မန္တလေးတိုင်း အမရပူရမြို့နယ်တရားရုံးတွင် ယနေ့မွန်းလွဲပိုင်းက ဗုံးပေါက်ကွဲမှုဖြစ်ပွားခဲ့ရာ ရဲတပ်သားတစ်ဦးသေဆုံးပြီး တစ်ဦးဒဏ်ရာရသွားကြောင်း ဒေသခံများထံမှ သိရသည်။
“လဝကရုံးဘက်ကနေ အုန်းကနဲပေါက်ကွဲသံကြီးတစ်ချက်ထွက်လာတယ်။ ပထမတော့ လဝကရုံး အဆော်ခံရတယ် မှတ်တာ၊ ဆေးရုံကားတွေ တရားရုံးဘက်ကထွက်လာတော့မှပဲ တရားရုံးထဲ ဗုံးပေါက် တာမှန်း သိရတော့တယ်။ ရဲနှစ်ယောက်ထိတယ်လို့ ကြားတယ်ဗျ” ဟု ဒေသခံတစ်ဦးက ပြောသည်။
ယနေ့ မတ်လ ၂၂ ရက် မွန်းလွဲ ၁ နာရီဝန်းကျင်ခန့်က အဆိုပါတရားရုံးဝင်းအတွင်းရှိ စစ်ကောင်စီတပ်ဖွဲ့ ဝင်များလုံခြုံရေးချထားသည့်နေရာတွင် ပေါက်ကွဲမှုဖြစ်ပွားခဲ့ခြင်းဖြစ်ကြောင်း သိရသည်။
ဗုံးပေါက်ကွဲမှုကြောင့် ရဲတပ်သားဆန်းဦးဆိုသူသေဆုံးပြီး ရဲတပ်သားလှခိုင်ဆိုသူ ဒဏ်ရာရသွားကြောင်း ရဲတပ်ဖွဲ့နှင့်နီးစပ်သည့် သတင်းများရင်းမြစ်များက ဆိုသည်။
ဗုံးပေါက်ကွဲမှုအကြောင်းရင်းနှင့်ပတ်သက်၍ ယခုညနေပိုင်းအထိ မသိရသေးပေ။
မန္တလေးမြို့တွင် ယနေ့နံနက် ၈ နာရီခန့်ကလည်း အောင်မြေသာစံမြို့နယ်မှ ရာအိမ်မှူးနှစ်ဦး လက်ဖက် ရည်ဆိုင်အတွင်း ပစ်ခတ်ခံရပြီး၊ တစ်ဦးသေဆုံးကာ တစ်ဦးအပြင်းအထန်ဒဏ်ရာရခဲ့သည့် ဖြစ်စဉ်တစ်ခု ဖြစ်ပွားခဲ့သေးသည်။
၎င်းဖြစ်စဉ်နှင့်ပတ်သက်၍လည်း မည်သည့်အဖွဲ့အစည်းလက်ချက်ဖြစ်ကြောင်း မသိရသေးပေ။
စာတည်း။ ။စောဖေ
စာမူတည်းဖြတ်။ ။စောဖေ
