ စောအယ်မူးသည် KNLA ၏ တပ်သားတစ်ဦးဖြစ်သည့်အပြင် စစ်ကောင်စီတပ်အား ဆန့်ကျင်သူဖြစ်သည်ဟု စွပ်စွဲကာ ဖမ်းဆီးချုပ်နှောင်ခဲ့ခြင်းဖြစ်သည်" ဟု KNU ထုတ်ပြန်ချက်တွင် ဖော်ပြထားသည်။
စောအယ်မူးအား ခလရ(၃၄၉) စခန်းသို့ ခေါ်ဆောင်သွားခဲ့ပြီး ဖမ်းဆီးထားသည့်ကာလအတွင်း ၎င်း၏ ခြေ၊ လက်များအား ကြိုးများဖြင့် တင်းတင်းကျပ်ကျပ် ပတ်ထားခဲ့ပြီး ထိုစစ်ကောင်စီတပ်သားများက ၎င်းအပေါ် နေ့စဉ် ကျင်ငယ်စွန့်ကြကြောင်း သိရသည်။
စောအယ်မူးအား ဖမ်းဆီးခဲ့ပြီး ၁၀ ရက်အကြာ၊ မေလ ၃ ရက်နေ့တွင် ပြန်လွှတ်ပေးခဲ့သော်လည်း ပြန်လွှတ်ပေးချိန်တွင် စောအယ်မူး၏ မျက်နှာအား အဝတ်စ စည်း၍ တစ်ကိုယ်လုံးအား ဓာတ်ဆီလောင်းကာ မီးရှို့ခဲ့ပြီး ထိုအချိန်တွင်လည်း စောအယ်မူး၏ ခန္ဓာကိုယ်အပေါ် ကျင်ငယ်စွန့်ခဲ့ကြသေးကြောင်းသိရသည်။
" အခုတော့ ဆေးကုသမှု ခံယူနေရပါတယ်။ စိတ်ပိုင်းဆိုင်ရာ အခြေအနေနဲ့ပက်သက်ပြီး အတွင်းလူနာ ဖြစ်တဲ့အတွက် အသေးစိတ် ပြောပြလို့မရသေးပါဘူး" ဟု စောအယ်မူး၏ လက်ရှိအခြေအနေအား ထိုသတင်းအရင်းအမြစ်က ပြောသည်။
ပြီးခဲ့သည့် ဧပြီလ ၁၃ ရက်နေ့ကလည်း စားဝတ်နေရေးအတွက် သွားလာနေသော ကျောက်မော်ဘုရားကြီးကျေးရွာမှ ဒေသခံငါးဦး၊ ကော်သာစေးကျေးရွာမှ ဒေသခံတစ်ဦး စုစုပေါင်း ခြောက်ဦးအား စစ်ကောင်စီတပ်က ပန်းအင်းကျေးရွာတွင် ဖမ်းဆီးသွားခဲ့ပြီး တစ်ဦးအား နေ့တွင်းချင်း ပြန်လွှတ်ပေးခဲ့သော်လည်း ကျန်ငါးဦးအား ဧပြီလ ၂၂ ရက်နေ့တွင်မှ လွှတ်ပေးခဲ့ကြောင်း သိရသည်။
စာတည်း- သန့်ဇော်(သန်လျင်)