“မီးလာနေတာလား၊ မလာဘူး၊ ဘာမီးလဲ ဒါက၊ မီးစက်နှိုးထားတာ”ဟူသော အမေးအဖြေ ဗီဒီယိုတစ်ခုမှာ ရန်ကုန်မြို့ရဲ့ ဘလော့ကာတစ်ယောက်က ရန်ကုန်မြို့ထဲမှာ မီးအလင်းရောင်အနည်းငယ်ရှိသည့် တည်းခိုခန်းတွေ စားသောက်ဆိုင်တွေနဲ့ လမ်းဘေးမုန့်ဆိုင်လေးတွေကို မီးလာနေတာလားဆိုတာကို လိုက်လံမေးမြန်းပြီး ဗီဒီယို ရိုက်ကူးထားတာဖြစ်သည်။

လတ်တလောတွင် မီးလာလား ဆိုသောမေးခွန်းသည် ဖျော်ဖြေစရာ ၊ ဘလော့ရိုက်စရာခေတ်စားနေသော၊ ပေါ်ပြူလာဖြစ်နေသော စကားလုံးတစ်ခုဖြစ်ပြီး သူငယ်ချင်းအချင်းချင်း မိတ်ဆွေများ အချင်းချင်း တွေ့ဆုံသည့်အခါ ဖုန်းပြောသည့်အခါ " အဲ့ဘက် မီးလာလား" ဆိုသော မေးခွန်းသည် နှုတ်ဆက်စကားတစ်ခု ဖြစ်သည်။ ထို့အပြင် အွန်လိုင်း ရှော့ပင်ရောင်းသူတစ်ဦးက ဖယောင်းတိုင်ထွန်း၍ စျေးရောင်းနေသည့် Live လွှင့်စျေးရောင်းသည့်ဗီဒီယိုတစ်ခုကို လူမှုကွန်ရက်အသုံးပြုသူများမှ သဘောကျကြပြီး ၎င်းတို့ ဖေ့ဘွတ်စ်များတွင် ပြန်လည် ဝေမျှမှုလုပ်ဆောင်ကြသည်ကို တွေ့ရသည်မှာလည်း မီးလာခြင်း မလာခြင်းသည် လူစိတ်၀င်စားစရာ ကြော်ငြာတစ်ခုကဲ့သို့ ဖြစ်လာသည့် သဘောဖြစ်သည်။

ထို့အပြင် လျှပ်စစ်စွမ်းအား၀န်ကြီးဌာနမှ ရန်ကုန်မြို့ရှိ စျေး၀ယ်စင်တာများ၊ ဟိုတယ်များ၊ နေအိမ်များ ၊ စက်မှုဇုန်များရှိ စက်ရုံများ၊ အလုပ်ရုံများ၏ ပိုလျှံနေသော လျှပ်စစ်ဓာတ်အားကို ၀ယ်ယူမည်ဟူသော ထုတ်ပြန်ချက်သည်လည်း လူမှုကွန်ရက် အသုံးပြုသူများကြားတွင် ရယ်စရာဟာသတစ်ခု ဖြစ်နေခဲ့ပြန်သည်။

သို့သော် တကယ့်လက်တွေ့ဘ၀များတွင် မီးမလာခြင်းသည် ရယ်စရာဟာသတစ်ခု ၊ ဖျော်ဖြေစရာ ရသတစ်ခု ဖြစ်မနေခဲ့ပေ။

ရန်ကုန်မြို့ အသေးစားစက်မှုလုပ်ငန်းလုပ်ဆောင်နေသူတစ်ဦးဖြစ်သည့် ကိုအေး၀င်းသည် မီးပုံမှန်လာခြင်းမရှိသည့် အခက်အခဲများကြောင့် လက်ရှိလုပ်ကိုင်နေသည့် လုပ်ငန်းကိုရပ်၍ တက္ကစီမောင်းရန်ပင် ပြင်ဆင်နေပြီဟု ပြောသည်။

“ အလုပ်သမား သုံးယောက် ခေါ်ထားတာရှိတော့ညနေကျရင် လုပ်အားခကို အပြည့်ရှင်းပေးရတယ်။ မီတာခတွေ စက်ရုံဌားခတွေနဲ့ကျတော့ စားဖို့တောင် မရဖြစ်လာလို့ အိမ်စားရိတ်ဆို အိတ်စိုက်တွေပါ ဖြစ်လာပြီ။ အဲ့ဒါကြောင့် ကားဌားပြီး ဆွဲမလို့တောင် မေးထားတယ်။ မီးလာတဲ့အချိန် ရှိတဲ့အလုပ်ကလေး လုပ်ပြီး မီးပျက်တဲ့အချိန် ကားထွက်ဆွဲမလို့လေ” ဟုကိုအေး၀င်းကပြောသည်။

လျှပ်စစ်မီးပြတ်တောက်ခြင်းကြောင့် အလုပ်အချိန်မီ

မလုပ်နိုင်ခြင်းနှင့် အလုပ်အချိန်မီမပြီးသည့်အတွက် အလုပ်အပ်သူများလျော့နည်းသွားပြီး အလုပ်အပ်ထားသည်များကိုလည်း အလျင်မီအောင်လုပ်ဆောင်နိုင်ခြင်း မရှိကြောင်းကိုအေး၀င်းက ဆိုသည်။

ထို့အပြင် ရန်ကုန်မြို့တွင်းရှိ စက်ရုံ၊ အလုပ်ရုံများ အများဆုံးရှိသည့် စက်မှုဇုန်များကို ယခုလ ဧပြီ ၂၄ရက်မှစ၍ တစ်ရက်ခြားတစ်ခါ လေးနာရီမီးပေးသည့် စနစ် ပြုလုပ်ထားကြောင်းသိရသည်။ ဥပမာ-၂၅ရက်နေ့တွင် နံနက် ၉နာရီမှ ၁နာရီအထိ မီးရပါက ကျန်သည့် အချိန်များနှင့် ၂၆ရက် တစ်ရက်လုံး မီးပြတ်ခြင်း ဖြစ်သည်။

သံပန်းသံတံခါး လုပ်ဆောင်သူတစ်ဦးဖြစ်သော အမည်မဖော်လိုသည့် လုပ်ငန်းရှင်တစ်ဦးသည်လည်း ၎င်းကိုယ်ပိုင်အလုပ်ကိုရပ်နားပြီး နေ့စားအလုပ်သမား၀င်လုပ်ရန်ပဲ ရှိတော့ကြောင်း ပြောသည်။

“ ကျွန်တော်တို့အလုပ်တွေက ဒီလျှပ်စစ်မီးနဲ့ လုပ်ရတာလေ ။ မီးက ပြတ်ချင်ပြတ် လာချင်လာတော့ ဘာမှန်းကို မသိပါဘူး။ အလုပ်တောင် ဖြုတ်ပစ်ရမလို ဖြစ်နေပြီ ။ ဆက်ပဲတောင့်ခံထားရမလား ၊ ခဏပဲရပ်ထားလိုက်ရမလား စဉ်းစားရပြီ။ ရပ်ထားတော့လဲ ကိုယ်ကလဲ ဒီအလုပ်ပဲ လုပ်တတ်တာ ။ ကိုယ့်ကိုယ်ပိုင်အလုပ်ကို ရပ်ပစ်လိုက်ရင် သူများဆီမှာ နေ့စားသဘောမျိုး ၀င်လုပ်ဖို့ပဲ ရှိတော့မှာ ။ တော်တော်တော့ စိတ်ပျက်နေပါပြီဗျာ”ဟု ၎င်းက ပြောသည်။

စစ်အာဏာသိမ်းပြီးနောက်မှာ လျှပ်စစ်မီးဟာ အလှည့်ကျပေးတဲ့ စနစ်တစ်ခုကို ပြန်လည်ရောက်ရှိလာခဲ့ပြီး အလှည့်ကျ မီးပေးသည်ဟုဆိုသော်လည်း မီးပြတ်သည့် အချိန်သာ ပိုမို များပြားလာခဲ့ခြင်းဖြစ်သည်။ မီးပြတ်ခြင်းကြောင့် မီးစက်များဖြင့် အလုပ်လုပ်ကိုင်ရသည့်အခါ ဆီဖိုးများကုန်ကျမှုကြောင့် အမြတ်ရရှိမှု နည်းလာကြောင်း သံပန်း သံတံခါး လုပ်ငန်းရှင်က ပြောသည်။

“မီးပြတ်တဲ့အခါ ၀ရိန်ဆော်တာ ဘာညာကျတော့ မီးစက်နဲ့လုပ်ရတော့ ဆီဖိုးတွေ ပိုကုန်တာပေါ့ဗျာ။ မီးစက်က တောက်လျှောက်မောင်းတော့လည်း မရတော့ ခဏအနားပေးလိုက် ပြန်လုပ်လိုက်ဆိုတော့ ရက်ပိုပြီး အချိန်ယူရတာပေါ့။ အဲ့တော့ အလုပ်သမားခ ပိုရှင်းရတယ်။ ကိုယ့်အမြတ်က ရတန်သလောက် မရတော့ဘူး”ဟု ၎င်းက ပြောသည်။

ထို့အပြင် ယခင်က ပုံမှန် အပ်ထည်ရရှိသည့် ၎င်းလုပ်ငန်းသည် ၂၀၂၂ နောက်ပိုင်းမှစ၍ ယနေ့အထိ အဆင်မပြေတော့ကြောင်း ပြောသည်။

ကိုအေး၀င်းတို့လို အသေးစားစက်မှုလုပ်ငန်းတွေဟာ လျှပ်စစ်မီးပြတ်တောက်ခြင်းတွေဟာ အခက်အခဲတွေကြုံနေရသလို တခြားသာမန်ပြည်သူလူထုတွေအကုန်လုံးဟာလည်း လျှပ်စစ်မီးပြတ်တောက်ခြင်းကြောင့် လူမှုဘ၀တွေမှာ ထိခိုက်မှုတွေ အများကြီး ရှိလာနေခဲ့သည် ။ ထမင်းဟင်းချက်ပြုတ်တာကစလို့ ဖုန်းအားသွင်းတာအထိ အဆင်မပြေမှုတွေဟာ ပုံမှန်လို ဖြစ်လာနေခဲ့ပါသည်။

လူမှုကွန်ရက်တွင်လည်း EPCရုံးချုပ်သို့ ရင်ဖွင့်သံများ ၊ ရန်ကုန် မီးပြတ် ရေပြတ်သတင်းများ ၊ လျှပ်စစ်မီတာခ တိကျ မှန်ကန်စေချင်သူများ အစရှိသည့် ဖေ့ဘွတ်စ် ဂရုများသည်လည်း updateအဖြစ်ဆုံးဂရုများထဲတွင်ပါဝင်ပြီး လူမှုကွန်ရက်အသုံးပြုသူများ၏ ရင်ဖွင့်သံများ ၊ စာများသည်လည်း အချိန်နှင့်အမျှ တွေ့နေရသည်။

“ မီးလာချိန် တစ်နာရီပဲပေးပေး၊ နှစ်နာရီပဲပေးပေး လာချိန် ပြတ်ချိန် အချိန်မှန်စေချင်တယ်။ ရန်ကုန်မြို့နေ လူထုဆိုတာ အလုပ်သွားချိန် ပြန်ချိန် ကားစောင့်ချိန် အားလုံးခန့်မှန်းတွက်ချက် လုပ်ကိုင်ရတာ ။ ချက်နေရင်း တန်းလန်း မီးကပြတ် မီးမွှေး ရှုပ်ကုန် ကားကမမှီ ည ၃ နာရီထမင်းထချက်တာတောင် ထမင်းအိုးတန်းလန်း မီးကပြတ် “ဟု လူမှုကွန်ရက် အသုံးပြုသူတစ်ဦးက ဝေဖန်ပြောဆိုထားသည်ကိုလည်းတွေ့ရသည်။

ထို့အပြင် “ မီးပြတ်တာကို မပြောလိုဘူး၊ မီးပေးတဲ့အခါတော့ နှစ်နာရီ သုံးနာရီ အတိအကျပေးလေ။ ထမင်းဟင်းချက် ရေတင် အဆင်ပြေအောင်လို့။ ခုတော့ ငါးမိနစ်လာလိုက် ပြတ်လိုက် အကြာကြီးနေမှ ၁၅မိနစ်လောက်ပေးလိုက် ပြန်ပြတ်လိုက်နဲ့ ငါတို့က ..လုပ်ရမှာလား။ အိမ်သုံးနေတဲ့ ပစ္စည်းတွေက အလကားရထားတာာ တစ်ခုမှ မပါဘူး”ဟု အဆိုပါဂရုမှမန်ဘာဝင် တစ်ဦးကလည်း ယခုလို ပြောထားသည်ကို တွေ့ရသည်။

အိမ်သုံးလျှပ်စစ်များအတွက် မေလ ၁ရက်နေ့မှစတင်၍ ၂နာရီပေး ၄နာရီပိတ် စနစ်ကို ပြုလုပ်သွားမည်ဖြစ်ပြီး အုပ်စု ၃စုခွဲကာ အလှည့်ကျ မီးပေးသွားမည်ဟုလည်း လျှပ်စစ်ဝန်ကြီးဌာနမှ ထုတ်ပြန်ထားသည်။ နံနက် ၆နာရီမှ ည၁၂နာရီအထိ အုပ်စု ၃စုအတွက် အလှည့်ကျ မီးပေးကာ ည၁၂နာရီမှ နံနက် ၆နာရီအထိ အုပ်စု ၁စုအတွက် မီးအပြည့်အဝပေးမည်ဖြစ်ပြီး တစ်နေ့လျှင် အုပ်စု၁စုသည် ည၁၂နာရီမှ နံနက်၆နာရီအထိ အလှည့်ကျ မီးအပြည့်အဝ ပုံမှန်ရရှိနေမည်ဖြစ်သည်ဟုလည်း ၎င်းတို့ထုတ်ပြန်ချက်ထဲတွင်ဖော်ပြထားသည်။

ထို့ကြောင့် မီးလာလျှင် “ဟေး” ဟု ပျော်၍ မီးပြတ်လျှင် “ ဟာ “ကနဲ အော်သည့် ၂၀၀၀ခုနှစ် အလွန်လက်ထက်ကို ပြန်ရောက်နေကြသည့် အနေအထားတစ်ခုထဲတွင် ပြည်သူလူထုအားလုံးသည် ဆက်လက်ရင်ဆိုင်ရပ်တည်နေကြရပြီး မီးပြတ်ခြင်းသည် ၎င်းတို့အတွက် မရယ်ရသည့် ဟာသတစ်ခုဖြစ်လာခဲ့တော့သည်။