ရန်ကုန်တိုင်းဒေသကြီး၊ မှော်ဘီမြို့၏ အနောက်မြောက်ဘက် ၁၂ မိုင်ခန့်အကွာကို ဗဟိုပြု၍ အင်အား ရစ်(ခ်)တာစကေး ၃.၇ အဆင့်ရှိ မြေငလျင်တစ်ခု လှုပ်ရှားသွားကြောင်း စစ်ကောင်စီလက်အောက်ခံ မိုးဇလဌာနမှထုတ်ပြန်သည်။
မိုးလေဝသနှင့်ဇလဗေဒညွှန်ကြားမှုဦးစီးဌာန၏ ထုတ်ပြန်ချက်အရ ကမ္ဘာအေးမြေငလျင်စခန်းမှ မြောက်-အနောက်မြောက်ဘက် ၂၁ မိုင်ခန့်အကွာ၊ မြန်မာနိုင်ငံပြည်တွင်း (မှော်ဘီမြို့၏ အနောက်မြောက်ဘက် ၁၂ မိုင်ခန့်အကွာ)၊ အနက် ၁၅ ကီလိုမီတာကို ဗဟိုပြု၍လှုပ်ရှားသွားခြင်း ဟုသိရသည်။
ယနေ့ မတ်လ ၂၈ ရက် မွန်းလွဲ ၁ နာရီ ၂၂ မိနစ်ခန့်တွင် အဆိုပါမြေငလျင်လှုပ်ခတ်မှုကို ခံစားသိရှိခဲ့ကြောင်း ရန်ကုန်တိုင်းဒေသကြီးအတွင်းရှိမြို့နယ်အများအပြားမှ ဒေသခံများက ပြောသည်။
“ ၁နာရီ ၂၂ မိနစ်လောက်ကပါ။ အမြင့်မှာနေတဲ့သူတွေလောက်ကပဲ သိသာတယ်။ ကျွန်မက တိုက်ခန်း နေတဲ့သူပါ။ လေးလွှာမှာ နေပါတယ် “ ဟု လှည်းတန်းတွင်နေထိုင်သောဒေသခံက မဇ္ဈိမသို့ ဖြေဆိုသည်။
အလားတူ ရွှေပြည်သာတွင်နေထိုင်သော ဒေသခံတစ်ဦးလည်း “ ကျွန်မက အိပ်နေတာပါ။ အိပ်နေတာကနေ ဆွဲခါသလိုလှုပ်သွားလို့ လန့်ပြီးထထိုင်မိပါတယ်” ဟု ငလျင်လှုပ်ချိန် ၎င်းကြုံတွေ့ခံစားရသည်ကို ပြောပြသည်။
လူမှုကွန်ရက်စာမျက်နှာ ဖေစ့်ဘွတ်ပေါ်တွင်လည်း ယနေ့လှုပ်ခတ်ခဲ့သော မြေငလျင်အခြေအနေနှင့် ပတ်သက်၍ အမြင်အမျိုးမျိုးမျှဝေနေကြသည်ကိုတွေ့ရသည်။
စာတည်း ။ ။ Alden
စာမူတည်းဖြတ်။ ။ သန့်ဇော်(သန်လျင်)
