အမျိုးသားညီညွတ်ရေး အစိုးရ 

• ဖက်ဒရယ် ဒီမိုကရေစီပညာရေး၏ အုတ်မြစ်ကို ရေရှည်အမြော်အမြင်ရှိရှိဖြင့် စနစ်တကျ တည်ဆောက် ရမည်ဟု အမျိုးသား ညီညွတ်ရေးအစိုးရ၊ ယာယီသမ္မတ ဒူဝါလရှီးလက ယနေ့ကျင်းပ ပြုလုပ်သည့် နွေဦး တော်လှန်ရေးကာလ အဆင့်မြင့်ပညာရေးကဏ္ဍ ပထမအကြိမ် ညီလာခံတွင် ပြောသည်။ 

• အမျိုးသား ညီညွတ်ရေးအစိုးရ၊ ပြည်ထဲရေး နှင့် လူဝင်မှုကြီးကြပ်ရေး ဝန်ကြီးဌာန နှင့် ခရိုင်ပြည်သူ့ အုပ်ချုပ်ရေးအဖွဲ့များ တွေ့ဆုံဆွေးနွေးမှု အစည်းအဝေး (၁၅/၂၀၂၃) ကို ဧပြီ ၂၀ ရက်၊ မွန်းလွဲ ၃ နာရီခန့်က ကျင်းပ ပြုလုပ်ခဲ့သည်။ 

• အမျိုးသား ညီညွတ်ရေးအစိုးရ၊ ကြားကာလဒေသန္တရ ပြည်သူ့အုပ်ချုပ်ရေး ဖော်ဆောင်မှု ဗဟိုကော်မတီ အစည်းအဝေးကို ဧပြီ ၂၀ ရက်က ကျင်းပပြုလုပ်ခဲ့ပြီး အစည်းအဝေးတွင် ကြားကာလဒေသန္တရ ပြည်သူ့အုပ်ချုပ်ရေး ဖော်ဆောင်မှု ဗဟိုကော်မတီ ဥက္ကဋ္ဌ ပြည်ထောင်စု ဝန်ကြီးချုပ် မန်းဝင်ခိုင်သန်းက တော်လှန်ရေးကာလတွင် အချိန်က အရေးကြီးသည့်အတွက် လုပ်ငန်းတာဝန်များကို မလစ်ဟင်းစေဘဲ တတ်နိုင်သရွေ့ လုပ်ဆောင်သွားရန် ပြောကြားခဲ့သည်။ 

တော်လှန်ရေး လှုပ်ရှားမှုများ 

• စစ်ကိုင်းတိုင်း၊ ယင်းမာပင်မြို့နယ် မြောက်ခြမ်း သပိတ်အင်အားစုများ ဦးဆောင်ကာ ယနေ့ ဧပြီ ၂၁ ရက်တွင် စစ်အာဏာရှင် ဆန့်ကျင်ရေး ချီတက်ဆန္ဒပြခဲ့ကြောင်း သိရသည်။ 

• စစ်ကိုင်းတိုင်း၊ ရွှေဘိုမြို့နယ်၊ ကျားရွာကို ယနေ့ ဧပြီ ၂၁ ရက်၊ နံနက် ၉ နာရီခွဲခန့်က အကြမ်းဖက် စစ်တပ်က အင်အားအလုံးအရင်းဖြင့် စစ်ကြောင်းထိုးစီးနင်းလာမှုကြောင့် ရွာလုံးကျွတ် ထွက်ပြေး တိမ်းရှောင်နေရကြောင်း ဒေသခံပြည်သူများက ပြောသည်။ 

• စစ်ကိုင်းတိုင်း၊ ကန့်ဘလူမြို့နယ်၊ ပဇီကြီးရွာကို အကြမ်းဖက်စစ်ကောင်စီတပ်က ဧပြီ ၂၀ ရက်၊ နေ့လယ် ၂ နာရီခွဲက ဂျက်ဖိုက်တာလေယာဉ်ဖြင့် ဗုံးနှစ်လုံးကြဲချပြီး စက်သေနတ်ဖြင့် ပစ်ခတ်သွားသဖြင့် နေအိမ် အလုံး ၁၀၀ ကျော် မီးလောင်ဆုံးရှုံးခဲ့သည်ဟု ဒေသခံများထံမှ သိရသည်၊။ 

• စစ်ကိုင်းတိုင်း၊ ကောလင်းမြို့တွင် အထက ကျောင်းတွင် တပ်စွဲထားသော စစ်တပ်မှ စစ်ကောင်စီတပ်သား တစ်ဦး နှင့် ဇနီးဖြစ်သူတို့ ဧပြီ ၁၇ ရက်တွင် ထွက်ပြေးလာပြီး CDM အဖြစ် အလင်းဝင်လာကြောင်း Kawlin Revolution-KR မှ တာဝန်ရှိသူတစ်ဦးက ပြောသည်။ 

• စစ်ကိုင်းတိုင်း၊ ကလေးမြို့တွင် ဆန္ဒပြစဉ် အဖမ်းခံရသူ နှစ်ဦး နှင့် သပိတ်အင်အားစုဝင် နှစ်ဦး၏ နေအိမ်များကို ဧပြီ ၁၉ ရက် နှင့် ၂၀ ရက်က စစ်ကောင်စီတပ်ဖွဲ့က ဖြိုချဖျက်ဆီးခဲ့ကြောင်း ကလေးမြို့ ပင်မသပိတ်အင်အားစု အဖွဲ့ဝင် တစ်ဦးက ပြောသည်။ 

• မီးဘေးသင့် ပြည်သူများအတွက် ကျောက်လုံးကြီး KLG PDF အဖွဲ့မှ မျောတိုင်များကို ခုတ်၍ မီးဘေးသင့် ပြည်သူများကို နေအိမ်များ ဆောက်လုပ်လှူဒါန်းခဲ့ကြောင်း ကျောက်လုံးကြီး KLG PDF အဖွဲ့မှ တာဝန်ရှိသူတစ်ဦးက ပြောသည်။ 

• စစ်ကိုင်းတိုင်း၊ တန့်ဆည်မြို့နယ်၊ တဆယ်ကျဲကျေးရွာမှ လူနေအိမ် ၁၃ လုံးကို စစ်တပ်မှ ဧပြီ ၂၀ ရက်၊ နံနက်ပိုင်းက မီးရှို့ဖျက်ဆီးခဲ့ကြောင်း တန့်ဆည်သတင်းရင်းမြစ်များက ပြောသည်။ 

• စစ်ကိုင်းတိုင်း၊ ခင်ဦးမြို့နယ်တွင် နေအပူချိန် မြင့်တက်နေသဖြင့် စစ်ရှောင်အချို့ မူးမေ့မှုများ ရှိခဲ့ပြီး သောက်ရေအလွယ်တကူမရသောကြောင့် ရေဓာတ်ပြတ်ပြီး သေဆုံးသူများ ရှိလာသည်ဟု ခင်ဦးမြို့နယ် သတင်းမှန် ပြန်ကြားရေးက သိရသည်။ 

• ရန်ကုန်တိုင်း၊ သန်လျင်မြို့နယ်၊ အောင်ချမ်းသာကုန်းထိပ်တွင် ကွမ်းယာရောင်းနေသည့် စစ်အာဏာရှင် ဆန့်ကျင်ရေးတော်လှန်ရေးသမားတစ်ဦးနှင့် အမျိုးတော်စပ်သူ ကိုထွန်းဦးကျော်ကို ပျူစောထီးများက ဧပြီ ၂၀ ရက်၊ ည ၇ နာရီကျော်ခန့်က ပစ်ခတ်သတ်ဖြတ်ခဲ့ကြောင်း တော်လှန်ရေးသတင်းရင်းမြစ်များက ပြောသည်။ 

• ရန်ကုန်တွင် နေထိုင်သည့် The Voice Journal အယ်ဒီတာချုပ် ဦးကျော်မင်းဆွေ၊ သရုပ်ဆောင် မေပန်းချီ နှင့် အဆိုတော် ရွှေရည်သိန်းတန် တို့ကို စစ်တပ်က ရာဇသတ်ကြီး ပုဒ်မ ၅၀၅ (က) ဖြင့် အမှုဖွင့် အရေးယူထားသည်ဟု ရဲတပ်ဖွဲ့၏ ပြောဆိုချက်ကို ကိုးကားပြီး မဲခေါင်သတင်းဌာနတွင် ဖော်ပြထားသည်။ 

• အင်းစိန်ထောင်တွင် သေဒဏ်ချမှတ်ခြင်း ခံထားရသည့် ဒဂုံတက္ကသိုလ် ကျောင်းသား ခုနစ်ဦးထဲမှ ကျောင်းသား လေးဦးကို အခြားအကျဉ်းထောင်အသီးသီးကို ရွှေ့ပြောင်းလိုက်ကြောင်း ဒဂုံတက္ကသိုလ် ကျောင်းသားများ သမဂ္ဂထံမှ သိရသည်။ 

• မန္တလေးတိုင်း၊ မတ္တရာမြို့ပေါ်ရှိ စစ်ကောင်စီတပ်သားတပ်စွဲထားသည့် ရဲစခန်း နှင့် ထွေအုပ်ရုံးတို့ကို ဧပြီ ၂၀ ရက်၊ နေ့လယ် ၁၂ နာရီခန့်က ဒရုန်းဖြင့် ဗုံးကြဲတိုက်ခိုက်ခဲ့ကြောင်း ယူနီကွန်းပြောက်ကျားတပ်ဖွဲ့မှ တာဝန်ရှိသူတစ်ဦးက ပြောသည်။ 

• မန္တလေးတိုင်း၊ စဉ့်ကူးမြို့နယ်၊ ခက်သင်ရွာကို ဧပြီ ၂၀ ရက်၊ ညနေပိုင်းတွင် အကြမ်းဖက် စစ်တပ်က ဝင်ရောက် စီးနင်းစဉ် အမျိုးသမီး တစ်ဦးကို စစ်တပ်က ပစ်သတ်ပြီး ပြည်သူ ၃ ဦးကို ဖမ်းဆီးခေါ်ဆောင် သွားကာ နေအိမ် ၂၀၀ ကျော် မီးရှို့ဖျက်ဆီးခဲ့ကြောင်း ဒေသခံပြည်သူများက ပြောသည်။ 

• မကွေးတိုင်း၊ မြိုင်မြို့နယ်၊ မန်ကျည်းကန်ကျေးရွာ ကျေးလက်ဆေးခန်းကို စစ်ကောင်စီတပ်မှ ဧပြီ ၁၈ ရက် နှင့် ၁၉ ရက် နှစ်ရက်တာအတွင်း MI-35 တိုက်ခိုက်ရေးလေယာဉ်၊ MI-17 ထောက်ပို့ယာဉ်များဖြင့် ပစ်ခတ်တိုက်ခိုက်ခဲ့ပြီး မြိုင်ပြည်သူ့ကာကွယ်ရေး တပ်ဖွဲ့စခန်းတစ်ခု ဆုံးရှုံးခဲ့ကြောင်း အဆိုပါ အဖွဲ့မှ ဧပြီ ၂၁ ရက်တွင် သတင်းထုတ်ပြန်သည်။ 

• မကွေးတိုင်း၊ ရေစကြိုမြို့ပေါ်ရှိ အကြမ်းဖက်စစ်သားများ တပ်စွဲထားရာ နေရာ ၂ ခုကို ဧပြီ ၂၀ ရက်၊ နံနက်ပိုင်းက တစ်ပြိုင်တည်း ဝင်ရောက်တိုက်ခိုက်ခဲ့ရာ အကြမ်းဖက် စစ်သား ငါးဦး သေဆုံးပြီး PDF ရဲဘော် တစ်ဦး ကျဆုံးခဲ့ကြောင်း Myingyan Black Tiger (MBT) တပ်ဖွဲ့မှ တာဝန်ရှိသူတစ်ဦးက ပြောသည်။ 

• မကွေးတိုင်း၊ ထီးလင်းမြို့နယ်အနောက်ခြမ်းရှိ ပြည်သူ့အုပ်ချုပ်ရေးအဖွဲ့ရုံးကို ဧပြီ ၂၀ ရက်၊ မွန်းတည် ၁၂ နာရီခွဲခန့်က စစ်တပ်က တိုက်လေယာဉ်ဖြင့် ဗုံးကြဲပြီးနောက် မြေပြင်မှ အင်အား ၁၀၀ ကျော်ဖြင့် စစ်ကြောင်းထိုး ဝင်ရောက်နေကြောင်း YRA ထီးလင်းတပ်ဖွဲ့မှ တာဝန်ရှိသူတစ်ဦးက ပြောသည်။ 

• ပဲခူးတိုင်း၊ ပြည်ခရိုင်၊ ပေါင်းတည်မြို့နယ်၊ သရက်ချဉ်ချောင်း ကျေးရွာအနီးတွင် ဧပြီ ၂၀ ရက်၊ ညနေ ၃ နာရီခန့်က ပဲခူးရိုးမပေါ်သို့ စစ်ကြောင်းထိုးလာသော အကြမ်းဖက်စစ်သားများကို မိုင်းဆွဲတိုက်ခိုက်ခဲ့ရာ ၃ ဦးထက်မနည်း ဒဏ်ရာရခဲ့ကြောင်း Bago Region PDF မှ တာဝန်ရှိသူတစ်ဦးက ပြောသည်။ 

• ဧရာဝတီတိုင်း၊ ကြံခင်းမြို့နယ် သပိတ်အင်အားစုများက “ပြည်သူသာ အမိ/အဖ ထမင်းကျွေးတဲ့ လက်ကို မကိုက်ရ ” စာတန်းကိုင်ဆောင်ကာ ဧပြီ ၂၀ ရက်၊ မွန်းလွဲပိုင်းက စစ်အာဏာရှင် ဆန့်ကျင်ရေး ဆန္ဒပြခဲ့ ကြောင်း သိရသည်။ 

• ကရင်နီ (ကယား) ပြည်နယ်အတွင်း နေရပ်စွန့်ခွာ တိမ်းရှောင်နေရသည့် စစ်ရှောင်ပြည်သူများ နွေရာသီ ရေရှားပါးမှုူ အပြင် ပူပြင်းသည့် ရာသီဥတုကြောင့် မူးဝေ၊ ဖျားနာမှုများ ခံစားနေရကြောင်း စစ်ဘေးရှောင် ကူညီနေသူများထံမှ သိရသည်။ 

• ကရင်နီ (ကယား) ပြည်နယ်၊ ဒီးမော့ဆိုမြို့နယ်ရှိ စစ်ရှောင်ပြည်သူများကို စိတ်ဓာတ်ခွန်အားပေးသည့် အနေဖြင့် ကျေးလက်မြေအဖွဲ့၏ ဒါရိုက်တာ မမူစဲမှ စိတ်ဓာတ်ပိုင်းဆိုင်ရာ ကုစားမှု သင်တန်းကို ဧပြီ ၂၁ ရက်တွင် ပြုလုပ်ခဲ့ကြောင်း သိရသည်။ 

• ကချင်ပြည်နယ်၊ ဖားကန့်မြို့နယ်၊ လုံးခင်းကျေးရွာအုပ်စုက မှော်ဘုံ (မဒဲန်ယန်) ကျေးရွာကို ဧပြီ ၂၁ ရက်၊ နံနက် ၅ နာရီခွဲခန့်က စစ်ကောင်စီတပ်က အင်အား ၁၀၀ နီးပါးဖြင့် စစ်ကြောင်းထိုး ဝင်ရောက်ပြီး ဒေသခံ ၆၀ ကျော်ကို ထပ်မံ ဖမ်းဆီးထားသည်ဟု ဒေသခံများက ပြောသည်။ 

• ရှမ်းပြည်နယ် (မြောက်ပိုင်း)၊ နောင်ချိုမြို့နယ်၊ ဟိုခိုရွာရှိ ဆရာစံလိုဏ်ဂူအတွင်း PDF တပ်ဖွဲ့ဝင်များ ပုန်းအောင်းနေသည်ဟုဆိုကာ ဗုံးကြဲဖြိုဖျက်ရန် အကြမ်းဖက် စစ်တပ်က ဧပြီ ၂၁ ရက်တွင် ဟိုခိုရွာရှိ ပြည်သူများကို ရွာလုံးကျွတ် ရွှေ့ပြောင်းခိုင်းထားကြောင်း ဒေသခံပြည်သူများက ပြောသည်။ 

• မြန်မာနိုင်ငံတစ်ဝန်းလုံးရှိ မြန်မာမွတ်စလင်မ်များအနေဖြင့် ဝါကျွတ်အီးဒ်ပွဲတော်တွင် ဘာသာရေးပြဋ္ဌာန်းချက်များမှအပ အခြားပျော်ပွဲရွှင်ပွဲများကို လုံးဝမကျင်းပစေလိုကြောင်း မြန်မာမွတ်စလင်နိုင်ငံရေး အကျဉ်းသားများက ဧပြီ ၂၀ ရက်တွင် သဘောထားထုတ်ပြန်ခဲ့သည်။ 

• သတင်းစာဆရာကြီး ဟံသာဝတီ ဦးဝင်းတင် ကွယ်လွန်ခြင်း ၉ နှစ်ပြည့်အဖြစ် ယနေ့ ဧပြီ ၂၁ ရက်တွင် Anti-junta forces Coordination Committee-Mandalay အဖွဲ့က ရှပ်ပြာရောင် လှုပ်ရှားမှု ပြုလုပ်ခဲ့ကြောင်း သိရသည်။ 

• အကြမ်းဖက် စစ်တပ်က အာဏာသိမ်းပြီးနောက် အရပ်သားပြည်သူများကို သတ်ဖြတ်လျက်ရှိရာမှာ ဧပြီ ၂၀ ရက်ထိ စာရင်းများအရ ကျဆုံးခဲ့ရသူ ၃၄၂၂ ဦးထိ ရှိပြီ ဖြစ်သည်ဟု နိုင်ငံရေး အကျဉ်းသားများ ကူညီစောင့်ရှောက်ရေးအသင်း (AAPP) က ထုတ်ပြန်လိုက်သည်။ 

• မြန်မာနိုင်ငံတွင် အကြမ်းဖက်စစ်တပ်က အာဏာလုယူပြီးနောက်ပိုင်း စစ်အုပ်ချုပ်ရေးကို လက်မခံသည့် ပြည်သူများအပေါ် အကြမ်းဖက်မှုများ ကျူးလွန်နေသည်အပေါ် G 7 နိုင်ငံခြားရေးဝန်ကြီးများက ရှုတ်ချကြောင်း ပူးတွဲထုတ်ပြန်ခဲ့သည်။ 

• မြန်မာနိုင်ငံကို လေယာဉ်ဆီ တင်ပို့ရောင်းချနေသည့် သ‌‌ေင်္ဘာများကို အာမခံပေးနေသည့် ဗြိတိန်ကုမ္ပဏီ ငါးခုကို ချက်ချင်း ရပ်တန့်ရန် Burma Campaign UK အဖွဲ့က တောင်းဆိုလိုက်သည်။ 

• မြန်မာပြည်သူများကို ဆက်လက်ကူညီမည်ဟု မြန်မာနိုင်ငံဆိုင်ရာ ဂျာမန်သံရုံးက သတင်းထုတ်ပြန်ခဲ့သည်။ 

တိုင်းရင်းသား လက်နက်ကိုင်များ 

• လွိုင်ကော်-မိုးဗြဲ ကားလမ်းမ တစ်နေရာရှိ စစ်ကောင်စီယာဉ်တန်းကို ကရင်နီအမျိုးသား ကာကွယ်ရေး တပ် (KNDF) B-03 နှင့် ဗိုလ်တစ်ထောင်အဖွဲ့တို့မှ ဧပြီ ၂၁ ရက်၊ နံနက်အစောပိုင်း၂ နာရီခန့်က ပူးပေါင်း တိုက်ခိုက်ခဲ့ရာ စစ်ကောင်စီဘက်က သေဆုံးသူများပြားကြောင်း ကရင်နီ အမျိုးသားတိုးတက်ရေး ပါတီ (KNPP) ဗဟို သတင်း နှင့် ပြန်ကြားရေးက ထုတ်ပြန်ထားသည်။ 

• ကရင်နီ (ကယား) ပြည်နယ်၊ ဒီးမော့ဆို နှင့် မိုးဗြဲမြို့နယ် ကြား ခြောက်ရက်တာတိုက်ပွဲအတွင်း စစ်ကောင်စီတပ်သား ၅၀ ကျော် သေဆုံးပြီး တစ်ဦးအရှင်ဖမ်းမိကာ လက်နက်၂၀ကျော် သိမ်းဆည်း ရမိကြောင်း ကရင်နီအမျိုးသားများ ကာကွယ်ရေးတပ် KNDF က ယနေ့ ထုတ်ပြန်ထားသည်။ 

• ချင်းပြည်နယ်၊ မတူပီမြို့နယ်၊ လိုင်လင်းပီမြို့ စစ်ကောင်စီတပ်စခန်းမှ စစ်ကောင်စီတပ်သားတစ်ဦးသည် ဧပြီ ၁၆ ရက်က လက်နက်နှင့်အတူ အလင်းဝင်လာသည့်အတွက် ကျပ်သိန်း ၅၀ ချီးမြှင့်ခဲ့ကြောင်း CDF-Mara က သတင်းထုတ်ပြန်ထားသည်၊ 

• ကရင်ပြည်နယ် KNU တပ်မဟာ ၆ နယ်မြေကို ဧပြီ ၂၀ ရက်က စစ်တပ်က YAK-130 တိုက်လေယာဉ်ဖြင့် လာရောက်ပစ်ခတ်ပြီး လက်နက်ကြီးများဖြင့် ပစ်ခတ်သဖြင့် တော်လှန်ရေးတပ်ပေါင်းစုဘက်က ပြန်လည်ခုခံပစ်ခတ်ခဲ့သည့်အတွက် စစ်တပ်ဘက်မှအထိနာပြီး လက်နက်များ သိမ်းဆည်းရမိခဲ့ကြောင်း ကော်ဘရာစစ်ကြောင်းက သတင်းထုတ်ပြန်သည်။ 

စစ်ကောင်စီ 

• ထိုင်းဒုတိယဝန်ကြီးချုပ်နှင့်နိုင်ငံခြားရေးဝန်ကြီး Mr.Don Pramudwinai သည် ယနေ့ ဧပြီ ၂၁ ရက်၊ နံနက်ပိုင်းတွင် နေပြည်တော်ကို လာရောက်မည် ဖြစ်ပြီး စစ်ကောင်စီ ခေါင်းဆောင် မင်းအောင်လှိုင် နှင့် တွေ့မည်ဖြစ်ကြောင်း စစ်ကောင်စီသတင်းရပ်ကွက်ကို ကိုးကား၍ ရန်ကုန်ခေတ်သစ် သတင်းတွင် ဖော်ပြထားသည်။ 

• နေပြည်တော် ဥပ္ပါတသန္တိစေတီတော်တွင် ကဆုန်လပြည့် ဗုဒ္ဓနေ့ အခမ်းအနားကို နိုင်ငံတော်အဆင့်နှင့် အညီ ခမ်းနားစွာ ကျင်းပမည် ဖြစ်ကြောင်း စစ်ကောင်စီ ဒုခေါင်းဆောင် စိုးဝင်းက ဧပြီ ၂၀ ရက်က ပြုလုပ်သည့် ကဆုန်လပြည့် ဗုဒ္ဓနေ့ဆိုင်ရာ မင်္ဂလာအခမ်းအနားများ ကျင်းပရေး နာယကအဖွဲ့ နှင့် ဦးစီးကော်မတီ လုပ်ငန်းညှိနှိုင်းအစည်းအဝေးတွင် ပြောသည်။ 

• စစ်ကောင်စီ ကျင်းပမည့် မြန်မာ့ရုပ်ရှင်ထူးချွန်ဆု ချီးမြှင့်ပွဲအခမ်းအနားကို တက်ရောက်ကြမည့် အနုပညာရှင်များထဲက ဖက်ရှင်ဆုကိုပါ ရွေးချယ်ချီးမြှင့်သွားမည် ဖြစ်သည်ဟု စစ်ကောင်စီ ပြန်ကြားရေး ဝန်ကြီး ဦးမောင်မောင်အုန်းက ပြောသည်။ 

• စစ်တပ်ကျောထောက်နောက်ခံ ကြံ့ခိုင်ရေးပါတီကို နိုင်ငံရေးပါတီအဖြစ် မှတ်ပုံတင်ခွင့် ပြုလိုက်ကြောင်း စစ်ကောင်စီ လက်အောက်ခံ ရွေးကောက်ပွဲ ကော်မရှင်က ဧပြီ ၂၀ ရက်တွင် ကြေညာခဲ့သည်။ 

• မြန်မာနိုင်ငံတွင် နွေရာသီကာလ အပူချိန်များ မြင့်တက်နေသော်လည်း လက်ရှိ အခြေအနေအရ ရန်ကုန်အပါအဝင် မြို့ကြီးများတွင် လျှပ်စစ်မီး အချိန်အနည်းငယ်သာ ပေးနိုင်မည် ဖြစ်ပြီး မီးပြတ်ချိန် ပိုမိုများပြားလာနိုင်ကြောင်း နေပြည်တော် လျှပ်စစ်ဝန်ကြီးဌာနမှ အမည်မဖော်လိုသော အရာရှိတစ်ဦး၏ ပြောဆိုချက်ကို ကိုးကားပြီး ရန်ကုန်ခေတ်သစ်သတင်းဌာနတွင် ဖော်ပြထားသည်။ 

• ၂၀၂၂-၂၃ ပညာသင်နှစ်၏ အခြေခံပညာစာမေးပွဲ အောင်စာရင်းကို ဧပြီ ၂၇ ရက်တွင် ထုတ်ပြန်ကြေညာ သွားမည် ဖြစ်သည်ဟု စစ်ကောင်စီ ပညာရေးဌာနမှ သိရသည်။ 

• အာဏာသိမ်းစစ်ကောင်စီ၏ မဟာမိတ်အချင်းချင်း အပြန်အလှန်တရားစွဲဆိုမှုအဖြစ် ပြည်ခိုင်ဖြိုးပါတီ ခေါင်းဆောင်များကို လက်ျာစွန်းဝါဒီ မိုက်ကယ်ကျော်မြင့်က ဧပြီ ၁၉ ရက်က အမှုဖွင့် တိုင်တန်းခဲ့ကြောင်း သိရသည်။ 

• ရန်ကုန်မြို့တော်တွင် တစ်နေ့လျှင် လျှပ်စစ်မီး ၂ နာရီဝန်းကျင်သာ မီးပေးနိုင်တော့သည့် ရန်ကုန်လျှပ်စစ် ဌာနက ဆိုလာစနစ်ဖြင့် မီးသုံးသူများထံမှ လျှပ်စစ်ဝယ်ယူလိုဟု ကြေညာသည်။ 

ဧပြီ ၂၁ ရက် သုံးသပ်ချက် 

• စစ်ကောင်စီသည် လျှပ်စစ်မီးကို ပုံမှန်မပေးနိုင်ဘဲ မီးပြတ်ချိန် ပိုမိုများပြားသည့်အပြင် ဆိုလာသုံးပြည်သူများထံမှ လျှပ်စစ်ဓာတ်အားပြန်ဝယ်ရန် ပြောဆိုရသည်အထိ အုပ်ချုပ်ရေးစွမ်းရည် ညံ့ဖျင်းနေသည်ကို တွေ့ရသည်။ 

• စစ်ကောင်စီက ၎င်းတို့ကို မထောက်ခံသည့် နယ်ပယ်အသီးသီးက အသိပညာရှင် အတတ်ပညာရှင်မျာကို အကြောင်းအမျိုးမျိုးပြပြီး ပုဒ်မတပ်ကာ ဖမ်းဆီး ထောင်ချနှိပ်ကွပ်နေပြီး “ဆို့နင့်ကြေကွဲ ဝမ်းနဲလှ၊ မွေးရပ်မြေမို့ ပိုလို့ ခံစားရ” ဆိုတဲ့ စာကြောင်းလေးတစ်ကြောင်း ရေးသားရုံဖြင့် ဖမ်းဆီးခံရနေရသည် အထိ လွတ်လပ်စွာ ထုတ်ဖော်ပြောဆိုခွင့်ကို ဖိနှိပ်နေသည့် အခြေအနေမျိုးဖြစ်နေသည်။