ထိုင်းနိုင်ငံဘက်က ပြန်ပို့လာသော မြန်မာရွှေ့ပြောင်းအလုပ်သမား ၁၇၁ ဦးတွင် ကိုးဦး၌ COVID-19 စစ်ဆေးတွေ့ရှိကြောင်း မြန်မာနယ်စပ်မြို့ ကော့သောင်းမှ လူမှုရေးအဖွဲ့အစည်းများအရ သိရသည်။
ထိုင်းနိုင်ငံ ရနောင်းဆိပ်ကမ်းမှတစ်ဆင့် ကရာဘူရီမြစ်ကို ဖြတ်ကာ ကော့သောင်းသို့ မြန်မာရွှေ့ပြောင်းအလုပ်သမားများကို ပြန်လည်ပို့ဆောင်လာခြင်းပဲ ဖြစ်သည်။
“နိုင်ငံဆီ နေရပ်ပြန်လာတဲ့ သူတွေကြားမှာ ကိုးဦးမှာ COVID-19 စစ်ဆေးတွေ့ရှိပါတယ်”ဟု ကော့သောင်းကြက်ခြေနီအသင်း အဖွဲ့ဝင်တစ်ဦးက ပြောသည်။
အဆိုပါ ကူးစက်ခံရသူများကို ကြက်ခြေနီအဖွဲ့က ကော့သောင်းပြည်သူ့ဆေးရုံသို့ ပို့ဆောင်ခဲ့သည်။
ယခု ပြန်ပို့သူများတွင် ၁၂၆ ဦးသည် အမျိုးသားများဖြစ်ပြီး ၄၅ ဦးမှာ အမျိုးသမီးများ ဖြစ်ကြသည်။
၂၀၂၃ အစမှစကာ ရနောင်းအကျဉ်းထောင်တွင် ထိန်းသိမ်းထားသော မြန်မာရွှေ့ပြောင်းအလုပ်သမား ၉၇၃ ဦး ရှိပြီး အုပ်စုသုံးစုခွဲကာ ကော့သောင်းသို့ ပြန်လည်ပို့ဆောင်လျက် ရှိသည်။