ကရင်အမျိုးသားအစည်းအရုံး( KNU)၍ တပ်မဟာ (၂) နယ်မြေ၊ တောင်ငူခရိုင်၊ ကရင်ပြည်နယ်၊ သံတောင်မြို့ (၁၃) မိုင်တွင် စစ်ကောင်စီတပ်မှ ပစ်ခတ်သော လက်နက်ကြီးကျည် ထိမှန်၍ အဖွားအိုတစ်ဦး ထိခိုက်ဒဏ်ရာရခဲ့ကြောင်း ဒေသတွင်း သတင်းအရင်းအမြစ်များထံက သိရသည်။
ပြီးခဲ့သည့် ဧပြီလ ၂၅ ရက်နေ့ ည ၈ နာရီဝန်းကျင်မှစ၍ သံတောင်မြို့ ၁၃ မိုင်ရှိ စစ်ကောင်စီတပ်စခန်းမှ ၁၂၀ မမ အမျိုးအစား လက်နက်ကြီး ခုနစ်လုံးခန့် ပစ်ခတ်ခဲ့ခြင်းဖြစ်ပြီး ထိုလက်နက်ကြီးကျည်များသည် သံတောင်မြို့ ဒေမူးလောရပ်ကွက်နှင့် အိုပီကုန်းအတွင်း ကျရောက်ပေါက်ကွဲခဲ့ခြင်းဖြစ်သည်။
စစ်တပ်မှ ပစ်ခတ်သော ထိုလက်နက်ကြီးကျည် ကျရောက်မှုကြောင့် အိမ်နှစ်လုံးခေါင်းမိုးပြိုကျပျက်စီးခဲ့ပြီး ဒေမူးလောကျေးရွာနေ အသက် ၆၀ အရွယ် အဖွားတစ်ဦး၏ ပေါင်တွင် ထိခိုက်ဒဏ်ရာရခဲ့ကာ တောင်ငူဆေးရုံတွင် ဆေးကုသမှုခံယူနေကြောင်း သိရသည်။
" အခုတော့ တောင်ငူဆေးရုံမှာ ဆေးကုသနေပါတယ်။ နည်းနည်းတော့သက်သာလာပါပြီ။ အမိုးက အိမ်ထဲမှာနေတာပါ။ အိမ်ပေါ်မှာ လက်နက်ကြီးကျလို့ အိမ်ခေါင်မိုးပြိုကျချိန် အိမ်အောက်ပြေးဆင်းရင်း ထိတာပါ" ဟု ဒေသတွင်း သတင်းအရင်းအမြစ်တစ်ဦးက မဇ္ဈိမကိုပြောသည်။
စစ်ကောင်စီတပ်က သံတောင်မြို့နယ်အတွင်း လက်နက်ကြီးများဖြင့် ပစ်ခတ်မှုမတိုင်ခင် ဧပြီလ ၂၅ ရက်နေ့ ည ၇ နာရီခန့်က သံတောင်မြို့ (၇) မိုင်၊ ကျောက်တိုင်လမ်းခွဲရှိ စစ်ကောင်စီတပ်စခန်းတစ်ခုအား ပြည်သူ့ကာကွယ်ရေးတပ်ဖွဲ့ဘက်မှ လက်နက်ကြီးများဖြင့် သွားရောက်ပစ်ခတ်ခဲဲ့ခြင်းရှိပြီး တစ်ပွင့် ဗိုလ်တစ်ဦးအပါအဝင် စစ်ကောင်စီတပ်သား သုံးဦး သေဆုံးခဲ့ကြောင်း သိရသည်။
" ဒီဘက်က သွားပစ်ခဲ့တာရှိတယ်။ (၇) မိုင်က စခန်းကို သွားပစ်ခဲ့တာ။ အဲ့ဒါပြီးတာနဲ့ (၇) မိုင်စခန်းကနေရော (၁၃) မိုင်ကနေပါ ပစ်တာ " ဟု KNU နှင့် နီးစပ်သော သတင်းအရင်းအမြစ်တစ်ဦးက မဇ္ဈိမကိုပြောသည်။
သံတောင်ကြီးမြို့နယ်မှ ဒေသခံများသည် ပြီးခဲ့သည့် ဖော်ဖော်ဝါရီလမှစ၍ စစ်ကောင်စီတပ်၏ လက်နက်ကြီးပစ်ခတ်မှု၊ နေအိမ်များအား မီးရှို့မှု၊ သေခံများအား အကြောင်းမဲ့ ဖမ်းဆီးမှုများကြောင့် နေအိမ်စွန့်ခွာ၊ စစ်ဘေးရှောင်နေကြရပြီး ပြီးခဲ့သည့် ရက်ပိုင်းကမှ နေအိမ်များတွင် ပြန်လည်နေထိုင်ကြခြင်းဖြစ်သော်လည်း ယခုကဲ့သို့ ပစ်ခတ်မှုများကြောင့် ထပ်မံတိမ်းရှောင်ကြရန် စီစဉ်နေကြရကြောင်း ဒေသခံတစ်ဦးထံက သိရသည်။
" ကျွန်တော်တို့ကတော့ ပြန်မနေသေးပါဘူး၊ မပြန်လို့ ဘာမှမဖြစ်ဘူးလေ။ ပြန်သွားကြတဲ့သူတွေလည်း ပြန်လာဖို့ စီစဉ်နေကြပြီ" ဟု ဒေသခံတစ်ဦးက မဇ္ဈိမကိုပြောသည်။
ပြီးခဲ့သည့် မတ်လ ၁၃ ရက်နေ့မှစတင်၍ သံတောင်မြို့ (၁၃) မိုင်တွင် ဘာသာပေါင်းစုံကော်မတီသည် စစ်ကောင်စီတပ်နှင့် တွေ့ဆုံ၍ စစ်ဘေးရှောင်နေရသော ဒေသခံများ နေရပ်တွင် ပြန်နေခွင့်ရရန် ဆွေးနွေးညှိနှိုင်းမှုများ ပြုလုပ်ခဲ့သေးသည်။
စာတည်း- သန့်ဇော်(သန်လျင်)
