မဇ္ဈိမ။ ။ ကရင်အမျိုးသားအစည်းအရုံး (KNU) အုပ်ချုပ်နယ်မြေများ၌ မတ်လ တစ်လအတွင်း တိုက်ပွဲအကြိမ်ရေ ၃၇၃ ကြိမ် ဖြစ်ပွားခဲ့ကြောင်း ကရင်အမျိုးသား လွတ်မြောက်ရေး တပ်မတော် (KNLA) ဗဟိုဌာနချုပ်က ဧပြီလ ၁၄ ရက်နေ့ ရက်စွဲဖြင့် ထုတ်ပြန်သည်။
မတ်လအတွင်း KNU အုပ်ချုပ်နယ်မြေ၊ တပ်မဟာအသီးသီးရှိ KNLA၊ KNDO၊ PDF များနှင့် စစ်ကောင်စီတပ်အကြား ဖြစ်ပွားခဲ့သော တိုက်ပွဲ ၃၇၃ ကြိမ်အတွင်း စစ်ကောင်စီတပ် ဘက်မှ ၄၂၂ ဦး သေဆုံးခဲ့ကြောင်း ဖော်ပြထားသည်။
ထို့ပြင် နောက်ထပ် ထိခိုက်ဒဏ်ရာရသူ စစ်ကောင်စီတပ်ဖွဲ့ဝင် ၂၅၈ ဦးရှိပြီး KNLA၊ KNDO နှင့် PDF ပူးပေါင်းတပ်ဖွဲ့ဘက်မှ ခုနစ်ဦး ကျဆုံးကာ ၃၁ ဦး ထိခိုက်ဒဏ်ရာရခဲ့ကြောင်း ထုတ်ပြန် ချက်တွင် ဖော်ပြထားသည်။
မတ်လအတွင်း KNU တပ်မဟာ (၂ ) နယ်မြေ၊ တောင်ငူခရိုင်ကို နယ်မြေကျော် စစ်ကြောင်းထိုးလာသော စစ်ကောင်စီတပ်နှင့် တပ်မဟာ (၂) KNLA ပူးပေါင်းတပ်ဖွဲ့များအကြား ထိတွေ့ တိုက်ပွဲဖြစ်ပွားနှုန်း ပိုမိုမြင့်တက်လာခဲ့ကြောင်း KNLA တပ်မဟာ (၂) စစ်ရေးသတင်းရင်းမြစ်တစ်ဦးက မဇ္ဈိမကို ပြောသည်။
တိုက်ပွဲဖြစ်ပွားမှု တိုးများလာသည်နှင့်အမျှ စစ်ကောင်စီတပ်၏ လက်နက်ကြီးပစ်ခတ်မှု၊ လေကြောင်း ဗုံးကြဲတိုက်ခိုက်မှုတို့သည်လည်း ပိုမိုများပြားလာ၍ ဒေသခံများ ထိခိုက်ဒဏ်ရာရမှု များပြားခဲ့ကြောင်းလည်း ၎င်းက ပြောသည်။
“တပ်မဟာ (၂ ) မှာတော့ တိုက်ပွဲဖြစ်ပွားမှုက တိုးလာတာပေါ့၊ စစ်ကောင်စီတပ်ဘက်က ရွာတွေထဲ လက်နက်ကြီးနဲ့ ပစ်တာလည်း ပိုများလာပါတယ်" ဟု တပ်မဟာ (၂) နယ်မြေ စစ်ရေးသတင်းအရင်းအမြစ် မဇ္ဈိမကို ပြောသည်။
အလားတူ KNU တပ်မဟာ (၃) နယ်မြေ၊ ညောင်လေးပင်ခရိုင်တွင်လည်း ကျေးရွာများအတွင်း စစ်ကြောင်းထိုး၍ အရပ်သားပစ်မှတ်များအား လက်နက်ကြီးဖြင့်ပစ်ခတ်၊ ဖမ်းဆီးမှုများ ပြုလုပ်နေသော စစ်ကောင်စီတပ်အား KNLA ပူးပေါင်းတပ်ဖွဲ့များက တန်ပြန်တိုက်ခိုက်ခဲ့ရာ ထိတွေ့ တိုက်ပွဲဖြစ်ပွားနှုန်း ပိုမိုမြင့်တက်လာကြောင်း သိရသည်။
"မတ်လအတွင်း တစ်ဖက်ရန်သူနဲ့ တိုက်ပွဲဖြစ်ပွားမှုက ဖေဖော်ဝါရီလနဲ့ယှဉ်ရင် ပိုများပါတယ်" ဟု တပ်မဟာ (၃) နယ်မြေမှ စစ်ရေးသတင်းအရင်းအမြစ် တစ်ဦးကလည်း မဇ္ဈိမကို ပြောသည်။
ထို့ပြင် မတ်လအတွင်းဖြစ်ပွားခဲ့သော တိုက်ပွဲပေါင်း ၄၀၀ နီးပါးတွင် KNU တပ်မဟာ (၅) နယ်မြေ၊ ဖာပွန်ဒေသ၌ တိုက်ပွဲပေါင်း အကြိမ်ရေ ၁၉၀ အများဆုံး ဖြစ်ပွားခဲ့ပြီး စစ်ကောင်စီတပ်၏ မယ်ခါးထာ့ကဲ့သို့သော သက်တမ်းရှည် ခြေကုတ်စခန်းအား KNLA က ပြန်လည်သိမ်းပိုက်မှုများ ရှိခဲ့သည်။
ပြီးခဲ့သည့် ဖေဖော်ဝါရီလကလည်း KNU အုပ်ချုပ်နယ်မြေများတွင် KNU လက်အောက်ခံ တိုက်ခိုက်ရေးတပ်ဖြစ်သော KNLA၊ KNDO ပူးပေါင်းတပ်ဖွဲ့များနှင့် စစ်ကောင်စီတပ်အကြား တိုက်ပွဲအကြိမ်ရေ ၄၂၀ ဖြစ်ပွားခဲ့ရာ စစ်ကောင်စီဘက်မှ ၂၆၇ ဦး သေဆုံးကာ ၃၈၆ ဦး ထိခိုက်ဒဏ်ရာရရှိခဲ့သည်။
စာတည်း။ ။ နောင်နောင်
စာမူတည်းဖြတ်။ ။ သန့်ဇော်(သန်လျင်)
