လင်မယားစကားများပြီးနောက် ကွာရှင်းပေးရန် တိုင်ကြားရာက ရပ်ကွက်ရုံးတွင် လူအုပ်စုဖြင့်ရိုက်နှက်ံရသူ အမျိုးသားတစ်ဦးမှာ နေအိမ်တွင်ဆေးကုသမှုခံယူရင်း ခြောက်ရက်အကြာတွင် သေဆုံးမှု ရန်ကုန် မြောက်ဥက္ကလာပမြို့နယ်တွင် ဖြစ်ပွားခဲ့သည်။

ရန်ကုန်တိုင်း၊မြောက်ဥက္ကလာပမြို့နယ် (ဌ )ရပ်ကွက် ခွာညို (၄)လမ်းတွင်နေထိုင်သည့် အသက် ၃၇ နှစ်အရွယ် ကိုအောင်ဖြိုးဝေ (ခ) ကိုဖိုးအောင်ကို ဆက်လက်ပေါင်းသင်းခြင်းမပြုလိုဟု ဇနိီးဖြစ်သူက ဧပြီလ ၇ ရက်နေ့က ရပ်ကွက်ရုံးတာဝန်ရှိသူများသို့ တိုင်တန်းခဲ့သည်။ ထို့နောက် နေ့လယ် ၂ နာရီဝန်းကျင်တွင် အုပ်ချုပ်ရေးမှူးရုံးမှ လူနှစ်ယောက်က ကိုအောင်ဖြိုးဝေကို လာရောက်ခေါ်ယူသွားခဲ့သည်။

ရပ်ကွက်ရုံးတွင် သုံးနာရီခန့်ကြာ စစ်ဆေးမေးမြန်းမှုများပြုလုပ်စဉ်တွင် လျှပ်စစ်ကျင်စက်ပါအသုံးပြုခဲ့ပြီး လူခုနှစ်ဦးက ရိုက်နှက်မှုပြုခဲ့သည်ဟု ဒေသခံများက မဇ္ဈိမသို့ပြောသည်။

ခြေနှစ်ချောင်းကိုခြောက်ပေါက်ထဲထဲ့ပြီး ခြေဖဝါးများကို ကျင်စက်ဖြင့်တို့ခြင်း၊ ဝါယာကြိုးများပူးခေါက်ပြီး နောက်ကျောကိုရိုက်နှက်ခြင်း၊ ဖိနပ်စီးကာ ခန္ဓာကိုယ်ပေါ်သို့ တက်နင်းခြင်း၊ ညိုသကြီးအား ဝါးတံမြက်စည်းဖြင့်ရိုက်နှက်ခြင်းများပြုလုပ်ခံခဲ့ရသည်ဟု ကိုဖိုးအောင်က ပြန်ပြောပြကြောင်း ဒေသခံတစ်ဦးက မဇ္ဈိမသို့ပြောသည်။

မိသားစုဝင်တစ်ဦးက လူမှုကွန်ရက်စာမျက်နှာပေါ်တွင်တင်ထားသော ကိုဖိုးအောင်မကွယ်လွန်မီရိုက်ကူးထားသော ဓာတ်ပုံများအရ နောက်ကျောတွင်အရှိုးရာကြီးများထင်ထင်ရှားရှားတွေ့မြင်ရသလို ခြေသလုံးတွင် အညိုအမဲများစွဲနေသည်ကိုလည်းတွေ့ရသည်။

ရိုက်နှက်ခံရပြီးနောက် နေအိမ်တွင်ဆေးကုသမှုခံယူနေခဲ့ပြီး ဧပြီလ ၉ ရက်နေ့တွင် အရက်ဖြတ်ရန်အလို့ငှာ စိတ်ကျန်းမာရေးဆေးရုံ ပြင်ပလူနာဌာနတွင်သွားရောက်ယုသမှုခံယူခဲ့သည်။ နောက်ပိုင်းတွင် ရင်ဘတ်အောင့်ဝေဒနာခံစားရသည့်အခါ မြောက်ဥက္ကလာပဆေးရုံသို့တက်ရောက်ကုသမှုခံယူခဲ့ရာက ဧပြီ ၁၃ ရက်နေ့တွင် ကွယ်လွန်သွားခဲ့သည်။

'' ဒဏ်ရာတွေကတော့ မြင်လို့ကိုမကောင်းဘူး။" ဟု ဧပြီလ ၁၄ ရက်နေ့က နာရေးလိုက်ပို့သော ရပ်ကွက်သားတစ်ဦးက မဇ္ဈိမသို့ပြောသည်။

အနီးကပ်ဆုံးမိသားစုနှင့်တိုက်ရိုက်ဆက်သွယ်မရနိုင်သော်လည်း " အရိုက်ခံရတဲ့ဒဏ်ရာတွေက ကြွက်သားတွေစုတ်ပြတ်သွားပြီး အဲဒီဒဏ်ကြောင့် ဆုံးရတာလို့တော့ ဆရာဝန်မှတ်ချက်ချတယ်ပြောတယ်။ "ဟု မဇ္ဈိမက စုံစမ်းသိရှိရသည်။

" ကိုဖိုးအောင်က မနက်မိုးလင်းထဲကတစ်နေကုန်အရက်သောက်တယ်။ ပြီးရင်ဘယ်သူကိုမှ သူကပြဿနာမရှာဘူး၊ ပြုံးပြုံး ပြုံးပြုံးနဲ့ ။ ညနေဖက်ဆိုရင်ဘော်လီဘော်ကွင်းမှာလာထိုင်တယ်။ စတယ်။နောက်တယ်၊ အခုလိုဒဏ်ရာတွေဒီလောက်များတာ သေပြီပေါ့''ဟု တစ်ခြားရပ်ကွက်သားတစ်ဦးက မဇ္ဈိမသို့ပြောသည်။

ကိုဖိုးအောင်ကိုရိုက်နှက်သူများနှင့်ပတ်သက်၍ အသေးစိတ်မသိရှိရသော်လည်း ရပ်ကွက်ရုံးတွင် " အခုက ရပ်ကွက်ထဲဘောင်မဝင်သူတွေ ရုံးမှာ လူစွာလုပ်နေကြတယ်၊ ရိုက်မယ်ဆိုတာချည်းပဲ" ဟု အိမ်နီးနားချင်းတစ်ဦးက ပြောသည်။ ရိုက်နှက်ရာတွင်ပါဝင်သူဟု သံသယရှိခံရသူတစ်ဦးကတော့ ထွက်ပြေးတိမ်းရှောင်သွားသည်ဟုလည်း သိရသည်။

'' သူက မူးနေတော့ ရိုက်တာတွေနာရမှန်းမသိတော့ မအော်ဘူးထင်တယ်။ မအော်တဲ့အခါကျတော့ပိုပြီးရိုက်ကြတာပေါ့။" ဟု သူက ဆက်ပြောသည်။

အဆိုပါရပ်ကွက်၏အုပ်ချုပ်ရေးမှူး ဦးအောင်မြင့်ကျော်မှာရပ်ကွက်အတွင်းရှိချောင်းနံဘေးမြေလွတ်မြေကွက်များကိုကွန်ကရစ်တိုင်စိုက်ထူးပြီးခြံစည်းရိုးခတ်ကာအကွက်ရိုက်ရောင်း စားခဲ့ရန်ကြိုးစားခဲ့ရာ ရပ်ကွက်နေလူအများ၏ ကန့်ကွက်မှုများ သတင်းမီဒီယာတွင်ဖော်ပြပါရှိပြီးနောက် အစီအစဉ်ပျက်သွားခဲ့ရဖူးသည်။

၂၀၂၂ခုနှစ်အတွင်း ခွာညို (၄) လမ်းနှင့် (၅) လမ်းထိပ်ရှိ မြေကွက်အလွတ်များတွင် အုပ်ချုပ်ရေးမှူး၏ ခိုင်းစေမှုဖြင့်ခြံစည်းရိုးလာခတ်သည်ကို ကိုဖိုးအောင်ကလည်း ကန့်ကွက်ပြောဆိုခဲ့ဖူးသည်။

လင်မယားကွာရှင်းမှုမှာလည်းဖြစ်မြောက်သွားခြင်းမရှိသော ကိုဖိုးအောင်တွင် သားသမီးနှစ်ဦးကျန်ရစ်သည်။

ပုံ - မိသားစုဝင်တစ်ဦးက လူမှုကွန်ရက်စာမျက်နှာပေါ်တွင်တင်ထားသောဓာတ်ပုံများကို ကူးယူဖော်ပြသည်။